YAHYA 5 - KITABI HABARI MOPIOHE

Huhutu u mopoo̒luli tokulamu lo Betesda

¹ Lapatao̒ uito woluo lameyangi lo Yahudi, yi ti Isa lonao̒ mola ode Yerusalemu.

² To Yerusalemu totili “Huhebu lo Himba” woluo kulamu tuwau, u todelomo bahasa lo Ibrani iluntee Betesda. Mota teto woluo sulambe mohelu limo.

³ To susuu-lambeyalo boito dadaata taa mongongoto hibalata; woluo taapitoo̒, woluo taapenggo, wau woluo tadidu mowali monao̒. [Timongolio ngoa̒amila hipo himawa taluhu tokulamu boito mobuo̒lai.

⁴ Sababu tingga maito malai̒kati lo Eeya motuhutai ode delomo kulamu boito wau mopo buo̒lai taluhio. Wau tahi ngongota tabohulio tumuwoto ode delomo kulamu boito tou̒ taluhio donggo mobuo̒lo mamoluli penu boli ngongota wolo u hedutolalio.]

⁵ Totambati boito woluo talolai̒ ngota u ngongotio matolo pulaa walu lotaunu hiheolio.

⁶ Ti Isa loo̒onto olio balabalata mola teto, wau otaawa li Isa deu̒ tio malohiheo daa̒ mongongoto; yi ti Isa malohintu olio, “Mohuto yio̒ moluli?”

⁷ Taa mongongoto boito lolametao̒, “Paaa̒, diaaluo taatewe umopo tuwotao̒ olaatia ode delomo kulamu tou̒ taluhio mobuo̒lai. Wau tou̒ watia mao̒de kulamu, taawewo maa tilumuwoto leimulo.”

⁸ Yi ti Isa lotahuda mao̒ olio, “Bongulo mola, bintaa̒alo amongumu wau ponao̒lo.”

⁹ Tou̒ boitolo olo tau boito loluli. Tio malo mintaa̒ amongio wau lonao̒. Sua̒li boito lotoduo mai todulahu Saabati.

¹⁰ Sababu uito tahidihima kawasa lo Yahudi malo loi̒ya totaa boheli loluli mao̒ boito, “Dulahu botie dulahu Saabati. Yio̒ diila mowali momintaa̒ amongumu.”

¹¹ Bo tau boito lolametao̒, “Taa u lopoo̒luli mai olaatia engonti boito talo poa̒hu olaatia lomintaa̒ amongo lowatia wau loponao̒.”

¹² “Tatoonu Tio talo poa̒hu olemu lomintaa̒ amongumu wau lononao̒?” yilintu mao̒ limongolio.

¹³ Bo tailoluli boito diila lotota tatoonu taulio, sababu ti Isa mailooli lomola towolota lotaa dadaata boito.

¹⁴ Lapatao̒ ti Isa lodunggaya wolo tau boito todelomo Bele lo Eeya, wau lotahuda mao̒ olio, “Botia yio̒ maloluli. Diilalo pohutu dusa, alihu yio̒ diila moo̒laasa mai sua̒li ulebe moleetao̒.”

¹⁵ Yi malonao̒ tau boito lapatao̒ lopoo̒taa to tahidihima kawasa lo Yahudi deu̒ ti Isaalo talo poo̒luli olio.

¹⁶ Wau sababu uito timongolio mahipo tolopania mopoo̒suusa li Isa, sababu Tio lopoo̒luli tau todulahu Saabati.

¹⁷ Boti Isa lotahuda mao̒ olimongolio, “Allahu Taa̒ala debo hemo kalaja tunggula botia, wau Wau̒ olo musi mokalaja.”

¹⁸ Tahuda boito maloo̒ sababu to tahidihima kawasa lo Yahudi lebe mao̒ hipo tolopania u momate o-Lio mate-mateelo mao̒. Timongolio lohutu uito, diila bo sababu u Tio lolambanga wuu̒du lo agama tomimbihu dulahu Saabati, bo olo kalana Tio malo tahuda deu̒ Allahu Taa̒ala boito ti Paapa-Lio; boliilio mao̒ Tio mopo tutuuwauwa batanga-Lio wolo Allahu Taa̒ala.

Okakawasa lo Walao̒

¹⁹ Ti Isa lolametao̒ ode tau-tauwala boito odie, “Pomalacayalo, Walao̒ diila mowali mohutu wolo-wolo, wolo kawasaa-Lio lolohilao. Tio bo mohutu wolo u iloontonga-Lio pilohutu li Paapa-Lio. Sababu wolo u pilohutu li Paapa-Lio, uito olo u pohutuo lo Walao̒.

²⁰ Sababu Allahu Taa̒ala lomonu to Walao̒ wau lopobilohei o-Lio ngoa̒amila u pilohutu-Lio lohihilao. Tumbao̒ Allahu Taa̒ala mamopo bilohei o-Lio totoonulalo huhutu ulebe udaa̒ mao̒ poli tilinggula timongoli molinggolabe.

²¹ Allahu Taa̒ala boito mopobongu mai taamate, wau mongohi olimongolio tutumulo ututuulio tutu wau ohiheo-hiheolo mao̒; odito olo Walao̒ mongohi mai tutumulo u ohiheo-hiheolo mao̒ totaa mohuto wohia-Lio tutumulo.

²² Allahu Taa̒ala lohihilao diila momutoo̒ boli olita. Ngoa̒amila kawasa u momutoo̒ mailudu-Lio to Wala-I̒o.

