YAKOBUS 3 - KITABI HABARI MOPIOHE

Dila lomanusia

¹ Mongo wutato! Diila mao̒ podaatawa to wolotamu tamohuto mowali guru. Otaawa limongoli deu̒ ito tamowali guru mabutoo̒lio lebe moo̒ohuu̒ wolo taa wewo.

² Ito ngoa̒amila laito hemohutu totala. Bo taa diila pee̒enta mao̒ helohutu totala wolo loloo-iyaalio, tio taa u wimu-wimumuto tutu, tamoo̒ kawasa ngoilanggubu batangalio.

³ Wonu ito mopohuli lo tongguu̒mo to tunggilo wadala alihu wadala boito modudua̒ u otohilaanto, yi ito mowali mongatulu ngoa̒amila wawao̒ wadala boito.

⁴ Hamaawa mao̒ olo kaapali odelo obaaya. Eleponu kaapali yito tuwaulio u odito udaa̒ wau dilelo lodupoto moo̒ohuu̒, bo kaapali boito podulungo lokamudi ukikiio̒ daa̒, modudua̒ u otohilaa lo julumudi.

⁵ Odito olo wolo dilanto; eleponu dilanto boito kikiio̒, bo dila boito mowali mopo sombongi batanga pasali lo susuu-aliyaalo u duduulaa̒. Nte pikiilangia mola malo odito udaa̒lio oa̒yua u mowali tumbila lotulu ukikiia̒ daa̒!

⁶ Dila tutuuwauwa wolo tulu. To batanganto, dila debo odelo bungo lou̒ moleeto u mopoloo̒po u moleeto ode ngoilanggubu lo batanganto. Wolo tulu u asaliilio mai monto nalaka, tio moo̒pobu ngoilanggubu tutumulonto.

⁷ Totoonulalo binatangi mongantau u hidala-dalaala, bulungi, binatangi hia̒lapa wau tola mowali poluwamolo, wau olo mapilo luwamo lomanusia.

⁸ Bo dila lomanusia diila mowali poluwamolo penu boli lo tatoonu. Dila boito moleeto wau diila mowali kawasaalo; polupolu lopeedi umoo̒pate.

⁹ Ito mopohuna mao̒ dila u molapali oduo̒lo ode Eeya wau ti Paapanto, bo olo u molaa̒nati ngota timongotanto tamaa pilowali-Lio mai lodudua̒ gambali lo Allahu Taa̒ala.

¹⁰ Monto tunggilo u tutuuwauwa lumualai tataa-heyaalo oduo̒lo wau olo tataa-heyaalo laa̒nati. Patutilio diila odito!

¹¹ Tingga woluo butu lotaluhu umopo pentelai taluhe udiila olamita wau taluhe u mopaa̒ato monto ali u tutuuwauwa?

¹² Bungo lo ara, Mongo wutatuu̒, diila mowali momungo mai hungo lojaituni, wau bungo lo angguru diila mowali momungo mai hungo lo ara. Butu lotaluhe u mopanggelo diila mowali olo mopolualai taluhe diila olamita.

Tinepo udungga-dungga mai monto yitaato

¹³ Wonu to wolotamu woluo taa molinepo wau obudi, mamusi tio mopo biloheo̒ wolo tutumulo mopiohe wau lou̒ mohutu susuu-aliyaalo umopiohe, wau tunutunuhu lohilao dupadupapa wau tinepo.

¹⁴ Bo wonu timongoli mohiihia, mopalato hilao, wau mopolohuna daa̒ batanga lohihilao, diila mao̒ pomanggawa tinepo boito, sababu woleeto timongoli mopo boboolio̒ habari u otutu monto Allahu Taa̒ala.

¹⁵ Tinepo debo odelo uito asaliilio mai diila lonto sologa. Bo asaliilio mai lonto dunia, lonto napusu lomanusia, wau lonto lati!

¹⁶ Tou̒toonu ohilao mohiihia wau pii̒li mopolohuna daa̒ batanga lohihilao, teto olo woluo tolonggalo wau totoonulalo huhutu u moleeto.

¹⁷ Bo taa o tinepo u asalilio mai monto yitaato, tio tabohu-bohulio daa̒ belesi, lapatao̒ ohilaa modaamea, mopiohe hale, wau tamoo-dungohea. Odehu hilaalio lealeaatu wau mongohi tilapulo tou̒ totoonulalo huhutu u mopiohe. Tio diila motiwambao̒ wau diila munapiki.

¹⁸ Memangi opopiohe yito hungo lou̒ dame upilo mua̒yadu lotaa ohilaa dame!