YEHESKIEL 16 - KITABI HABARI MOPIOHE

Yerusalemu tadiila tatapu wau molotolo hilao

¹ Eeya luli lotahuda mai odelaatia,

² “Wuu manusia panaa, pobiloheelo ode Yerusalemu ngoa̒amila huhutu kootolo u mapilo hutulio.”

³ Eeya Taa Laba-labaalo molanggato lopoa̒hu olaatia lopo tunggulai tahuli botie ode Yerusalemu, “Wuu Yerusalemu, yio̒ lowali mai tohuta lo Kanaa̒n. Tiyamamu taulo Amori wau tiilamu taulo Het.

⁴ Tou̒ yio̒ lowali mai diaaluo talomunto tali lo wibuu̒mu, meaambo lopolihu olemu, meaambo lopobadaa̒a wolo watingo, meaambo lopohulotao̒ wolo kaingi.

⁵ Diaaluo penu boli ngotaa mao̒ talodehu hilao to olemu tilinggula ohilaa mohutu mao̒ susuu-aliyaalo boito ode olemu. Tou̒ yio̒ lowali mai, diaaluo penu boli ngotaa mao̒ talo tolia̒nga olemu, tumbao̒ yio̒ tilapilio ode halabolu.

⁶ Lapatao̒ yilumaodeo̒ Wau̒ wau loo̒onto olemu totooo̒la to delomo lomu loduhumu, bo Wau̒ diila lopoluli olemu yilate.

^7-9 Hilama-U̒ taluhu lapatao̒ yilulowa-U̒ duhu lonto wawaau̒mu. Piladeta-U̒ alipumu wolo winulo jaitun. Pilopo udaa̒a-U̒ mola yio̒ debo odelo pilomulo u molomiodu. Yio̒ lobutu mola mali-malihuhuo̒, seehati wau wohuta moa̒aluti, boli lowali ngotaalio taabua tahumula. Tutumu mahemo lingohei wau huwou̒mu hayahaya, bo yio̒ laalaala. Tou̒ Wau̒ luli yilumaodeo̒, iloontonga-U̒ deu̒ malei dungga wakutuumu u laasa motohilaa daa̒. Bilua̒adu-U̒ jumba-U̒ to wawaau̒mu u laalaala, pilodanti-U̒ laasa tohilaa-U̒ daa̒ ode olemu. Ooo̒, ilawadu-U̒ danti monika wolemu, wau yio̒ lowali milikii-U̒. Wau̒, Eeya Taa Laba-labaalo molanggato malo tahuda mai.

¹⁰ Lapatao̒ pilopopake-U̒ olemu boo̒ taabua u osuji, sapatu monto walito u moa̒aluti daa̒, buuhuto lunggongo monto kaingi lineni wau jumba u pilohutu lonto wiyohu lobambau.

¹¹ Pilolomu-U̒ yio̒ wolo polioto, maina wau lilii-nggitowalo.

¹² Yilohi-U̒ olemu hua̒limo wulingo, ante-ante wau makuta u gaaga.

¹³ Odieelo mola yio̒ lopolomu hulawa wau talaa̒; pakeyangimu pilohutu lonto kaingi lineni wau wiyohu lobambau siluji. Yio̒ mowali molamela roti monto labu lotiligu u mopiohe daa̒, wolo hula lotiia̒ wau winulo jaitun. Ogaagamu otutu polu-polutuo̒ wau yio̒ lowali olongia taabua.

¹⁴ Ngoa̒amila bangusa hemomuji ogaagamu u wimu-wimumuto ngoa̒amilalo boito, wau Wau̒ulo talohutu mai olemu gaaga. Wau̒ Eeya Taa Laba-labaalo molanggato malo tahuda mai.

¹⁵ Bo yio̒ tilaala lopohuna ogaagamu boli oowoonu tanggulumu. Yio̒ helo tuluhu wolo totoonulalo mongo lolai̒ tahilaode.

¹⁶ Ngotayadu lo pakeyangimu hepilo hunaamu u lodadai mao̒ tambati polubowalo balaahalamu. Yio̒ lowali tasuuntali wau helongohi batangamu ode timii̒du mongo lolai̒.

