YAHYA 2 - KITABI HABARI MOPIOHE

Potihunggu lonika to Kana

¹ Duuhui mola lapatio mao̒ woluo potihunggu lonika tokota Kana to Galilea, wau tiilo li Isa woluo mola teto.

² Ti Isa wolo tahidudua̒ o-Lio tiloduwolio olo ode potihunggu boito.

³ Tou̒ angguru malo pulito, tiilo-Lio loloi̒ya mao̒ odeli Isa, “Timongolio mai̒lo pulita lo angguru.”

⁴ Ti Isa lolametao̒, “Maama, diila mao̒ ahuli Watia. Diipo leidungga wakutuulio Watia mopoi̒laalo batanga.”

⁵ Bo tiilo li Isa loloi̒ya mao̒ to tahi pohintawa, “Wambao̒ pohutuwalo wolo u mapilo tahuda-Lio olemu.”

⁶ Teto woluo mohelu wolomo tombe upilohetu odelo tambati pongulowalo modudua̒ uu̒udu lo Yahudi. Timii̒du tombe boito tuangio tanu ngohetuto liiteri.

⁷ Ti Isa lotahuda mao̒ to tahi pohintawa boito, “Tuangi mao̒ timii̒du tombe boito wolo taluhu.” Yi matiluanga limongolio tombe boito tunggula lopolu.

⁸ Lapatao̒ ti Isa lotahuda mao̒ ode limongolio, “Botia hamaawa mao̒ taluhu boito ngoi̒di wau delowa mai ode tau̒wa lo potihunggu. Timongolio malodelo taluhu boito ode tau̒wa lo potihunggu.”

⁹ Wau tio lolamitao̒ taluhu umalo bolio̒ lowali angguru. (Diila otaawalio lonto utoonu angguru boito, bo tahi pohintawa talo luango taluhu boito tamotota). Yi tau̒wa lo potihunggu boito lohimbideo̒ ode bulentiti talolai,

¹⁰ tulusi lotahuda mao̒ olio, “Biasaalio tau mopo hintapo angguru umopiohe daa̒ meimulo wau wonu tahe tiloduo malotolu longilu, deu̒ito angguru ubiasa. Bo Wutato lolahu angguru u mopiohe daa̒ tunggula botia!”

¹¹ Ui-uitolo bohulo moo̒linggolabe u pilohutu li Isa. Tio lohutu uito to Kana to Galilea. Wolo tuoto boito Tio lopobilohe odudaa̒-Lio. Yi tahidudua̒ o-Lio palacaya o-Lio.

¹² Lapatao̒ uito ti Isa lonao̒ mola ode Kapernaum pee̒-pee̒enta woliilo-Lio, mongo wuta-Tio wau tahidudua̒ o-Lio. Timongolio lotibiluloa̒ mola teto dengolo hui mola hiheolio.

Ti Isa tilumuwoto ode Bele lo Eeya

¹³ Tou̒ Dulahu Buka Paska lo Yahudi malembidei, ti Isa lonao̒ mola ode Yerusalemu.

¹⁴ To Bele lo Eeya to Yerusalemu Tio loo̒dungga tahe mopotaalia losapi, himba, wau bulungi poombo; wau olo tahipo tutuuloa̒ lodoi hihuloa̒ teto.

¹⁵ Ti Isa lohutu mao̒ buuboa̒ ngohuu̒ lonto tali tulusi lolanenga ngoa̒amila binatangi boito, himba wau sapi, lonto delomo Bele lo Eeya. Memee-jawaalo lotaa hipo tutuuloa̒ lodoi hebilantulele-Ngio tilinggula doi limongolio lo pupuulepelo mao̒.

¹⁶ Lapatao̒ Tio lotahuda mao̒ ode tahe mopotaalia lo bulungi poombo, “Bintaa̒alo ngoa̒amilalo monteea. Diila mao̒ pohutua Bele li Paapa-U̒ tambati podaa-hangiyalo!”

¹⁷ Yi tahidudua̒ o-Lio maloe̒ela mola ayati lo Kitabi botie. “Tolia̒ngu-U̒ duo̒lo Bele lo Eeya, yaa Allahu Taa̒ala, molumbila hilaa-U̒.”

¹⁸ Tahidihima kawasa lo Yahudi helo tehengi li Isa, uali mongolio, “Nte pohutua mai u moo̒linggolabe odelo tuoto olami deu̒ yio̒ ohaku mohutu mao̒ debo odelo utie.”

¹⁹ Ti Isa lolametao̒, “Lolohubelo Bele botie, wau todelomo utolo hui mola Wau̒ mamuli momongu mao̒.”

²⁰ Lapatao̒ timongolio loloi̒ya, “Wopato pulaa wolomo lotaunu upilo mongulalio Bele lo Eeya botie. Wau Yio̒ mamuli momongu bo todelomo utolo hui?”

²¹ Bo Bele lo Eeya u milakusudu li Isa yito batanga-Lio lohihilao.

²² Oditolio lapatio mao̒, tou̒ ti Isa bilongu mai monto opopate, mai̒loe̒ela mola lo tahidudua̒ o-Lio deu̒ sua̒li boito mapee̒enta pilotahuda-Lio. Yi malo malacaya timongolio tou̒ wolo u tulatuladu todelomo Kitabi wau tou̒ wolo u tilahuda li Isa.

Ti Isa moo̒onuhe ngoa̒amila tau

²³ Tou̒ ti Isa donggo to Yerusalemu tou̒ Lameyangi lo Paska, dadaata taa palacaya o-Lio sababu ngoa̒amila moo̒linggolabe u hepilohutu-Lio.

²⁴ Boti Isa lohihilao diila palacaya olimongolio, sababu oonuhe-Lio ngoa̒amila tau.

²⁵ Diila palalu tau mongohi tombango to o-Lio pasali penu boli olo tatoonu wambao̒, sababu otaawa-Lio lohihilao wolo uwoluo todelomo hilaa lomanusia.