YEHESKIEL 18 - KITABI HABARI MOPIOHE

¹ Eeya lotahuda mai odelaatia,

² “Yilongola pohumaya botie tulusi helapa-lapaliyalo to Isirai̒lu? ‘Mongo dulaa̒ molamela hungo lo angguru u molotingo lasaalio, bo tau̒kekeei̒ wambao̒ tamolililu dungitio.’

³ Domi Wau̒, Allahu Taa̒ala tatumu-tumulo, Eeya Taa Laba-labaalo molanggato, pohumaya boito diilalo wulitolio to Isirai̒lu.

⁴ Nyawa lo timii̒du tau yito milikii-U̒, mopio nyawa lo walai̒o. Taa u odusa, tioolo tamaa mate.

⁵ Humaya mao̒ woluo taa u mopiohu, aadili wau motulidu hale.

⁶ Tio diila molubo balaahala taulo Isirai̒lu meaambo molamela bake podewo to tataa-mbatiyalo pomujaalo dedeewaalo. Tio diila pee̒enta mao̒ moheinga dile taabua lotaa wewo meaambo motuluhu wolo taabua tadonggo duladulahu.

⁷ Tio diila pee̒enta mao̒ mohimbulo wau molambato. Babaa-langiyalo pongaku lotaa u obiloli laito powalingolio. Taa u polaangolo wohiyalio ua̒alo wau taa udiila oboo̒, wohiyalio pakeyangi.

⁸ Tio diila pee̒enta mao̒ mopobuloto wolo bunga. Tio diila mohuto mohutu u moleeto wau todelomo timii̒du polohaamawa tio mongohi mao̒ putuusani u motulidu hale.

⁹ Tio modudua̒ palentaa-U̒ wau modungohe to ngoa̒amila butoo̒o-U̒. Taa odieelo mola tamotulidu hale wau madebo tumumulo. Wau̒, Eeya Taa Laba-labaalo molanggato malo tahuda mai.

¹⁰ Bo humaya mao̒ tau boito owalao̒ tao̒hilaa molambato, momate-mateelo mao̒, wau mohutu dadaata u moleeto wewolio

¹¹ u diila pee̒enta mao̒ pilohutu liyamolio. Tio molamela bake podewo to tataa-mbatiyalo pomujaalo dedeewaalo. Tio moheinga wau motuluhe wolo dile taabua lotaa wewo.

¹² Tio motohilaa mohimbulo totaa mosikini, molambato, mohama balangi pongaku lotaa u obiloli to olio. Tio monao̒ ode kukuu-wiliyaalo lotaa u diila motota lo Eeya wau molubo balaahala u moo̒olonuo̒.

¹³ Tio mopobuloto wolo bunga. Wolo taa u odito boito matumumulo? Diila! Tio malohutu ngoa̒amila u moo̒olonuo̒ boito, wau tio maamate! Opopatelio yito akiibati lo huhutuulio lohihilao.

¹⁴ Humaya mao̒ taa u mohutu dadaata u moleeto boito owalao̒, wau walao̒ boito moo̒onto ngoa̒amila huhutu liyamolio, bo diila modudua̒ao̒.

¹⁵ Walao̒ boito diila mohuto molubo balaahala taulo Isirai̒lu, meaambo molamela bake podewo to tataa-mbatiyalo pomujaalo dedeewaalo. Tio diila pee̒enta mao̒ moheinga dile taabua lo taa wewo,

¹⁶ meeambo modeehe boli molambata penu boli olo tatoonu. Babaa-langiyalo pongaku lotaa u obiloli to olio laito powalingolio. Taa u polaangolo wohiyalio ua̒alo wau taa u diila oboo̒ wohiyalio pakeyangi.

¹⁷ Tio diila pee̒enta mao̒ mohutu moleeto meaambo mopobuloto wolo bunga. Tio modungoheo̒ ngoa̒amila butoo̒o-U̒ wau modudua̒ palentaa-U̒. Walao̒ boito diila taamate sababu duduu-sawaalo liyamolio, bo debo tumutumulo.

