YEHESKIEL 10 - KITABI HABARI MOPIOHE

Eeya lololaa mao̒ Bele-Lio

¹ Lapatao̒ watia lomilohe mola ode kuba uwoluo toitaato lo mamaa-lai̒katiyalo opolipio̒ boito, wau iloontonga lowatia hitua-tuawua udebo odelo tambati huhuloa̒ li olongia lonto botu nilamu.

² Lapatao̒ Allahu Taa̒ala lotahuda ode taa u pakepake lineni boito, “Tuwotoolo to wolota lo loloo-dawaalo uwoluo to walungo lo mamaa-lai̒katiyalo opolipio̒ boito, wau pohama mai ngoonggomo bohu lotulu. Lapatao̒ pomua̒yade mota bohu boito toitaato kota.” Tio loduduo̒, wau watia lopoo̒tuotao̒.

³ Tou̒ tio tilumuwotai, mamaa-lai̒katiyalo opolipio̒ boito donggo hitihula to ambahu huliaalio Bele lo Eeya. Ngobongga heengo lopoo̒opolu palepelo delomio wau ngoilanggubu Bele lo Eeya.

⁴ Tinelo molilingga u tuotio owoluo lo Eeya lotinelai lonto mamaa-lai̒katiyalo opolipio̒ boito wau lolimbata ode huhebu potuwotalo Bele lo Eeya, tilinggula palepelio lowali lobaango-baangolo mao̒.

⁵ Tingohu oa̒abu polipio̒ lo mamaa-lai̒katiyalo opolipio̒ boito odungohe demota palepelo bulemengio, debo odelo suala lo Allahu Taa̒ala Taa Laba-labaalo kawasa.

⁶ Lapatao̒ Eeya lopoa̒hu taa u pakepake lineni boito lohama mai ngoonggomo bohu lotulu towolota lo loloo-dawaalo towalungo mamaa-lai̒katiyalo opolipio̒ boito, tau boito tilumuwotao̒ wau tilimihula totili lo tala tuwau lonto loloo-dawaalo boito.

⁷ Lapatao̒ tala tuwau lo malai̒kati opolipio̒ boito lopo tuwotao̒ uluu̒lio ode delomo tulu uwoluo to huungi mongolio, lomuluta dengolo pita bohu, wau longohi mao̒ ode taa u pakepake lineni boito. Tau boito lololimo lapatao̒ lonao̒.

⁸ Watia loo̒onto deu̒ to walungo polipio̒ lo timii̒du malai̒kati opolipio̒ boito woluo hitua-tuawua u moodelilio uluu̒ lomanusia.

^9-10 Watia loo̒onto olo deu̒ mamaa-laikatiyala opolipio̒ boito tinggai oloda tuwau totiliilio. Opaato loda boito tutuuwauwa, wau intamao̒-intamao̒ debo odelo polioto u gaaga. Tinggai oloda tuwau wolo uwewolio ubula-bulawahu to huungio.

¹¹ Lou̒ odito mamaa-lai̒katiyalo opolipio̒ boito mowali motidulunga ode opaato mantahu. Timongolio mowali monao̒ penu boli deu̒toonu otohilaa limongolio, lou̒ diila moloyonga wawaai̒o.

¹² Ngoilanggubu wawaai̒ mongolio, uluu̒lio, polipii̒o wau loloo-dawaalo olo polupolu wolo mato.

¹³ Ilodungohe lowatia deu̒ loloo-dawaalo boito ilunteelio “dupoto huloyongo”.

¹⁴ Timii̒du malai̒kati opolipio̒ boito obaya wopato u hiwewo-wewooa. Baya u bohulio yito baya losapi oa̒ayua, u oluolio baya lomanusia, u otolulio baya losinga, u opatio baya lo rajawali.

^15-17 Mamaa-lai̒katiyalo opolipio̒ boitolo u omoo̒omolu iloontonga lowatia tobiihu Dutulaa Kebar. Timii̒du mamaa-lai̒katiyalo opolipio̒ boito umoliyoo̒ meaambo mongoa̒be polipii̒o, mobotula mola ode dulente wau tumomboto momaju meaambo mohuheli, loloo-dawaalo boito laito moduduo̒, sababu kiluwaasa lo mamaa-laikatiyalo opolipio boito.

¹⁸ Lapatao̒ tinelo molilingga u tuotio owoluo lo Eeya lololaa mao̒ huhebu potuwotalo Bele lo Eeya wau lolimbata ode yitaato mamaa-lai̒katiyalo opolipio̒ boito.

¹⁹ Watia loo̒onto mamaa-lai̒katiyalo opolipio̒ boito longoa̒be polipii̒o wau tilumomboto lololaa mao̒ huta tulusi lonao̒, wau loloo-daalio loduduo̒. Lapatao̒ timongolio lohuheli totili lo huhebu hulubangi Bele lo Eeya u to ambahu tiimuru, hiambola tinelo molilingga debo toitaati mongolio.

²⁰ Watia loo̒ eela mola deu̒ uitoolo mamaa-lai̒katiyalo opolipio̒ u omoo̒omolu iloontonga lowatia woluo to walungo Allahu Taa̒ala lo Isirai̒lu, tobiihu Dutulaa Kebar.

²¹ Mamaa-lai̒katiyalo opolipio̒ boito tinggai obaya wopato, dulo panggalo polipio̒, wau olo hitua-tuawua u debo odelo uluu̒ lomanusia to walungo popoo-lipio̒owalo boito.

²² Baya limongolio mobaayawa olo wolo baya lo mamaa-lai̒katiyalo opolipio̒ u iloontonga lowatia tobiihu Dutulaa Kebar. Tinggai monao̒ motulidu ode talu.