Biblia Todo Logo
Bìoball air-loidhne

- Sanasan -

YEHESKIEL 13 - KITABI HABARI MOPIOHE


Nubuaati pasali lomongo nabi paaluti

1 Eeya lotahuda mai odelaatia,

2 “Wuu manusia panaa, tumbuloa̒alo mongo nabi lo Isirai̒lu tahipo lapaliyalo lamaalani kalaanganilio lohihilao. Ahuliilo timongolio modungohe tahudaa-U̒.”

3 Eeya Taa Laba-labaalo molanggato lotahuda mai, “Matopotala mongo nabi tamohulodee boito! Potuhata lo Eeya u tilumoodu to hilaalio u lotapulio lonto bayahu bo topikii-langilio lohihilao wau bibilohio paaluti ngoa̒amilalo.

4 Wuu Isirai̒lu, mongo nabimu boito diila ohuna, tutuuwauwa debo odelo sasaa-rigalaalo u tumutumulo to huungo tuodu lokota.

5 Timongolio diila helodaha tataa-mbatiyalo tou̒toonu didii-ngingaalo meeseliilio lolohubu, wau olo diila helo poo̒pioheo̒ didii-ngingaalo meeseli boito. Oditolio, Isirai̒lu diila mowali biintengiyalo wonu bolo mopoo̒ mai popaatea to dulahee Wau̒, Eeya meidungga mai muhukuumani.

6 Bibii-loheyaalo limongolio paaluti wau lalaa-maliyaalo limongolio bo wimbulo wambai̒o. Timongolio momasisi hemodelo tahuli monto ola-U̒, lebe-lebe pomao̒ Wau̒ diila pee̒enta mao̒ helolao olimongolio. Woloolo mola timongolio mowali mohaalapu lamaalani limongolio boito mamotoduo mai?

7-8 Wau̒, Eeya Taa Laba-labaalo molangggato lotahuda mai ode limongolio, ‘Ngoa̒amila bibilohumu boito paaluti wau lalaa-maliimu boito wimbulo. Timongoli hemoloi̒ya deu̒ ngoa̒amila boito yito tahulii-U̒, lebe-lebe pomao̒ Wau̒ diila pee̒enta mao̒ helo tahuda mai ode olemu! Sababu uito Wau̒ mamowali laawanimu.

9 Wau̒ mamo hukuumani mai olimongoli, wuu mongo nabi tahipo lapalia wimbulo wau hemobayahu bo to pikiilangi bibii-loheyaalo! Timongoli diilalo mowali modudua̒ mongohi putuusani todelomo sisii-dangiyaalo umati-U̒. Tataa-nggulumu mainggilolio monto duputari polemboa̒ lo Isirai̒lu, wau timongoli diilalo mohualinga ode huta u pilohuluta mai loduhumu. Yi mao̒taawa limongoli deu̒ Wau̒ulo Eeya Taa Laba-labaalo molanggato.

10 Wuu mongo nabi paaluti! Timongoli malo polapaalo umati-U̒ wolo hipoloi̒yawa deu̒ totoonulalo u hitua-tuawua aamani wau belesi. Lebe-lebe pomao̒ sama-samaata diila! Umati-U̒ malo potihulo dingingo meeseli wolo botu tela u pilopo pasiilio moluwahu, lapatao̒ timongoli lonao̒ mai lomadetao̒ wolo tilo.

11 Wuu, mongo nabi paaluti, dingingo meeselimu mamolohubu. Wau̒ mamopo tuhutai didi polodu. Dingingo meeseli boito mao̒tuhata lodupoto huloyongo wau tembaa lodidi esi

12 tilinggula molohubu, wau timii̒du tau mamohintu wolo hunalio dingingo meeseli boito padetala lotilo.’ ”

13 Eeya Taa Laba-labaalo molanggato lotahuda mai, “To delomo omulukaa-U̒, Wau̒ mamopo dungga mai dupoto huloyongo, didi polodu wau didi esi u mongantulu dingingo meeseli boito.