¹⁸ Bolii̒o mao̒, tiyamolio tao̒hilaa mohimbulo, molambato wau mohutu u moleeto wewolio, maamate sababu duduu-sawaalo u pilohutulio lohihilao.

¹⁹ Bo otanu woluo taa u mohintu yilongola walao̒ boito diila modudua̒ momanta duduu-sawaalo liyamolio. Tametio yito, sababu walao̒ boito mopiohu wau motulidu hale. Tio modungohe ngoa̒amila butoo̒o-U̒ wau mohutu mao̒ wolo tatapu wau molotolo hilao, yi tio debo tumutumulo.

²⁰ Taa u mohutu dusa, tioolo tamaa mate. Walao̒ diila musi momanta akiibati lo totala liyamolio; bolii̒o mao̒ tiyamo olo diila musi momanta akiibati lo duduu-sawaalo walai̒o. Taa u mopiohu sababu huhutuulio u mopiohu mamoo̒tapu pahala u mopiohu. Wau taa u moleeto mamodutolo akiibati lo ololeetio.

²¹ Wonu ngotaalio tamoleeto diilalo mohutu dusa, wau mamo dungohe ngoa̒amila butoo̒o-U̒, wau moponao̒ huhutu u mopiohu wau otutu, tio diila taamate.

²² Ngoa̒amila dusaalio maa ambunguolo; tio matumumulo, sababu mohutu u otutu.

²³ Wolo to pikiilangimu Wau̒ Eeya Taa Laba-labaalo molanggato sanangi wonu taa u moleeto mate? Sama-samaata diila! Wau̒ motohilaa deu̒ tio mololaa duduu-saalio alihu tio debo tumutumulo.

²⁴ Bo wonu ngotaalio taa mopiohu, diilalo mohutu u mopiohu, tumbao̒ molumulao̒ mohutu u moleeto wau totoonulalo u moo̒olonuo̒ u biasaalio hepohutuo lotaa moleeto, wolo tio madebo tumumulo? Diila! Monto ngoa̒amila huhutuulio u mopiohe boito, diaaluo penu boli tuwau mao̒ muli eelalio mola. Tio maamate sababu lohutu dusa wau diila tatapu wau molotolo hilao to Olau̒.

²⁵ Otanu woluo tamoloi̒ya odie, ‘Huhutu lo Eeya tilaala.’ Dungohiilo, wuu taulo Isirai̒lu! Tingga tilaala huhutuu-U̒? Timongolilo tatilaala.

²⁶ Wonu taa u mopiohu diilalo mohutu u mopiohu, tumbao̒ mamohutu u moleeto, yi tio maamate, sababu ololeeto u pilohutulio.

²⁷ Bo wonu taa u moleeto diilalo mohutu dusa bo mamoponao̒ huhutu u otutu wau mopiohu, yi nyawalio mamoa̒ahu.

²⁸ Tio malo ngalati totoonulalo huhutuulio tulusi lohuheli lohutu dusa. Lou̒ odito tio diila taamate, bo debo tumutumulo.

²⁹ Wau timongoli, wuu tau-tauwalo Isirai̒lu, timongoli hemoloi̒ya deu̒ huhutu lo Eeya boito tilaala. Wolo tilaala huhutuu-U̒, wuu Isirai̒lu? Diila! Timongolilo tatilaala!”

³⁰ Eeya Taa Laba-labaalo molanggato, lotahuda mai, “Wuu tau-tauwalo Isirai̒lu, Wau̒ mamo mutoa̒i ngota-ngota motuuu̒de wolo huhutuulio. Polilihulo monto duduusaamu. Diila mao̒ polulia dusamu mongantulu batangamu.

³¹ Pohuhelia mao̒ totoonulalo u moleeto u hepohutuo limongoli wau huliilo mao̒ hilao wau pikiilangimu mowali bohu. Yilongola timongoli musi mate?

³² Wau̒ diila sanangi wonu tahingota-ngotawa mate. Tolailo duduu-sawaalo limongoli alihu timongoli debo tumutumulo. Wau̒ Eeya Taa Laba-labaalo molanggato malo tahuda mai.”