¹⁷ Lonto dadai hulawa wau talaa̒ uilohi-U̒ mai olemu, hepilo hutumu bubuu-iyaalo talolai̒, lapatao̒ yio lohutu huloto wolo bubuu-iyaalo boito.

¹⁸ Hepilakeyamu to bubuu-iyaalo boito pakeyangi siluji u mailohi-U̒ mai olemu. Pilopo dewomu ode limongolio winulo jaitun wau totabu u maa tilolimomu lonto ola-U̒.

¹⁹ Yilohi-U̒ mai olemu ua̒alo lonto tiligu u mopiohe daa̒, hula lotiia̒ wau winulo jaitun tutu. Bo ngoa̒amila boito pilopo dewomu ode babaa-laahalaalo boito u loposanangi hilaa limongolio. Wau̒ Eeya Taa Laba-labaalo molanggato malo tahuda mai.

²⁰ Lapatao̒ pilopo dewomu mongo walao̒nto, talolai̒ wau taabua, lowali bake ode babaa-laahalaalo. Tingga diipo lotuuu̒de deu̒ yio̒ diila tatapu wau molotolo hilao to Olau̒?

²¹ Wolo mapaatuti hamaamu mongo walau̒u-U̒ wau mopobake mao̒ olimongolio ode babaa-laahalaalo?

²² To delomo tutumulumu u moo̒lonuo̒ odelo tasuuntali boito, penu boli ngoi̒di mao̒ yio̒ diila loe̒ela mola maasa u kikiiu̒mu muloololio mai, tou̒ yio̒ laalaala wau totooo̒la todelomo lomu loduhumu lohihilao.”

Tutumulo Yerusalemu odelo tasuuntali

²³ Eeya Taa Laba-labaalo molanggato lotahuda mai, “Matopotala yio̒! Otutu topotala! Yio̒ malohutu ngoa̒amila u moleeta boito.

²⁴ Donggo poli, to tanalapa lokota wau tobiihu lotimii̒du dalalo yio̒ helo potihula tataa-mbatiyalo u polubowalo balaahala wau potisuu-ntaliyalo.

²⁵ Yio̒ helo poo̒oleeto ogaagamu. Batangamu hepilopo yingomu ode timii̒du mongo lolai̒ tahilaode, wau diila ohuhe-huheliilio yio̒ hemojina.

²⁶ Masiri, tiheedemu uleidaa̒ napusuulio boito, manilikamu lotuluhu. Yio̒ sangaja lotisuuntali u loo̒muluka ola-U̒.

²⁷ Botia Wau̒ moponao̒ u mohukuumani mai olemu wau mohama balakati u mailohi-U̒ olemu. Wuduwo-U̒ yio̒ ode tau-tauwalo Pilistin tamolonuo̒ olemu wau mojijio̒ moo̒onto pii̒limu u kootolo boito.

²⁸ Bo yio̒ debo diipo molaasa sanangi; sababu uito heila-yilapitamu taulo Asyur. Yio̒ lowali tasuuntali limongolio, bo debo diila olo loo̒tapu ilolulia lohilao lonto olimongolio.

²⁹ Lapatao̒, yio̒ lowali tasuuntali taulo Babel, bangusa tadaahangi boito. Bo timongolio olo diila mambo mopotolu hilaamu.”

³⁰ Eeya Taa Laba-labaalo molanggato lotahuda mai, “Ngoa̒amilalo boito mapilo hutumu debo odelo tasuuntali tadiila motota moolito.

³¹ To tanalapa lokota wau to timii̒du dalalo hepilo tihulumu tataa-mbatiyalo u polubowalo balaahala wau posuu-ntaliyalo. Bo yio̒ diila debo odelo tasuuntali biaasa u palalu lodoi.

³² Yio̒ debo odelo dile taabua talo hiyaanati dilelio wau lohutu diila motulidu hale wolo mongo lolai̒ wewo.

³³ Ngotaalio lo tasuuntali laito moo̒tapu baayali, bo bolii̒o mao̒ yio̒olo tahe longohi palaseni ode mongo tilantahumu, tumbao̒ hepiliyomu timongolio wolo doi alihu tonggonao̒ mai monto totoonulalo mao̒ mai motuluhu wolemu.

