YAHYA 14 - KITABI HABARI MOPIOHE

Ti Isa yito dalalo ode Allahu Taa̒ala

¹ “Diila mao̒ pobalisa hilaamu,” tahuda li isa olimongolio. “Pomalacayalo to Allahu Taa̒ala, wau pomalacayalo ola-U̒ olo.

² Tobele li Paapa-U̒ otambati dadaata upoti biluloa̒alo. Wau̒ odito mola u mopo dapato tambati olimongoli. Wau̒ diila tamo tahuda mai odito olemu, humayaalio uito diila odito.

³ Lapatio mao̒ Wau̒ odito mola u mopo dapato tambati olimongoli, Wau̒ muli mohualingai wau mai molutula olimongoli, alihu tou̒toonu Wau̒ woluo, timongoli olo woluo.

⁴ Ode tambati ponao̒wa-U̒ otaawa limongoli dalalio.”

⁵ Lapatao̒ tei Tomas loloi̒ya mao̒ odeli Isa, “Eeya, diila otaawa lo mongowatotia ode utoonu ponao̒wa lo Eeya, woloolo mola otaawa lo mongowatotia dalalio?”

⁶ Tametao̒ li Isa, “Wau̒lo dalalo u pongo taawalo Allahu Taa̒ala wau poo̒tapulalo tutumulo. Diaaluo penu boli ngotaa mao̒ tamowali monao̒ ode Allahu Taa̒ala, wonu diila moli ola-U̒.

⁷ Humayaalio timongoli moo̒onuhe ola-U̒, tantulo mao̒ timongoli mamoo̒onuhe li Paapa-U̒ olo. Botia timongoli malo oonuhe o-Lio wau malo oonto o-Lio.”

⁸ Yi tei Pilipus loloi̒ya mao̒ odeli Isa, “Eeya, pobilohe mai ti Paapa boito to mongowatotia, alihu mongowatotia molaasa sanangi.”

⁹ Boti Isa lolametao̒, “Maa odito hiheolio Wau̒ pee̒-pee̒enta woli mongoli, wau debo diipo iloonuhemu Wau̒, Pilipusi? Taa u malo oonto ola-U̒, malo oonto oli Paapa. Woloolo mola yio̒ mowali moloi̒ya, ‘Pobilohe mai ti Paapa to mongowatotia’?

¹⁰ Pilipus! Wolo yio̒ diila palacaya, deu̒ Wau̒ tuwau woli Paapa wau ti Paapa tuwau wola-U̒? Wolo umapilo tahuda-U̒ mai olemu, diila lonto ola-U̒ lohihilao. Ti Paapa-U̒ tadebo tuwau wolau̒, Tiolo tamohutu mai ngoa̒amilalo boito.

¹¹ Pomalacayalo ola-U̒, deu̒ Wau̒ tuwau woli Paapa wau ti Paapa tuwau wola-U̒. Meaalo wonu diila, pomalacayalo sababu wolo u mapilo hutu-U̒ mai.

¹² Otutu banali tahuda-U̒ botie: Taa palacaya ola-U̒, mamohutu mao̒ wolo u mapilo hutu-U̒ mai, – tumbao̒ tio mamohutu ulebe udaa̒ poli – sababu Wau̒ monao̒ mola odeli Paapa.

¹³ Wau penu boli wolo upohile limongoli to tanggulu-U̒, uito mapo hutuwo-U̒ mai olimongoli, alihu ti Paapa-U̒ pou̒daa̒alo moli Walao̒.

¹⁴ Boli wolo wambai̒o upohile limongoli to tanggulu-U̒, mapo hutuwo-U̒ mai.”

Ti Isa lodanti mai Rohullah

¹⁵ “Wonu timongoli motolia̒ngu-U̒, timongoli mamo dudua̒ totoonulalo palentaa-U̒.

¹⁶ Wau̒ mohile mola li Paapa-U̒, wau Tio mamongohi mai olemu Tamoo-tulungia wewo, tamaa motibiluloa̒ pee̒-pee̒enta woli mongoli u ohiheo-hiheolo mao̒.

