YAHYA 16 - KITABI HABARI MOPIOHE

¹ Ngoa̒amilalo boito poo̒taa-U̒ mai olimongoli alihu timongoli diila mao̒ momaahu iimani limongoli.

² Timongoli malualolio monto bebee-leyaala potabiaalo. Wau mamei dungga wakutuulio deu̒ taa momate olimongoli mate-mateelo mao̒ mamo lantobu tio hemotiwato to Allahu Taa̒ala.

³ Timongolio mohutu mai uito olemu sababu timongolio diipo moo̒onuhe li Paapa-U̒ meaalo ola-U̒.

⁴ Bo botia poo̒taa-U̒ mai uito olemu, alihu wonu uito bolo motoduo mai, mae̒ela mola limongoli deu̒ Wau̒ malo poo̒taa mai uito olimongoli.” “Sua̒li botie diila piloo̒taa-U̒ olimongoli tou̒ bohulio mai, sababu Wau̒ donggo pee̒-pee̒enta woli mongoli.

Kalaja lo Rohullah

⁵ Bo botia Wau̒ mamo hualinga mola ode o-Lio talolao mai ola-U̒; wau diaaluo penu boli ngotaa mao̒ monto olimongoli tamohintu mai ode utoonu ponao̒wa-U̒.

⁶ Botia tumbao̒ hilaamu lowali siluukali, sababu Wau̒ lopoo̒taa mai sua̒li boito olemu.

⁷ Bo Wau̒ molele mai u otutu olemu: Lebe mopioheo̒ olimongoli, wonu Wau̒ mohualinga mola; sababu wonu wau̒ diila mohualinga mola, Tamoo-tulungia boito diila tamei dungga ode olemu.

⁸ Wonu Tio meidungga, Tio mamopo ilaalo ode dunia boli lodusa u otutuulio mao̒, monto wolo u otutu, wau monto hukuumani lo Allahu Taa̒ala.

⁹ Tio mamopo ilaalo mai deu̒ diila palacaya to ola-U̒ yito dusa;

¹⁰ deu̒ Wau̒ otutu, sababu Wau̒ mohualinga mola odeli Paapa wau timongoli diilalo moo̒onto ola-U̒;

¹¹ wau deu̒ Allahu Taa̒ala malo lumula lohukuumani mai, sababu tahidihima kawasa lodunia botie mahilu-kuumani.

¹² Donggo dadaata u ohilaa polele-U̒ mai olemu, bo masaatia botie timongoli diipo mambo mololimo mao̒.

¹³ Bo wonu Rohu boito meidungga mai, deu̒ito-yito Tio tamopo ilaalo mai obobanali pasali lo Allahu Taa̒ala, timongoli madeloo-Lio u moo̒onuheo̒ ngoa̒amilalo obobanali. Tio diila tamotahuda monto batanga-Lio lohihilao bo motahuda mai wolo u mai̒lo dungohe-Lio, wau Tio mamo poo̒taa mai olemu wolo u mamowali todulahu momooli.

¹⁴ Tio mamopo u̒daa̒ ola-U̒, sababu wolo u pilotunggu-Lio mai olemu, tilolimo-Lio lonto ola-U̒.

¹⁵ Ngoa̒amila uwoluo toli Paapa yito hakuu-U̒. Uito sababuulio Wau̒ motahuda mai deu̒ wolo upilo tunggulai lo Rohu olemu, tilolimo-Lio lonto ola-U̒.”

Osuusa wau owengahu

¹⁶ “Bolo ngopee̒ mola timongoli diilalo moo̒onto ola-U̒, wau olo bolo ngopee̒ mola poli timongoli mamoo̒onto ola-U̒.”

¹⁷ Dengolo lota tahidudua̒ li Isa mawiwiintua ngota timongota, “Wolo makusudu-Lio u Tio lotahuda olanto: ‘Bolo ngopee̒ mola timongoli diilalo moo̒onto ola-U̒, wau olo bolo ngopee̒ mola timongoli mamoo̒onto ola-U̒’? Wolo poli makusudu-Lio lou̒: ‘Wau̒ mohualinga mola odeli Paapa’?”

