YAHYA 11 - KITABI HABARI MOPIOHE

Opopate lei Lajarus

¹ Ngotaalio tai̒lunte Lajarus bilu-biluloa̒ to Betania pee̒-pee̒enta wolo wutatio ti Maria woli Marta.

² Ti Maria yito taabua talo looheo̒ yinulo moonu ode oa̒ati Isa, wau pilaidelio wolo huwoi̒o. Tou̒ wakutu tuwau tei Lajarus longongoto.

³ Mongo wutatio duulota lopohabari mao̒ odeli Isa, “Eeya, wutato mongowatotia tapilonua lo Eeya boito mongongoto.”

⁴ Tou̒ ti Isa lao̒dungohe habari boito, Tio lotahuda mao̒, “Ngongoto botie diila tamoo̒pate. Utie lotoduo mai alihu Allahu Taa̒ala pou̒daa̒alo, wau alihu woleeto olo Walao̒ Allahu Taa̒ala pou̒daa̒alo mola.”

⁵ Ti Isa momonu oli Marta, Maria wolei Lajarus.

⁶ Bo tou̒ ti Isa loo̒tapu mao̒ habari deu̒ tei Lajarus mongongoto, Tio sangaja lotibiluloa̒ to tambati-Lio donggo duuhui mola.

⁷ Lapatao̒ uito bolo Tio lotahuda mao̒ to tahidudua̒ o-Lio, “Dulo ito mohualinga ode Yudea.”

⁸ Timongolio lolametao̒, “Paaa̒ Guru, botiboti mola tau-tauwalo Yahudi ohilaa momai̒ li Paaa̒ wolo botu wau botia ti Paaa̒ ohilaa poli mohualinga mola odito?”

⁹ “Wolo diila ilo-ilolaanga hiheolio mopulaa dulo jamu?” tahuda mao̒ li Isa. “Taa monao̒ tou̒ dulahu, diila meiteduo̒ sababu tio moo̒onto baango dunia botie.

¹⁰ Bo taa monao̒ tou̒ hui meiteduo̒, sababu diaaluo baango to olio.”

¹¹ Odi-oditolo tahuda li Isa. Lapatao̒ Tio luli lotahuda mao̒, “Sahabatinto tei Lajarus malei tuluhu, bo Wau̒ maamota mopobongu olio.”

¹² Tahidudua̒ li Isa loloi̒ya mao̒, “Eeya, wonu tei Lajarus tuutuluhu, de tio mamoluli mai.”

¹³ Makusudu li Isa deu̒ tei Lajarus mailate. Bo timongolio hemo lantobu deu̒ makusudu li Isa yito tei Lajarus bo tuutuluhu biasa.

¹⁴ Sababu uito ti Isa lotahuda mao̒ ode limongolio wolo juujulu, “Tei Lajarus mailate.

¹⁵ Bo Wau̒ sanangi olo deu̒ Wau̒ diaaluo mola teto, sababu lebe mopioheo̒ olimongoli, alihu timongoli moo̒ palacaya. Duloolo ito monao̒ mota botia odelei Lajarus.”

¹⁶ Tei Tomas tai̒lunte “Taa Pingi” loloi̒ya mao̒ ode mongo sahabatilio tahidudua̒ li Isa, “Dulo ito moduduo̒, penu boli ito mate wo-Lio!”

Tamuli mopo tumulai wau mongohi tutumulo

¹⁷ Tou̒ ti Isa leidungga mota ode tambati boito, tei Lajarus mawopahui hiheolio tokuubulu.

¹⁸ Betania membideo̒ lo Yerusalemu, tanu tolo kilo lamingio.

¹⁹ Dadaata taulo Yahudi malonao̒ mai lomilohe oli Marta woli Maria u lomalongo olimongolio sababu timongolio ilopatea lo wutatio.

²⁰ Tou̒ ti Marta loo̒dungohe ti Isa lonao̒ mai, tio yilumualai lolutulo li Isa, hiambola ti Maria lotibiluloa̒a tobele.

²¹ Loi̒ya mao̒ li Marta odeli Isa, “Eeya, humayaalio Eeya woluo teea tou̒ boito, tantu wutato lowatotia diila yilate.