14 Wau̒ oniyati u mopolohubu dingingo meeseli u piladeta limongoli wolo tilo boito, poa̒a-mbulatilio tilinggula meitolaa pandeminilio wambao̒. Dingingo meeseli boito mamolemba wau momte-mateelo mao̒ olimongoli ngoa̒amila. Yi mao̒taawa limongoli deu̒ Wau̒ulo Eeya.

15 Dingingi meeseli boito wau timongoli tamalo madetao̒ wolo tilo mamolaasa moo̒tihela hapato omulukaa-U̒. Lapatao̒ mapotahudaa-U̒ mai ode olemu deu̒ dingingo meeseli mailooli, tutuuwauwa debo odelo, timongoli talo madetao̒ wolo tilo,

16 wuu mongo nabi paaluti! Timongolio hipolamalia deu̒ Yerusalemu aamani wau belesi, lebe-lebe pomao̒ diila sama-samaata!” Odieelo mola tahuda lo Eeya Taa Laba-labaalo molanggato.


Nubuuati ode nabi mongobua tapaaluti

17 Eeya lotahuda mai, “Botia, wuu manusia panaa, poo̒tuotilo mongobua tahipo tihutua debo odelo nabi taabua towolota lo bangusaamu. Tombulaa̒ailo timongolio,

18 wau potunggula mao̒ wolo u Wau̒, Eeya Taa Laba-labaalo molanggato lotahuda mai ode limongolio: ‘Matopotala timongoli! Timongoli helohutu ode ngoa̒amila lilii-nggitowalo jimati wau kokoo-ludungiyalo aulia alihu taa u mopomake mowali mongaawasa mao̒ tutumulo lotaa wewo. Timongoli motohilaa okawasa to tutumulo wau mate lo umati-U̒, wau kawasa boito pilomake limongoli domi polohuna daa̒ ode batangamu lohihilao.

19 Timongoli malohina ola-U̒ totalu lo umati-U̒ bo u moo̒tapu dengolo onggomo laato wau dengolo pita roti. Tau-tauwalo tadiila ototala, hepilate limongoli yila-yilateelo mao̒ hiambola tau-tauwalo tapaatuti mate hilulia mao̒ limongoli tumutumulo. Lapatao̒ timongoli helo himubulo to umati-U̒ wau timongolio olo yakini tolimongoli.’ ”

20 Eeya Taa Laba-labaalo molanggato lotahuda ode mongobua talotihutu debo odelo nabia boito, “Wau̒ molonuo̒ moo̒onto lilii-nggitowalo jimati u pakepake olimongoli u mongaawasa mao̒ tutumulo wau mate lo umati-U̒. Lilii-nggitowalo boito mahamaa-U̒ monto polotodumu, wau tau-tauwalo takiluwaasa limongoli malopato-U̒.

21 Kokoo-ludungiyalo auliyamu makedengo-U̒, wau umati-U̒ mapoheiyo-U̒ monto aanga lo ololeetumu u ohiheo-hieholo mao̒. Yi mao̒taawa mao̒ limongoli deu̒ Wau̒ulo Eeya.

22 Tau-tauwalo mopiohu tadiila lohuto pilo-pilongola-U̒, hepiloo̒ kikiio̒ limongoli to hilao wolo owimbulumu. Tau-tauwalo tahileeta hepilo udaa̒ mola limongoli tohilao alihu debo odusa wau diila tamoa̒ahu.

23 Botia malo pulito ngoa̒amila bibilohe paaluti wau ngoa̒amila lamaalani lo wimbulumu. Poa̒ahuwo-U̒ umati-U̒ monto aanga lo ololeetumu. Yi mao̒taawa mao̒ limongoli deu̒ Wau̒ulo Eeya.”

Lean sinn:



Sanasan