YEHESKIEL 11 - KITABI HABARI MOPIOHE

Yerusalemu hilukuumani

¹ Lapatao̒ watia bilintao̒ Rohullah wau dilelo-Lio ode huhebu hulubangi Tiimuru to Bele lo Eeya. Mota teto iloontonga lowatia dulo pulaa limo lota, to wolotalio woluo duulota tau̒wa lobangusa, deu̒yito-yito tei Yaa̒janya walae̒e Ajur wolei Palaca walae̒e Benaya.

² Allahu Taa̒ala lotahuda mai odelaatia, “Wuu manusia panaa, uti-utieelo tau-tauwalo tahe momatuju u moleeto tokota botie wau hemongohi nasehati u moo̒lapalo.

^3-4 Masababu uito potunggula mao̒ tahulii-U̒ ode limongolio, wuu manusia panaa. Sababu timongolio hemoloi̒ya, ‘Diilalo mohiheo bebee-leyaalo botie mamuli bongulonto. Kota botie yito ulongo wau ito-itoolo tapu todelomio. Ito maa̒amani monto laalaapo tulu sababu yililunga lo ulongo botie.’ ”

⁵ Lapatao̒ Rohullah lo Eeya lohenggubei olaatia, wau watia ilahula lo Eeya loloi̒ya ode umati lo Isirai̒lu, “Wuu bangusa lo Isirai̒lu, otaawa-U̒ wolo u heloi̒ya limongoli wau u hepatuju limongoli.

⁶ Odito daatalio taa u mapilate limongoli yila-yilateelo mao̒ tilinggula dadaa-lalaalo tokota lopolu wolo milate.

⁷ Sababu uito, Wau̒, Eeya Taa Laba-labaalo molanggato, motahuda mai ode olemu: Memangi, koto botie yito ulongo, bo tapu todelomio diila timongoli, bo milate lotau-tauwalo tamaa pilate limongoli yila-yilateelo mao̒! Hiambola timongoli mapolahi-U̒ lumualao̒ monto kota botie!

⁸ Wolo timongoli moohe to wamilo? Mapodungga-U̒ taa u modelo wamilo mai moluhu olimongoli.

⁹ Timongoli madeloo-U̒ lumualao̒ monto kota wau wuduwo-U̒ ode tau deli. Wau̒ malo podehu mai hukuumani mate olimongoli.

¹⁰ Timongoli maamate todelomo popaatea to lipumu lohihilao, yi mao̒taawa limongoli deu̒ Wau̒ulo Eeya.

¹¹ Oditolio, timongoli diila taa̒amani todelomo kota botie, diila debo odelo tapu todelomo ulongo tuwau. Wau̒ mamohenelaa wau mohukuumani mai olimongoli penu boli tou̒toonu timongoli woluo tolipu lo Isirai̒lu.

¹² Yi mao̒taawa limongoli deu̒ Wau̒ulo Eeya wau timongoli hukuumaniyo-U̒ sababu malo lambanga ngoa̒amila palentaa-U̒ wau lomalonga bubuu-too̒owaalo babaa-ngusawalo to palitumu.”

¹³ Tou̒ watia donggo hemolapali loi̒ya boito, debolo tei Palaca lodehu lomola tulusi yilate. Yi watia olo losujudu lomola wau longiibodu, “Aduu Eeya Taa Laba-labaalo molanggato! Wolo ngoilanggubu labito lo Isirai̒lu botie mapatee lo Eeya mate-mateelo mao̒?”

Danti lo Allahu Taa̒ala ode tahe pilolayahu

¹⁴ Eeya luli lotahuda mai odelaatia,

¹⁵ “Wuu manusia panaa, yio̒ wau mongo sahabatimu todelomo polayahu donggo hepo bibiisalawa lotuango lipu lo Yerusalemu. Uali mongolio, ‘Tau-tauwalo polayahu boito molaminga daa̒ monto Yerusalemu u motabia ode Eeya. Huta lo Isirai̒lu mailohi mai lo Eeya ode olanto.’

¹⁶ Sababu uito, potunggula mota tahulii-U̒ botie ode mongo sahabatimu todelomo polayahu, deu̒ Wau̒ulo talodelo olimongolio lola-lolamingolo mao̒ ode huungo babaa-ngusawalo wau lopopulepe olimongolio to lilii-puwaalo botie. Bo tou̒ timongolio donggo mola teto, Wau̒ mapee̒-pee̒enta woli mongolio.

¹⁷ Wau̒, Eeya Taa Laba-labaalo molanggato, mopoi̒laalo deu̒ Wau̒ mamongambu olimongolio monto lilii-puwaalo to tambati ilopulepea limongolio, lapatao̒ muli mopo walingao̒ huta lo Isirai̒lu ode limongolio.

¹⁸ Wonu timongolio mohualingo, timongolio mamolapi ngoa̒amila balaahala u kootolo wau moo̒olonuo̒ u ilodungga limongolio.

¹⁹ Timongolio mawohiya-U̒ hale u bohu wau watade u bohu. Hale limongolio udebo odelo toheeto botu mahamaa-U̒ wau tuloa̒a-U̒ wolo hale u modungohe to Olau̒.

²⁰ Yi timongolio mamodungohe ngoa̒amila wuu̒udu-U̒. Timongolio mamowali umati-U̒ wau Wau̒ mowali Allahu Taa̒ala limongolio.

²¹ Bo tau-tauwalo tamotohilaa molubo babaa-laahalaalo takootolo wau moo̒olonuo̒ mahukuu-maniyo-U̒ sababu pii̒li limongolio u moleeta boito.” Odi-odieelo mola tahuda mai lo Allahu Taa̒ala Taa Laba-labaalo molanggato.

Allahu Taa̒ala lololaa Yerusalemu

²² Mamaa-lai̒katiyalo opolipio̒ boito malo lumula tilumomboto wau loloo-dawaalo olo tunutunuhe. Tinelo molilingga u lopoi̒laalo mai owoluo lo Eeya woluo toitaati mongolio.

²³ Lapatao̒ tinelo molilingga boito lololaa Yerusalemu wau lolimbata mola ode hui̒du to ambahu tiimuru lokota boito.

²⁴ To delomo bibilohe boito, Rohullah lomintao̒ mota olaatia ode tau-tauwalo tahe pilolayahu to Babel. Lapatao̒ yilooli lomola bibilohe boito.

²⁵ Lapatao̒ watia lohungguli mao̒ ode tau-tauwalo tahe pilolayahu ngoa̒amila u pilopo bilohei lo Eeya odelaatia.