²² Boli odito otaawa lowatotia deu̒ masaatia botieelo Allahu Taa̒ala mamongohi mai penu boli wolo upohile mola lo Eeya o-Lio.”

²³ “Wutatumu mamuli tumumulai,” tahuda mao̒ li Isa oli Marta.

²⁴ Ti Marta lolametao̒, “Otaawa lowatotia tei Lajarus mamuli tumumulai wonu taa mate bonguloola to Dulahu Kiama.”

²⁵ “Wau̒lo tamongohi mai tutumulo wau mopobongu mai taa mate,” tahuda mao̒ li Isa odeli Marta “Taa u palacaya ola-U̒ matumumulo, eleponu tio mailate.

²⁶ Wau taa tumu-tumulo wau palacaya ola-U̒, diilalo mate ohiheo-hiheolo mao̒. Wolo yio̒ palacaya tosua̒li boito?”

²⁷ “Eeya,” tametao̒ li Marta, “Watotia palacaya Eeya Walao̒ Allahu Taa̒ala, Olongia Tamoo-poa̒ahua tamamei dungga mai ode dunia botie.”

Ti Isa hilumoyongo

²⁸ Lapatao̒ ti Marta loloi̒ya mao̒ odito, tio mota lotiangai oli Maria, wutatio wau lopo lohumao̒ olio, “Ti Paaa̒ Guru woluo tewe; tio hemohintu olemu,”

²⁹ Loo̒dungohe uito, ti Maria hua̒a tilimihulo, tulusi malo dunggaya woli Isa.

³⁰ Tou̒ boito, ti Isa diipo tilumuwoto ode kambungu. Tio donggo totambati li Marta tou̒ lodunggaya wo-Lio.

³¹ Tau-tauwalo Yahudi tadonggo hipoliyanga oli Maria tobele, loo̒onto oli Maria tilimihulo wau hua̒a yilumualao̒; oditolio timongolio malo dudua̒ olio, sababu helantobu limongolio tio monao̒ ode kuubulu mola humoyongo.

³² Tou̒ ti Maria leidungga totambati li Isa wau loo̒onto o-Lio, maloti bonggohuu̒lo mola ti Maria totalu li Isa wau loloi̒ya, “Eeyau̒, wonu Eeya woluo teea tou̒ boito, tantu wutato lowatotia diila yilate.”

³³ Tou̒ ti Isa loo̒onto oli Maria hiyo-hiyongo, wau tau-tauwalo Yahudi talonao̒ mai woli Maria boito olo hehiyonga, hilaa-Lio masiluukali, wau oontonga lodehu daa̒ hilaa-Lio.

³⁴ Yi Tio malohintu mao̒ olimongolio, “Tou̒toonu pilolobunga limongoli olio?” “Toduwolo mai bilohi lo Eeya,” tametao̒ limongolio.

^35-36 Lapatao̒ ti Isa mahilu moyongo. Yi tau-tauwalo Yahudi boito malo loi̒ya, “Bilohi, donggo boli ponu-Lio olei Lajarus!”

³⁷ Bo woluo towolota limongolio talo loi̒ya, “Tio lopoo̒luli taa pitoo̒ maloo̒onto, yilongola Tio diila mowali mongabuto olei Lajarus alihu diila mao̒ mate?”

Tei Lajarus luli pilopo tumulai

³⁸ Luli lodehu daa̒ hilaa li Isa, lapatao̒ malonao̒ mota ode kuubulu. Kuubulu boito yito gowa tuwau u hileu̒talio wolo botu leidaa̒.

³⁹ “Poheiya mao̒ botu boito,” tahuda li Isa. Ti Marta wutato lo tailate boito, lolametao̒, “Bo Eeyau̒, tio mawopahui tokuubulu. Tantulo mao̒ maboobolo mohutodu!”

⁴⁰ Ti Isa lolametao̒ oli Marta, “Diila mapilo tahuda-U̒ mai olemu; Wonu yio̒ palacaya, yio̒ mamoo̒onto malo odito udaa̒ kawasa lo Allahu Taa̒ala!”

⁴¹ Yi timongolio malo pohinggi botu boito. Lapatao̒ ti Isa yilumanggela mola ode hulungo wau loloi̒ya, “Oduo̒lo, Paapa, sababu ti Paapa malo dungohei olaatia.

