YEHESKIEL 12 - KITABI HABARI MOPIOHE

Ti Nabi Yeheskiel odelo taa u momeleehi topotalo wau mopoa̒ahu batanga

¹ Eeya luli lotahuda mai odelaatia, tahudaa-Lio,

² “Wuu manusia panaa, yio̒ bilu-biluloa̒ to huungo lo kaumu tamoo-malakalawa. Timongolio omato, bo diila moo̒onto; obulonga, bo diila moo̒dungohu, sababu timongolio motohilaa momalakala.

^3-6 Sababu uito, wuu manusia panaa, tou̒ donggo dulahu podapataalo babaa-langimu todelomo boolula tuwau debo odelo u biasalio hepohutuo lotaa hepilolayahu. Tou̒ hui diipo meidungga tolailo mao̒ belemu lou̒ diila tuua̒ao̒-tuua̒ao̒ debo odelo taa u deloolio ode polayahu. Pohutua mao̒ huwango to dingingo meeseli lo belemu wolo sakusia mao̒ lokaumu tamoo-malakalawa boito, wau delowalo boolula u tuatuanga babaa-langimu boito ode bulemengio molibaya huwango boito. Potaalaalo boolula boito toitaato binggungumu. Pomanggotolo mota tou̒ hui u modio̒lomo; tau̒bilo matomu tilinggula diila oontongamu dalalo u polibayamu. Poluliaalo mao̒ ngoilanggubu bangusa lo Isirai̒lu moo̒onto ngoa̒amila u pohutuomu boito, alihu mowali poe̒ela olimongolio. Otanu timongolio mamongalati deu̒ timongolio yito tamoo-malakalawa.”

⁷ Lapatao̒ pilohutu lowatia palenta lo Eeya odelaatia. To dulahu boitolo, wakutu donggo dulahu pilopo dapato lowatia babaa-langiyalo lowatia todelomo ngoboolula, debo odelo u biasaalio hepohutuo lotaa mopoa̒ahu batanga. Tou̒ mahui mai, watia lohutu mao̒ huwango wolo uluu̒u lowatia to dingingo meeseli lobele laatia, lapatao̒ watia yilumuala lolibaya to huwango boito. Lou̒ piloo̒tuoto lotaa ngoa̒amila, boolula boito pilotaa lowatia to binggungu lowatia, lapatao̒ watia lomonggato.

⁸ Loloombulio mola Eeya lotahuda mai odelaatia, tahudaa-Lio,

⁹ “Wuu manusia panaa, bangusa lo Isirai̒lu, bangusa tamoo-malakalawa boito malohintu mai ode olemu wolo u donggo hekalajaamu.

¹⁰ Sababu uito potunggula mao̒ ode limongolio wolo u Wau̒, Eeya Taa Laba-labaalo molanggato lotahuda ode limongolio. Tahuli-U̒ boito podulungola odeli olongia to Yerusalemu, wau ngoilanggubu ulipu tokota boito.

¹¹ Tombanga mao̒ deu̒ wolo u pohutuwomu boito yito bayahu tou̒ wolo u mamotoduo mai toli mongolio: deu̒yito-yito timongolio mamowali taulo polayahu wau tawatawalo.

¹² To delomo hui u modio̒lomo ti olongia limongolio mamomota boolulalio toitaato binggungio tulusi momonggato. Tau-tauwalo mamohutu huwango to dingingo meeseli alihu tio moo̒ lualai. Tio mamolau̒be matolio tilinggula diila moo̒onto dalalo u polibayaalio.

¹³ Bo Wau̒ mamomua̒de pajala-U̒ u moheu̒pa olio. Lapatao̒ madeloo-U̒ tio ode kota lo Babel, wau mola teto tio maamate lou̒ diila pee̒enta mao̒ moo̒onto kota boito.

¹⁴ Ngoa̒amila tahi tomelea tobele biluluo̒ saaha li olongia, leituwoto tahipo naseehatia wau tamoo-kawalia batanga li olongia boito mapo bubuua̒yaa-U̒ ode totoonulalo tutulio. Timongolio mailapita-U̒ wau patee-U̒ mate-mateelo mao̒.