¹⁷ Tio boito Rohullah tamamo poi̒laalo mai obobanali pasali lo Allahu Taa̒ala. Dunia diila loo̒tolimo o-Lio, sababu diila loo̒onto meaalo loo̒onuhe o-Lio. Bo timongoli moo̒onuhe o-Lio, sababu Tio bilu-biluloa̒ pee̒-pee̒enta woli mongoli wau tuwau woli mongoli.

¹⁸ Timongoli diila tatolaa-U̒ tutuuwau debo odelo tadidu otiilo otiyamo. Wau̒ muli mohualingai ode olemu.

¹⁹ Bolo ngopee̒ mola dunia diilalo moo̒onto ola-U̒. Bo timongoli mamoo̒onto ola-U̒. Wau sababu Wau̒ tumutumulo, timongoli olo matumumulo.

²⁰ Wonu meidungga mai dulahu boito, mao̒taawa limongoli deu̒ Wau̒ motituwau woli Paapa, timongoli motituwau wola-U̒, wau Wau̒ motituwau woli mongoli.

²¹ Taa mololimo totoonulalo palentaa-U̒ wau pohutuolio, tio-tiolo tamo tolia̒ngu-U̒. Ti Paapa-U̒ mamomonu mai taa motolia̒ngo ola-U̒. Wau̒ olo mamo tolia̒ngo tau boito wau mopo bilohei batanga-U̒ olio.”

²² Tei Yudas (diila tei Yudas Iskarioti) lohintu mao̒ li Isa, “Eeya, yilongola Eeya motohilaa mopoi̒laalo batanga lo Eeya to mongowatotia wau diila ode dunia?”

²³ Ti Isa lolametao̒, “Taa motolia̒ngu-U̒, mamo dudua̒ pongaajali-U̒. Ti Paapa-U̒ mamomonu mai olio. Ti Paapa wau Wau̒ mamei dungga mai ode olio wau motibiluloa̒ wolio.

²⁴ Taa diila motolia̒nga ola-U̒, diila modudua̒ pongaajali-U̒. Pongaajali u ilodungohe limongoli boito, diila lonto ola-U̒, bo lonto li Paapa-U̒ talolao mai ola-U̒.

²⁵ Ngoa̒amilalo boito potahuda-U̒ mai olemu ngotilonggadu Wau̒ pee̒-pee̒enta woli mongoli.

²⁶ Bo Rohullah, Tamoo-tulungia tamaa laolo mai li Paapa-U̒ to tanggulu-U̒, Tiolo tamaa mongaajali olimongoli totoonulolalo mao̒ wau mamopoe̒ela olimongoli ngoa̒amila umaa piloo̒taa-U̒ olimongoli.

²⁷ Salaamati tolaa-U̒ mao̒ olimongoli. Salaamati-U̒ lohihilao uwohi-U̒ mai olemu. Uwohi-U̒ mai boito diila debo odelo uwohi lodunia olemu. Diila mao̒ pobalisa hilaamu, diila mao̒ oohe.

²⁸ Mai̒lo dungohe limongoli upilo tahuda-U̒ mai, ‘Wau̒ mamonao̒, bo Wau̒ mamuli mohualingai ode limongoli’ Wonu timongoli motolia̒nga ola-U̒ timongoli masanangi Wau̒ monao̒ mola odeli Paapa-U̒, sababu ti Paapa-U̒ lebe udaa̒ wola-U̒.

²⁹ Wau̒ mopoo̒taa mai uito to olemu botia, tou̒ ngoa̒amilalo boito diipo motoduo mai, alihu de wonu motoduo mai, timongoli mapalacaya.

³⁰ Wau̒ diilalo mobisala mai lebe dadaata mao̒ toli mongoli, sababu mawakutuulio tahidihima kawasa lodunia botie mamonao̒ mai. Bo tio diila okawasa to batanga-U̒.

³¹ Bo ngoa̒amila boito musi motoduo mai alihu dunia mongalati deu̒ Wau̒ momonu oli Paapa wau hemohutu ngoa̒amila u pilomalentai li Paapa to ola-U̒. Naa, dulo ito monao̒olo monteea.”