⁴² Otaawa lowatia ti Paapa laito modungohei olaatia, bo watia moloi̒ya mao̒ utie, ode tau-tauwalo tawoluo teea; alihu timongolio palacaya deu̒ boti Paapalo talolao mai olaatia.”

⁴³ Lapatao̒ loloi̒ya mao̒ odito, ti Isa malo ngiibode wolo suala u loo̒ohuu̒, “Lajaru, lualoolo mai!”

⁴⁴ Yi mailumualai taa mailate boito. Uluu̒ wau oa̒atio donggo bolubolu lolatu, wau bayalio donggo tau̒tau̒bu wolo kaingi tau̒bu baya. “Yinggilalo latulio alihu tio bebasi monao̒,” tahuda mao̒ li Isa totau-tauwalo teto.

Woomboa u moluwali li Isa

⁴⁵ Dadaata tau-tauwalo Yahudi talonao̒ mai lomilohe oli Maria, palacaya toli Isa tou̒ timongolio loo̒onto u lotoduo mai boito.

⁴⁶ Bo dengolo lota towolota limongolio lonao̒ mota ode taulo Parisi wau lopo duloheo̒ wolo u mapilohutu li Isa.

⁴⁷ Sababu uito tau-tauwalo Parisi wau mongo iimamu tau̒wa malohutu dudunggaya wolo Mahakama Agama. Timongolio loloi̒ya, “Wolo umusi pohutuwonto? Tau botie malohutu dadaata u moo̒linggolabu!

⁴⁸ Wonu huliaanto mao̒ Tio mololaalaaita odie, ngoa̒amila tau mapalacaya o-Lio. Wau pulitio mao̒ tahidihima kawasa lo Roma mamonao̒ mai wau mongantulu Bele lo Eeya wau ngoilanggubu bangusanto!”

⁴⁹ Ngotaalio limongolio tai̒lunte Kayapas, iimamu daa̒ totaunu boito, loloi̒ya, “Timongoli diila motota lolo-loolo.

⁵⁰ Wolo timongoli diila mongalati deu̒ domi ulipu, lebe mopioheo̒ taangota mate wolo ngoilanggubu bangusa moa̒antulu?”

⁵¹ Otutuulio mao̒ tei Kayapas loloi̒ya uito, diila lonto pikiilangilio lohihilao. Bo odelo iimamu daa̒ totaunu boito tio lonubuwati mai deu̒ ti Isa maamate duo̒lo bangusa lo Yahudi.

⁵² Wau diila bo ode bangusa lo Yahudi wambao̒, bo olo u mongambu wau mopotuwau mao̒ mongo walao̒ Allahu Taa̒ala tamalo bubuua̒yawa.

⁵³ Tumulalo mai todulahu boito tahidihima kawasa lo Yahudi malo heeluma u momate li Isa mate-mateelo mao̒.

⁵⁴ Sababu uito ti Isa diilalo lotibilohei totalu lotaa dadaata towolota taulo Yahudi. Tio malo lolaa mao̒ Yudea, tulusi lonao̒ ode kota u ilunte Epraim membideo̒ lohuta datahu u luasi daa̒ wau delita. Mota teto Tio lotibiluloa̒ pee̒-pee̒enta wolo tahidudua̒ o-Lio.

⁵⁵ Tou̒ boito malembidei Dulahu Buka Paska lo Yahudi. Dadaata taa lonto kakaa-mbunguwalo malonao̒ mola ode Yerusalemu moponao̒ lo upacala mopobelesi batanga tou̒ dipolulio lameyangi boito.

⁵⁶ Timongolio hemo lolohe li Isa wau tou̒ hia̒mbua to Bele lo Eeya, timongolio malo loi̒ya ngota timongota, “Woloolo mola huhamaamu? Tanu tio diila monao̒ mai ode lameyangi botie.”

⁵⁷ Timongolio loloi̒ya mao̒ uito sababu mongo iimamu tau̒wa wau tau-tauwalo Parisi malo polualao̒ palenta deu̒ taa motota tou̒toonu ti Isa woluo, musi mopo dulohei alihu Tio mowali wau̒polo.