²³ Allahu Taa̒ala lohutu uito alihu ngoa̒amila tau mohulumati to Walao̒ debo odelo timongolio mohulumati to Allahu Taa̒ala. Taa diila mohulumati to Walao̒ diila mohulumati olo to Allahu Taa̒ala tamalolao mai to Walao̒.

²⁴ Otutu banali totoonulalo tahudaa-U̒ botie: Taa umopoo̒ tuotao̒ totoonulalo tahudaa-U̒, wau palacaya o-Lio talolao mai ola-U̒, o tutumulo ututuulio tutu wau ohiheo-hiheolo mao̒. Tio diila tahukuu-maniyolo; tio malo lopato lonto opopate wau loo̒tapu tutumulo.

²⁵ Pomalacayalo: Mamei dungga wakutuulio – tumbao̒ malei dungga wakutuulio – taamate mamo dungohe suala lo Walao̒ Allahu Taa̒ala. Wau taa modungoheo̒ matumumulo.

²⁶ Debo odelo Allahu Taa̒ala lohihilao bungo lo tutumulo, yi Tio olo mopowali mai wala-I̒o bungo lotutumulo.

²⁷ Tio malohudu ode wala-I̒o haku u momutoo̒, sababu Tio Walao̒ Manusia.

²⁸ Diila mao̒ polinggolabu timongoli modungohe sua̒li botie, sababu wakutuulio mamei dungga deu̒ ngoa̒amila taa mailate modungohe sualaa-Lio,

²⁹ lapatao̒ lumualai monto kuubulu. Taa malohutu u mopiohe mamobongu mai ode tutumulo. Bo taa malohutu u moleeto mamobongu mai u hukuu-maniyolo.”

Bubuu-kutiyalo pasali li Isa

³⁰ “Wau̒ diila mowali mohutu wolo-wolo modudua̒ otohilaa-U̒ lohihilao. Wau̒ bo momutoo̒ motuuu̒de lou̒ wolo u pilomalentai lo Allahu Taa̒ala. Wau putuusani-U̒ aadili, sababu Wau̒ diila modudua̒ u otohilaa-U̒ lohihilao, bo wambao̒ u otohilaa lo Allahu Taa̒ala talolao mai ola-U̒.

³¹ Humayaalio Wau̒ mongohi mai sakusi pasali lobatanga lohihilao, diila mowali palacayalo.

³² Bo woluo taawewo tamongohi sakusi tomimbihu ola-U̒, wau otaawa-U̒ deu̒ u silakusialio boito otutu.

³³ Timongoli malolao utolia odelei Yahya, wau tio malongohi sakusi ubanali tomimbihu ola-U̒.

³⁴ Sua̒li botie tahudaa-U̒ mai, diila bo sababu Wau̒ momalalu sakusi monto manusia, bo alihu timongoli poa̒ahuwolo.

³⁵ Tei Yahya boito debo odelo tohe ulei̒-lei̒ita wau mopo bulilangai lotilango. U ngopee̒ mola wakutu timongoli sanangi mololimo tinelio boito.

³⁶ Bo u silakusiya-U̒ lebe udaa̒ mao̒ lou̒ silakusia lei Yahya. Wolo u masaatia pilohutu-U̒ botie, deu̒ito-yito kalaja u pilotuugasi mai li Paapa ola-U̒, u mopobukuti deu̒ ti Paapa malolao mai ola-U̒.

³⁷ Wau ti Paapa talolao mai ola-U̒ olo longohi sakusi pasali ola-U̒. Timongoli diipo pee̒enta mao̒ lodungohe sualaa-Lio meaalo loo̒onto baya-Lio.

³⁸ Tataahe-Lio diila leitahu todelomo hilaamu sababu timongoli diila palacaya to ola-U̒ tailao-Lio mai.

³⁹ Timongoli mopoo̒olato kitabi sababu helantobu limongoli deu̒ wolo dudelo boito timongoli otutumulo ututuulio tutu wau ohiheo-hiheolo mao̒.

⁴⁰ Bo timongoli diila motohilaa monao̒ mai ode ola-U̒ u moo̒tapu tutumulo ohiheo-hiheolo mao̒.

⁴¹ Wau̒ diila mololohe poloi̒laalo momuji monto manusia.

⁴² Oonuhe-U̒ timongoli. Otaawa-U̒ timongoli diila motolia̒nga to Allahu Taa̒ala todelomo hilaamu.

⁴³ Wau̒ dungga-dungga mai wolo kawasa li Paapa-U̒, bo timongoli diila mololimo ola-U̒. Bo wonu taawewo dungga-dungga mai wolo kawasaalio lohihilao, timongoli motohilaa mololimo olio.

⁴⁴ Woloolo mola timongoli moo̒ palacaya, wonu timongoli bo ohilaa mei̒puji monto timongotamu, wau diila motolopani u moo̒tapu poloi̒laalo momuji monto Allahu Taa̒ala u Tuwa-tuwaulo?

⁴⁵ Diila mao̒ polantobu Wau̒ mamopotala olimongoli totalu lo Allahu Taa̒ala. Tumbao̒ tamaa mopotala olimongoli yito tei Musa.

⁴⁶ Humayaalio timongoli palacaya olei Musa, timongoli mapalacaya to ola-U̒, sababu pasali-U̒lo tunggula tio loluladei.

⁴⁷ Bo wonu timongoli diila palacaya tou̒ wolo u tiluladio lei Musa, woloolo mola timongoli moo̒ palacaya tou̒ wolo upilo tahudaa-U̒ mai?”