¹⁵ Tou̒ timongolio pobubuua̒yaa-U̒ ode huungo babaa-ngusawalo wewo to lilii-puwaalo deli, timongolio mamotota deu̒ Wau̒ulo Eeya.

¹⁶ Ngotayade kikiio̒ limongolio mapoa̒ahuwo-U̒ monto popaatea, monto polobiti, wau wembelo lo ngongoto, alihu to huungo babaa-ngusawalo deli boito timongolio mamongalati deu̒ timongolio malohutu u kootolo daa̒. Yi timongolio mamomasisi deu̒ Wau̒ulo Eeya.”

Nabi tahilumehela

¹⁷ Eeya lotahuda mai odelaatia,

¹⁸ “Wuu manusia panaa, pohumuhelo lomola to wakutu yio̒ molamelo, wau potihulu-huluheelo lomola lou̒ moohe tou̒ yio̒ mongilu.

¹⁹ Potunggula mota ode ngoilanggubu bangusa wolo u Wau̒, Eeya Taa Laba-labaalo molanggato lotahuda mai ode ulipu lo Yerusalemu tadonggo hibiluloa̒wa tohuta limongolio. Timongolio mahumuhela tou̒ molamelo wau hulu-huluhelio lou̒ moohe tou̒ mongilu. Huta limongolio mamowali diilalo pobutua lo pilomulo, sababu ngoa̒amila taa u hibiluloa̒wa teto diila obuntoolio helo lambanga butoo̒.

²⁰ Kokoo-tawaalo u botia polupolu wolo ulipu maa aantuluolio wau hahaa-laaboluwalo mamowali huta luasi u delita. Yi otaawalo mao̒ limongolio deu̒ Wau̒ulo Eeya.”

Pohumaya u diila ilohilao wau tahuli u diila ilohilao

²¹ Eeya lotahuda mai odelaatia,

²² “Wuu manusia panaa, yilongola taulo Isirai̒lu motohilaa molapa-lapaali pohumaya botie: ‘Maasa mobuulota, bo nunuu-buatiyalo diila hemeemei dungga mai?’

²³ Naa, potunggula mota ode limongolio deu̒ Wau̒, Eeya Taa Laba-labaalo molanggato, lolametai odie: Pohumaya boito maluluuto-U̒, tilinggula diilalo lapaliyalo to Isirai̒lu. Odelo tuloi̒o polelea mao̒ olimongolio deu̒ masaalio malei dungga, wau timii̒du nubuati mamotoduo mai.

²⁴ To Isirai̒lu madiduu̒ bibilohe meaambo lamaalani paaluti,

²⁵ Wau̒, Eeya Taa Laba-labaalo molanggato mamotahuda mai ode bangusa lo Isirai̒lu, wau ngoa̒amila u potahuda-U̒ mai tantuulo mao̒ mamotoduo, lou̒ diilalo lohu-lohuduolo. Dungohilo, wuu kaumu tamoo-malakalawa! To maasa lo tutumulumu maponao̒o-U̒ ngoa̒amila u pomalenta-U̒ mai olemu. Wau̒, Eeya Taa Laba-labaalo molanggato malo tahuda mai.”

²⁶ Tahuda mai lo Eeya odelaatia,

²⁷ “Wuu manusia panaa, tau-tauwalo Isirai̒lu hipoloi̒yawa deu̒ bibilohe wau nubuatimu boito de mamotoduo mai mohiheo mola daa̒ to dulahee momooli.

²⁸ Sababu uito, polelea mao̒ olimongolio deu̒ Wau̒, Eeya Taa Laba-labaalo molanggato, motahuda mai: Ngoa̒amila u potahuda-U̒ mai tantuulo mamotoduo, lou̒ diilalo lohu-lohuduolo. Wau̒, Eeya Taa Laba-labaalo molanggato malo tahuda mai!”