YEHESKIEL 1 - KITABI HABARI MOPIOHE

TEI YEHESKIEL LOO̒TODUO BIBILOHU BOHULIO PASALI LO ALLAHU TAA̒ALA 1:1–7:27 Tambati huhuloa̒ lo Allahu Taa̒ala

^1-3 To dulahu olimolio hulala opatio to taunu otolo pulu, to delomo taunu olimolio tumulalo mai ti Olongia Yoyakhin bilintai̒o mota ode polayahu, watia, Iimamu Yeheskiel walae̒e Busi, woluo tobiihu Dutulaa Kebar to Babel wolo tau-tauwalo polayahu lo Yahudi wewolio. Debolo hulungo lohuo̒olo mola wau watia loo̒toduo mai bibilohu pasali lo Allahu Taa̒ala. Watia loo̒dungohe Eeya lotahuda mai odelaatia wau watia lolaasa lolotolo lomola wolo kawasaa-Lio.

⁴ Watia lomilohe wau loo̒onto dupoto moo̒ohuu̒ lohiipo lonto tilayo. Ilato dedeehita lonto ngobongga heengo uleidaa̒ tutu, wau hulungo to palitio lotinela daa̒. To delomo ilato u lopolualo tinelo daata-daatalo mao̒ boito oontonga hitua-tuawua u ulimilato debo odelo polunggu.

⁵ To huungo heengo boito, iloontongalowatia lowatia wopato malai̒kati opolopio̒ duu̒yito-yito mahaluku tumutumulo udebo odelo manusia,

⁶ bo tinggai obaya wopato dulo panggalo polipio̒.

⁷ Oa̒atio motulidu wau molilingga debo odelo polunggu u ilii̒ito. Tingongoa lo oa̒atio oluo̒obu debo odelo luo̒obu sapi lo a̒ayua.

⁸ Ngopohia baya wopato wau dulo panggalo polipio̒ boito, timongolio o uluu̒ manusia towalungo lo timii̒du polipio̒.

⁹ Ngopanggalo polipio̒ lo timii̒du mahaluku boito oa̒oa̒abu wau huuhuudio dedeenggula wolo polipio̒ mahaluku u wewo, tilinggula opaato mahaluku boito lohutu mao̒ tutulio wopato. Wonu umoliyoo̒, timongolio tinggai umoliyoo̒ motulidu ode talu lou̒ diila mopobale lo wawaai̒o.

¹⁰ Timii̒du mahaluku boito obaya wopato u hiwewo-wewooa; baya lomanusia totalu, baya losinga to ambahu olowala, baya sapi lo oa̒ayua towimbihu oloihi, wau baya lo rajawali towimbihu wulea.

¹¹ Ngopanggalo polipio̒ monto timii̒du mahaluku boito iloa̒abu ode yitaato tilinggula lodenggula popoo-lipio̒waalo mahaluku to ngotualiilio, wau ngopanggalo polipii̒yo poli lupilupi lolau̒ube wawaai̒o.

¹² Mahaluku boito tinggai talutalu ode opaato tutulio pee̒entalo mao̒, tilinggula timongolio mowali monao̒ penu boli deu̒toonu otohilaa limongolio lou̒ diila mopobale lo wawaai̒o.

¹³ To huungo mamaa-halukuwalo boito woluo hitua-tuawua u oontonga debo odelo bohu lotulu meaambo tohe lei̒lei̒ita u oli-oliyoa̒ diila ohuheliilio. Tulu boito tinelao̒-tinelao̒ wau hemopo molotia̒ ii̒i-latowaalo bulonggodu.

¹⁴ Mamaa-halukuwalo boito lohihilao loo̒liyoo̒ helebe odia mai debo odelo linggahu ilato.

¹⁵ Tou̒ watia hemo poo̒tuotao̒ ngoa̒amila boito, iloontonga lowatia wopato loda toitaato huta, loda tuwau totili lo timii̒du mahaluku boito.

¹⁶ Opaato loda boito mohaamawa wau inta mao̒ inta mao̒ debo odelo botu poliyoto, wau tinggai oloda tuwau wewolio ubula-bulawahu to huungio.

¹⁷ Lou̒ odito loloo-dawaalo boito mowali motidulunga ode opaato mantahu.

¹⁸ Liliing-galiyalo loda boito polupolu wolo mato.

^19-21 Mamaa-halukuwalo boito monao̒ penu boli deu̒toonu otohilaa limongolio, wau loloo-dawaalo boito laito moduduo̒, sababu kiluwaasa lo mamaa-halukuwalo boito. Timii̒du mamaa-halukuwalo boito umoliyoo̒ mobotula ode dulente meaalo mohuheli, loloo-dawaalo boito laito modudua̒ woli mongolio.

²² Toitaato lunggongo lo mamaa-halukuwalo boito bua̒bua̒du hitua-tuawua udebo odelo kuba wau kristali u inta mao̒ inta mao̒.

²³ To walungo kuba boito timii̒du mahaluku boito lomua̒ade polipii̒yo ngopanggalo ode mantahu mahaluku u to ngotualiilio, hiambola polipii̒o u ngopanggalo poli molau̒be wawaai̒o.

²⁴ Wonu timongolio tumomboto, watia moo̒dungohe suala oa̒bu lo polipii̒yo; tingohio debo odelo bulontungo taluhe podehu, debo odelo hulopao̒ lo diambango pasuukani suludadu uleidaa̒, debo odelo suala lo Allahu Taa̒ala Taa Laba-labaalo kawasa. Wonu timongolio mohuheli tumomboto, timongolio molupi mao̒ popoo-lipiii̒yo,

²⁵ bo monto yitaato kuba u toitaato lunggongi mongolio, donggo odungohe tingohu suala.

²⁶ Toitaato kuba boito woluo hitua-tuawua u debo odelo tambati huhuloa̒ li olongia monto botu lo nilamu, wau toitaatio hulohuloo̒ hitua-tuawua u oontonga mao̒ debo odelo manusia.

²⁷ To wimbihu yitaatio oontonga motinelo debo odelo polunggu to huungo lei̒ito tulu. Wimbihu walungio motinelo mobaanga daa̒,

²⁸ wau o tumba hidala-dalaala debo odelo duhi lobutu. Ui-uitoolo baango inta mao̒ inta mao̒ u mopobilohei owoluo lo Eeya. Loo̒onto mao̒ uito, watia lodehu leibalata mola tohuta. Lapatao̒ ilodungohe lowatia suala u