YAHYA 17 - KITABI HABARI MOPIOHE

Ti Isa helodua̒ to tahidudua̒ o-Lio

¹ Lapatao̒ lotahuda mao̒ odito, ti Isa yilumanggela mola ode hulungo wau loloi̒ya, “Paapa, botia malei dungga wakutuulio. Pou̒daa̒alo mai Walai̒ Paapa, alihu Walai̒ Paapa olo mopou̒daa̒ mola li Paapa.

² Ti Paapa malohudu mai kawasa to ngoa̒amila umati lomanusia ode Walao̒, alihu Tio mongohi tutumulo ututuulio tutu wau ohiheo-hiheolo mao̒ ode ngoa̒amila tamailudu mai li Paapa o-Lio.

³ Uti-utieelo tutumulo ututuulio tutu wau ohiheo-hiheolo mao̒; alihu tau motota li Paapa, tuwa-tuwaulo Allahu Taa̒ala tabanali, wau moo̒onuhe li Isa Almasi tailao mai li Paapa.

⁴ Watia malo pou̒daa̒ mola li Paapa toitaato dunia botie wolo lopoo̒ lapato kalaja u pilopoa̒hu mai li Paapa olaa-Tia.

⁵ Paapa! Pou̒daa̒alo mai Watia botia toli Paapa, wolo odudaa̒ u mililiki lo Watia pee̒-pee̒enta woli Paapa tou̒ dunia botie diipo pilowali mai.

⁶ Watia malo poo̒taa li Paapa ode tau-tauwalo lonto dunia botie tamailudu mai li Paapa olaa-Tia. Timongolio yito miliki li Paapa, wau ti Paapa malohudu mai olimongolio ode Laatia. Timongolio malo dudua̒ tahuda li Paapa.

⁷ Botia otaawa limongolio deu̒ ngoa̒amila uiludu mai li Paapa olaa-Tia asaliilio mai lonto li Paapa.

⁸ Mapilo tunggulao̒ lo Watia olimongolio tahuda u pilotahuda mai li Paapa olaa-Tia; wau timongolio malo lolimo mao̒. Otaawa limongolio deu̒ Watia otu-otutuulo mao̒ dungga-dungga mai lonto li Paapa wau timongolio palacaya deu̒ ti Paapaalo tamalolao mai olaa-Tia.

⁹ Watia modua̒ mola ode limongolio. Watia diila modua̒ duo̒lo dunia bo duo̒lo tamailudu mai li Paapa olaa-Tia, sababu timongolio deu̒ito-yito miliki li Paapa.

¹⁰ Ngoa̒amila miliki lo Watia yito miliki li Paapa olo; wau ngoa̒amila miliki li Paapa yito miliki lo Watia olo. Watia pilopo udaa̒ towolota limongolio.

¹¹ Botia Watia monao̒ mai odeli Paapa. Watia diilalo motibiluloa̒ todunia; bo timongolio woluo todunia. Paapa tamantali! Dahailo mai timongolio wolo okokawasa tangguli Paapa, deu̒ito-yito tanggulo u mailohi mai li Paapa olaa-Tia – alihu timongolio mowali tuwau, tutuuwauwa debo odelo ti Paapa wau Watia tuwau olo.

¹² Tou̒ Watia donggo pee̒-pee̒enta woli mongolio, Watia malodaha olimongolio wolo okokawasa tangguli Paapa – tanggulo uilohi mai li Paapa olaa-Tia. Watia malodaha olimongolio wau diaaluo penu boli ngotaa mao̒ limongolio tailooli, ngopohia tio tameemangi musiilio mooli; alihu woleeto boito motoduwolo mai wolo u tulatuladu todelomo Kitabi.

¹³ Botia Watia monao̒ mai odeli Paapa. Ngoa̒amilalo botie tilahuda mao̒ lo Watia tou̒ donggo todunia; alihu timongolio wolo tio̒otutua moo̒laasa owengahu lo Watia.

¹⁴ Watia malopo tunggulao̒ olimongolio tahuda li Paapa, wau dunia molonui̒ mongolio, sababu timongolio diila miliki lodunia, tutuuwauwa debo odelo Watia olo diila miliki lodunia.

¹⁵ Watia diila mohile alihu ti Paapa mohama mola olimongolio monto dunia botie, bo Watia mohile alihu ti Paapa modaha olimongolio monto Ibilisi.

¹⁶ Tutuuwauwa sua̒liilio debo odelo Watia diila miliki lodunia, timongolio olo diila miliki lodunia.

¹⁷ Powaliyalo mai timongolio tolomodu miliki li Paapa moli obobanali; tahuda li Paapa boitolo obobanali.

¹⁸ Debo odelo ti Paapa malolao mai olaa-Tia ode dunia, odito olo Watia lolao olimongolio ode dunia.

¹⁹ U polohuna daa̒ olimongolio, Watia mohudu mola batanga odelo tolomudu miliki li Paapa, alihu timongolio olo mowali tolomodu miliki li Paapa moli obobanali.

²⁰ Diila bo ode limongolio wambao̒ Watia modua̒ mola. Watia modua̒ mola olo ode tau-tauwalo tamaa palacaya olaa-Tia lo ososakusi limongolio botie.

²¹ Pohile laa-Tia, Paapa, alihu timongolio ngoa̒amila mowali tuwau, debo odelo ti Paapa lotituwau mai wolaa-Tia, wau Watia woli Paapa. Pohileaala dua̒ timongolio mowali tuwau wolaan-To alihu dunia palacaya deu̒ ti Paapa talolao mai olaa-Tia.

²² Watia malohudu mao̒ olimongolio odudaa̒, uiludu mai li Paapa olaa-Tia, alihu timongolio mowali tuwau, tutuuwauwa debo odelo Ito olo tuwau;

²³ Watia woli mongolio, wau ti Paapa wolaa-Tia; alihu timongolio otu-otutuulo mao̒ tuwau. Yi dunia mamotota mao̒ deu̒ ti Paapaalo talolao mai olaa-Tia, wau deu̒ ti Paapa momonu olimongolio debo odelo ti Paapa lomonu olaa-Tia.

²⁴ Paapa, otohila laa-Tia alihu timongolio, tailudu mai li Paapa olaa-Tia, woluo pee̒-pee̒enta wolaa-Tia totambati Watia woluo, alihu timongolio moo̒onto odudaa̒ laa-Tia; deu̒ito-yito odudaa̒ uiludu mai li Paapa olaa-Tia; sababu ti Paapa lomonu olaa-Tia tou̒ dunia diipo pilowali mai.

²⁵ Paapa taa̒adili! Dunia diila moo̒onuhe li Paapa; bo Watia moo̒onuhe li Paapa; wau tau-tauwala botie motota deu̒ ti Paapa talolao mai olaa-Tia.

²⁶ Watia malo poi̒laalo tangguli Paapa ode limongolio; wau Watia madebo mohutu mao̒ odito, alihu ponu li Paapa olaa-Tia debo todelomo hilaa limongolio wau Watia motituwau woli mongolio.”