YAKOBUS 5 - KITABI HABARI MOPIOHE

Poe̒ela ode tau-tauwalo tahi kayawa

¹ Mongo wutato, tau-tauwalo tahi kayawa! Dungohi mao̒ naseehati lowatia. Mamusi timongoli humoyongo wau mohilimuta sababu timongoli mamodutolo sikisa.

² Okokayamu malo hutodu. Pakeyangimu mai̒liila lowale.

³ Hulawa wau talaa̒mu matilau̒be lotaato; taatio mamowali sakusi moluwali olimongoli wau maa aloolio mopulito batangamu debo odelo tulu. Timongoli malomuntu halata tojamani mapulitio.

⁴ Timongoli diila hemo mayali wuupa lotau-tauwalo tahemo kalaja to halabolumu. Botia dungohilo poloi̒laalo suusa limongolio! Tau-tauwalo tahipo himoa̒ tilapula lo halabolumu hiwatia̒ mei̒ tulungi wau wuwaatii̒ mongolio mai̒lo dungohe lo Allahu Taa̒ala, Eeya Taa Laba-labaalo kawasa.

⁵ Timongoli matilumumulo lebe lou̒ woluo wau maloo̒laasa osanangi todunia botie. Timongoli debo odelo donggo hemo poo̒lingohu batanga duo̒lo dulahe pongolotalo.

⁶ Timongoli hemo hukuumani wau momate-mateelo mao̒ tau-tauawalo tadiila ototala, wau timongolio diila moluwali olimongoli.

Osabali wau dua̒

⁷ Sababu uito, posabalilo mola Mongo wutatuu̒, dilumutu Eeya meidungga mai. Bilohilo woloolo mola sabaliilio tamoomengia ngota mohima dilumutu hutalio mongohi tilapulo u ohalaga olio. Wolo sabali tio mohima didi losembo polodehua wau didi sembo lobunga.

⁸ Mamusi timongoli olo mosabali wau ohilaa daa̒, sababu dulahe podudungga mai lo Eeya malembidu.

⁹ Diila mao̒ potihungoto wau tinggai mopotala, alihu timongoli diila hukuumanio lo Allahu Taa̒ala. Eelai mao̒! Hakimu malembidu, dapadapato u meidungga mai.

¹⁰ Mongo wutato, eelai mola mongo nabi tahelo bisala totanggulo Eeya. Timongolio sabali wau taaba helo dutolo. Oditolio, hamaalo mao̒ timongolio odelo obaaya.

¹¹ Timongolio ilunte sanangi tutu sababu timongolio taaba. Timongoli maloo̒ dungohe pasali osabali lei Ayuba, wau otaawa limongoli woloolo mola Eeya tou̒ pulitio lobalakati olio. Sababu lodehu daa̒ hilaa lo Eeya wau mopiohe hale.

¹² Ulebe polohuna daa̒, deu̒ito-yito: Diila mao̒ potadia, mopio domi hulungo, meaalo domi dunia, meaalo penu boli domi wolo wambai̒o. Loi̒yaalo mao̒ “Joo” wonu patujumu joo, wau “Diila” wonu patujumu diila; alihu timongoli diila mao̒ podehuwalo hukuumani lo Allahu Taa̒ala.

¹³ Wonu to wolotamu woluo tadonggo suusa, mamusi tio modua̒. Wonu woluo tameengahe, mamusi tio mopolahu mola momuji Allahu Taa̒ala.

¹⁴ Wonu woluo tamo ngongoto, mamusi tio motianga mongo tau̒wa lojamaa̒. Wau mamusi mongo tau̒wa boito modua̒ mola totaa mongongoto boito wau moleaapu wolo winulo to tanggulo Eeya.

¹⁵ Wonu dua̒ limongolio potunggulo wolo yakini, Eeya mamo poo̒luli mai tamo ngongoto boito, wau mongambungu duduu-sawaalo u mapilo hutulio.

¹⁶ Sababu uito, mamusi timongoli mongaa-ngaakua totala wau moduu-duua̒wa mola, alihu timongoli poo̒luli-Lio mai. Dua̒ lotaa umodudua̒ u otohilaa lo Allahu Taa̒ala okawasa daa̒.

¹⁷ Tei Elia tutuuwauwa wolo manusia debo odelo ito. Tio helodua̒ lou̒ tio̒otutua alihu didi diila modehu mai, yi didi olo diila lodehu ngotilonggadu tolo taunu wau ngoputu hiheolio.

¹⁸ Lapatao̒ tio luli lodua̒ mola, tulusi hulungo lopo tuhutai didi tilinggula huta lopowoluo mai tilapulio olo.

¹⁹ Mongo wutatuu̒! Wonu to wolotamu woluo tahingo-ngotaawa tadiilalo modudua̒ pongaajali monto Allahu Taa̒ala tulusi ngotaalio wewo mohutu mao̒ tau boito muli mohualinga ode Allahu Taa̒ala,

²⁰ eelai mao̒ ayati botie: Taa u mohutu mao̒ taa odusa muli mohualingai monto dalalio u talatala, tau boito mopoa̒ahu jiwa lotaa odusa boito monto opopate wau moo̒sababu daata lodusa ambunguolo. Hulumati lamiaatia, Yakobus 12