³⁴ Yio̒ tasuuntali wewo wolo tawewo wewoolio. Diaaluo tamomakusa olemu mowali suuntali. Yio̒ diila hebaa-yaliyaalo, tumbao̒ yio̒ lohihilao tahe lomaayali. Memangi, yio̒ wewo wolo tawewo wewoolio.”

Hukuumani lo Allahu Taa̒ala ode Yerusalemu

^35-36 Wuu Yerusalemu, tasuuntali, dungohiilo wolo upilo tahuda mai lo Eeya Taa Laba-labaalo molanggato, “Yio̒ malohinggi boo̒mu, wau odelo tasuuntali yiludumu batangamu ode mongo tilantahu wau babaa-laahalaamu u moo̒lonuo̒ boito. Mongo walau̒mu hepilatemu yila-yilateelo mao̒ wau pilopo bakemu ode babaa-laahalaalo boito.

³⁷ Sababu uito, ngoa̒amila bakasi lo tilantahumu maa̒ambuwo-U̒, mopio tao̒tohilaamu meaambo tailonuu̒mu. Timongolio matimihula momalita olemu wau mamohinggi ngoa̒amila pakeyangimu, tilinggula timongolio mowali momilohe batangamu u laalaala.

³⁸ Yio̒ mahukuu-maniyo-U̒ mai sababu polojina wau polamatea mate-mateelo mao̒ umapilo hutumu boito. To delomo oyiyingo wau omulukaa-U̒ yio̒ mahukuu-maniyo-U̒ mate.

³⁹ Yio̒ mawuduwo-U̒ ode mongo tilantahumu boito, wau timongolio mamopo lohubu tataa-mbatiyalo hepoti suuntaliyamu wau polubowalo balaahala. Ngoa̒amila pakeyangi wau polomu mahamaa limongolio, tilinggula yio̒ mohilaala.

⁴⁰ Timongolio mamopoa̒hu taa dadaata molembai̒ olemu wolo botu, wau mongo-ngolota wawaau̒mu wolo wamilo.

⁴¹ Timongolio mamomobu ngoa̒amila belemu wau mopoa̒hu mongobua mosakusi mao̒ hukuu-manimu. Odieelo mola mapo huheliyo-U̒ polojinamu. Yio̒ diilalo molaya-layadeo̒ palaseni ode mongo tilantahumu.

⁴² De lapatao̒ uito omulukaa-U̒ mamoole, wau Wau̒ mamuli moduo̒oto mola. Wau̒ diilalo momuluka wau mohiihia.

⁴³ Wau̒ mohukuumani mai olemu sababu yio̒ diila moe̒ela woloolo mola Wau̒ helolaala olemu tou̒ yio̒ donggo humula mai. Yio̒ helo pomuluka ola-U̒ todelomo totoonulalo huhutuumu u moleeto boito. Yilongola ngoa̒amila pii̒limu u moo̒lonuo̒ boito donggo diluhengamu poli wolo polojinawa? Wau̒ Eeya Taa Laba-labaalo molanggato malo tahuda mai.”

Debo odelo tiilolio, odito olo ti puusiliilio

⁴⁴ Eeya lotahuda mai, “Wuu Yerusalemu, tau-tauwalo mamomake lumadu botie ode olemu, ‘Debo odelo tiilolio, odito olo ti puusiliilio.’

⁴⁵ Memangi, yio̒ yito walao̒ taabua liilamu. Tio molonuo̒ to dilelio wau tomongo walai̒o lohihilao. Yio̒ mohaamawa wolo mongo wutatumu taabua tao̒lo molonuo̒ dilelio wau mongo walaio. Yio̒ wau mongo wutatumu, deu̒yito-yito kokoo-tawaalo to palitumu o tiilo taulo Het wau tiyamo taulo Amori.

⁴⁶ Tikakaamu yito Samaria totilayo wolo ngoa̒amila kambungulio. Wau waliyalimu yito Sodom to huliaalio wolo ngoa̒amila kambungulio.

