WAHI 9 - KITABI HABARI MOPIOHE

¹ Lapatao̒ malai̒kati olimolio lohiipo torompetilio, wau watia loo̒onto mola poliyama tuwau lodehu mai lonto hulungo ode dunia. Poliyama boito yilohia uu̒unti pangato lomautu.

² Yi poliyama boito malomuo̒ pangato lomautu boito, tulusi poloo̒ yilumualai lonto delomio debo odelo poloo̒ lonto tihengo uleidaa̒. Mato lodulahu wau baangio daa̒ lowali lodio̒lomo lopoloo̒ lonto pangato boito.

³ Lapatao̒ lonto delomo poloo̒ boito yilumualai bubuu-litaalo u lolaahe mola ode dunia. Bubuu-litaalo boito yilohia kawasa u tutuuwauwa debo odelo uilohi ode bambau.

⁴ Timongolio dilini mopoluusa huo̒yoto, meaalo totoonulalo bungo lo ayu meaalo totoonulalo pilomulo wewolio. Timongolio bo mowali moluhu tau-tauwalo u tobayalio diila o tuoto seeheli monto Allahu Taa̒ala.

⁵ Bubuu-litaalo boito diila yiluwasia momate tau-tauwala boito mate-mateelo mao̒, bo mopo sikisaa wambao̒ olimongolio ngotilonggadu limo lohula mola. Lilintolo uloo̒ sababu sikisaa upilo akibati lo bubuu-litaalo boito tutuuwauwa debo odelo lilintolo u ilakibati pantongio lobambau.

⁶ Tou̒ limo lohula mola boito tau-tauwala boito motolopani alihu mate, bo timongolio diila mowali mate; timongolio ohilaa mate bo mautu molaminga monto olimongolio.

⁷ Laku lobulita boito debo odelo wadala udapa-dapato mopaatea. To lunggongo bubuu-litaalo boito woluo hitua-tuawua u oontonga debo odelo makuta hulawa. Baya lo bubuu-litaalo boito debo odelo baya lomanusia.

⁸ Huwoo̒ lo bubuu-litaalo boito debo odelo huwoo̒ taabua, wau dungitio debo odelo dungito singa.

⁹ Duhelo bubuu-litaalo boito tau̒tau̒bu lou̒ hitua-tuawua udebo odelo boo̒ wate. Suala polipio̒ lo bubuu-litaalo boito debo odelo suala lo ngojumula daa̒ kakaa-letawaalo wadala u hemoluhu todelomo popaatea.

¹⁰ Bubuu-litaalo boito o patahu wau opantongio debo odelo bambau. Wau topatahu lo bubuu-litaalo boitolo woluo lotolio u mopo sikisaa manusia ngotilonggadu limo lohula mola hiheolio.

¹¹ Bubuu-litaalo boito o olongia u hemo malenta olimongolio, wau olongia boito yito malai̒kati tamoo-ngimatoa pangato lomautu. Tanggulio todelomo bahasa lo Ibrani yito Abadon; wau todelomo bahasa lo Yunani Apolion (uboliilio mao̒ “Tamoo-poluusawa”).

¹² Baala ubohulio malo paluto. Lapatao̒ uito donggo woluo poli dulo baala umusi meidungga.

¹³ Lapatao̒ malai̒kati tao̒lomio lohiipo torompetilio. Yi watia loo̒dungohe suala lonto opato tutulo mesba hulawa u totalu lo Allahu Taa̒ala.

¹⁴ Suala boito loloi̒ya mao̒ to malai̒kati olomio boito, “Hulia mao̒ opaato malai̒kati tapungu-pungu to Dutulaa lo Eperat boito!”

¹⁵ Opaato malai̒kati boito olo hilulialio. Timongolio mapilo dapatio tolomodu ode jamu, dulahu, hulalo wau taunu boito u momate mateelo mao̒ ngotayade totolu ngoilanggubu umati lomanusia.

¹⁶ Piloo̒taalio mai olaatia deu̒ jumulaa lo papaa-sukaniyalo owadala daatalio dulo hetuto juta.

¹⁷ Wau todelomo bibilohu, watia loo̒onto mola wawaa-dalawaalo boito wau jojookilio. Jojookilio boito hipakea boo̒ wate u lakulio meela hilei̒ta, debo odelo iintani lakulio moidu debo odelo botu lonilamu, wau molalahu walirangi. Lunggongo wawaa-dalawaalo boito debo odelo lunggongo singa, wau lonto tunggilio yilumualai tulu, poloo̒, wau walirangi.

¹⁸ Ngotayade totolu lonto umati lomanusia ilopatea yila-yilateelo mao̒ lootolo baala boito; deu̒ito-yito tulu, poloo̒, wau walirangi uilumualai monto tunggilo wawaa-dalawaalo boito.

¹⁹ Olootolo wawaa-dalawaalo boito woluo to tunggilio wau olo topatahio. Papaatahio debo odelo tulidu olunggongo. Wolo patahio boito, wawaa-dalawaalo boito helo posikisaa manusia.

²⁰ Bo labito umati lomanusia tadiila ilopatea yila-yilateelo mao̒ lo babaa-lawaalo boito olo, diila olo lololaa mao̒ huhuu-hutuwaalo uluu̒ limongolio lohihilao. Timongolio debo diila lohuheli hemolubo roroo-huwaalo u moleeto wau totoonulalo balaahala hulawa, talaa̒, tombaha, botu wau ayu udiila mowali moo̒onto meaalo modungohe, meaalo monao̒.

²¹ Timongolio diila olo lololaa mao̒ huhuu-hutuwaalo limongolio u moleeto, deu̒ito-yito moomatea mate-mateelo mao̒, ilimi mongisimu, huloto wau mootao̒wa.