¹⁸ Timongolio hipohintua laito “Wolo boliilio mao̒, ‘ngopee̒ mola’? Ito diila mongalati Tio hemobisala pasali loolo!”

¹⁹ Otaawa li Isa timongolio motohilaa mohintu o-Lio. Oditolio Tio lotahuda mao̒, “Engonti tilahuda-U̒ mai, ‘Bolo ngopee̒ mola, timongoli diilalo moo̒onto ola-U̒, wau olo bolo ngopee̒ mola timongoli mamoo̒onto ola-U̒’. Maa uito u heposua̒lia limongoli towolota limongoli?

²⁰ Pomalacayalo, timongoli mahumoyongo wau mohilimuta, bo dunia mameengahu. Timongoli maa osuusawa lohilao, bo osuusamu boito mamobolia̒ mowali owengahu.

²¹ Wonu taabua ngota wimbideo̒ motutu mai, tio suusa, sababu maa wakutuulio tio modutolo. Bo odito walai̒o mapilo tutulio mai, taabua boito mamolipato dudutolio sababu meengahu deu̒ tau̒nge ngota mapilo tutulio mai ode delomo dunia.

²² Odito olo woli mongoli: Botia timongoli osuusawa lohilao, bo Wau̒ mamuli modunggaya woli mongoli, yi hilaamu mameengahu; wau diaaluo penu boli ngotaa mao̒ tamowali mohama owengahu boito monto hilaamu.

²³ Todulahu boito, timongoli diilalo mohintu wolo-wolo poli ola-U̒. Pomalacayalo: Penu boli wolo upohile mola limongoli toli Paapa-U̒ to tanggulu-U̒, uito mawohi mai li Paapa-U̒ olemu.

²⁴ Tunggula tosaaa̒ti botie timongoli diipo lohile mola wolo-wolo to tanggulu-U̒. Pohileaalo mola, yi timongoli mamo lolimo, alihu owengahumu wimu-wimumuto ngoa̒amilalo.”

Ohohaama todunia

²⁵ “Ngoa̒amila botie polele-U̒ mai olemu wolo lumadu. Bo mamei dungga wakutuulio, Wau̒ diilalo momake lumadu, bo motahuda wolo juujulu pasali li Paapa-U̒.

²⁶ Tou̒ boito timongoli mamohile li Paapa-U̒ to tanggulu-U̒; ototai mao̒, Wau̒ diila tamohile monto li Paapa-U̒ duo̒lo olimongoli,

²⁷ sababu ti Paapa-U̒ lohihilao momonu olimongoli. Tio momonu olimongoli sababu timongoli motolia̒nga ola-U̒, wau palacaya deu̒ Wau̒ dungga-dungga mai lonto li Paapa-U̒.

²⁸ Memangi asalii-U̒ lonto li Paapa-U̒, wau malei dungga mai ode delomo dunia. Bo botia Wau̒ mamololaa mao̒ dunia u mohualinga mola odeli Paapa-U̒.”

²⁹ Lapatao̒ tahidudua̒ li Isa loloi̒ya o-Lio, “Botia Eeya lotahuda mai wolo juujulu wau diila lomake lumadu,

³⁰ wau otaawa lo mongowatotia deu̒ otaawa lo Eeya totoonulalo u hitua-tuawua. Diila palalu penu boli ngotaa mao̒ mohintu wolo-wolo ode Eeya. Sababu uito mongowatotia palacaya to Eeya dungga-dungga mai lonto Allahu Taa̒ala.”

³¹ Ti Isa lolametao̒ olimongolio, “Oditolio mapalacaya timongoli botia?

³² Eelai mao̒! Saaa̒tilio mamei dungga, tumbao̒ malei dungga mai, timongoli mapo bubuu-ayaalio. Ngota-ngota timongoli mamo hualinga ode bele lohihilao wau mololaa mao̒ ola-U̒ tutuuwau. Bo Wau̒ diila tutuuwau sababu ti Paapa-U̒ woluo pee̒-pee̒enta wola-U̒.

³³ Ngoa̒amilalo botie polele-U̒ mai alihu timongoli moo̒toduo mai moa̒ahu sababu motituwau wola-U̒. To dunia timongoli mamodutolo. Bo poo̒toheeta mola hilaamu! Dunia maa ilolaahe-U̒!”