⁴⁷ Wolo yio̒ olulia lohilao modudua̒ baa̒ati mongolio wau moo̒baaya huhutu limongolio u moo̒olonuo̒ boito? Diipo! Diilalo ngoolo mola hiheolio yio̒ tumbao̒ lebe kootolo poli woli mongolio.

⁴⁸ Domi Wau̒, Allahu Taa̒ala tatumu-tumulo, tahuda mai lo Eeya Taa Laba-labaalo molanggato, wutatumu Sodom wolo kakaa-mbungulio diipo pee̒enta mao̒ debo odelo leetumu wolo kakaa-mbungumu.

⁴⁹ Sodom wau kakaa-mbungulio botingga sababu o ua̒alo poheetu u dadaata boli mowali tumumulo wolo duo̒duo̒oto wau daame. Bo timongolio diila mopoo̒tuoto taa mosikini wau taa hina.

⁵⁰ Timongolio batingga wau baaa̒ngiolo, boli hemohutu susuu-aliyaalo u yilonuu̒u-U̒. Sababu uito timongolio aantuluwo-U̒ debo odelo u mai̒loo-ntongamu.

^51-52 Memangi Samaria moleeto, bo dusaalio diaaluo ngotayadu wolo duduu-saamu. Pii̒limu lebe moleeta daa̒. Mongo wutatumu taabua debo odelo diila ototala wonu pobandingio mola wolemu. Yio̒ musi molaasa moolito wau hina!”

Sodom wau Samaria mamuli bongulolio

⁵³ Eeya lotahuda ode Yerusalemu, “Sodom wau Samaria boli kakaa-mbunguwalo limongolio mapowaliyo-U̒ muli maa̒amulu. Lapatao̒ uito bolo yio̒ powaliyo-U̒ mai maa̒amulu olo.

⁵⁴ Lou̒ odito yio̒ mamoolito to batangamu lohihilao, wau ohiihinamu mamopo ilaalo tomongo wutatumu deu̒ malo odito piohu paladi mongolio.

⁵⁵ Timongolio wau kakaa-mbunguwalo limongolio mamuli maa̒amulu, wau olo yio̒ wau kakaa-mbungumu.

⁵⁶ Diila mapee̒enta yio̒ helo henteo̒ Sodom tou̒ yio̒ donggo batingga

⁵⁷ wau ololeetumu diipo ilotahua? Botia yio̒ tutuuwauwa wambai̒o wolio; yio̒ mowali pohahaantia̒ taulo Edom, taulo Pilistin wau mongo tiheedumu wewolio tamolonuo̒ olemu.

⁵⁸ Yio̒ musi modutolo akiibati lo huhutuumu u kootolo wau moo̒olonuo̒ boito. Wau̒ Eeya malo tahuda mai.”

Daantia upohu-pohutu u ohiheo-hiheolo mao̒

⁵⁹ Eeya Taa Laba-labaalo molanggato lotahuda, “Yio̒ mapohutuwo-U̒ mai motuuu̒de wolo huhutuumu, sababu yio̒ malomaahe tadiyamu wau lolambanga daantia-U̒ wolemu.

⁶⁰ Bo Wau̒ mamoe̒elai daantia u mapilohutu-U̒ wolemu tomaasa mudamu mai wau mohutu daantia wolemu upohu-pohutu u ohiheo-hiheolo mao̒.

⁶¹ Yio̒ mamoo̒ eela mola to ngoa̒amila huhutuumu wau molaasa moolito tou̒ mongo wutatumu muli powalingo-U̒ mai ode olemu. Timongolio mapowaliyo-U̒ mai debo odelo mongo walau̒mu, eleponu sua̒li boito diila leituwoto todelomo daantia-U̒ wolemu.

⁶² Wau̒ mamohutu mai daantia u bohu wolemu. Yi mao̒taawamu mao̒ deu̒ Wau̒ulo Eeya.

⁶³ Wau̒ mamomaa̒apu mai ngoa̒amila totalaamu, bo yio̒ diila tamowali molipatao̒ wau yio̒ mamolaasa moolito u moloi̒ya penu boli wolo wambai̒o. Wau̒ Eeya Taa Laba-labaalo molanggato malo tahuda mai.”