WAHI 3 - KITABI HABARI MOPIOHE

Tahuli ode Sardis

¹ “To malai̒kati lojamaa̒ to Sardis, tulade mola odie: Utieelo tahuli monto o-Lio taa ohuu̒wo lo opitu rohu monto Allahu Taa̒ala wau opitu poliyama boito. Otaawa-U̒ wolo upilohutu limongoli. Ualio mao̒ timongoli tumutumulo, lebe-lebe pomao̒ timongoli yilate!

² Sababu uito, pobongulo, wau poo̒toheeta mao̒ wolo udonggo woluo toli mongoli tou̒ uito diipo yilate sama-samaata. Sababu malotapu-U̒ deu̒ wolo u pilohutu limongoli, dipoolu penu boli tuwau mao̒ u wimu-wimumuto tutu totalu lo Allahu Taa̒ala.

³ Oditolio, muli poo̒toloma mao̒ wolo u mapilo ngaajali olimongoli muloololio mai wau wolo umaa ilodungohe limongoli. Ponao̒wa mao̒ uito wau polilihulo monto duduusaamu. Wonu timongoli diila mobongu, Wau̒ mamei dungga mai debo odelo tamootao̒wa; wau diila tao̒taawa limongoli omolua wakutuulio Wau̒ meidungga mai.

⁴ Bo tohuungi mongoli to Sardis donggo woluo tau tahidahawa alihu boo̒lio debo belesi. Timongolio boito mamonao̒ pee̒-pee̒enta wola-U̒ wolo mohiboo̒ lou̒ moputio̒, sababu timongolio motuuu̒de woleeto.

⁵ Toli mongolio tamoo̒haama mapakealio jumba moputio̒. Bo timongolio diila taluluto-U̒ monto Buku lo Taa Tumutumulo. Wau totalu li Paapa-U̒, wau mamaa-lai̒kati-Lio Wau̒ mamotolo akuo deu̒ timongolio yito miliki-U̒.

⁶ Titaalo tita tamoo̒ dungohu, mamusi mopoo̒ tuoto wolo u tilahuda mai lo Rohullah to jajaa-maa̒alo!”

Tahuli ode Piladelpia

⁷ “To malai̒kati lojamaa̒ to Piladelpia, tulade mola odie: Utieelo tahuli monto o-Lio tamantali wau u tutu. Tiolo tadihudihu uu̒nti u mililiki lei Dauda; wonu Tio momuo̒ diaaluo penu boli ngotaa mao̒ tamoo̒ heu̒to, wau wonu heu̒ta-Lio diaaluo penu boli ngotaa mao̒ tamowali momuo̒.

⁸ Otaawa-U̒ wolo u pilohutu limongoli. Otaawa-U̒ deu̒ diila ngoolo mao̒ lotoli mongoli; timongoli malo dudua̒ pongaajali-U̒ wau tatapu wau molotolo hilao to ola-U̒. Toli mongoli mahiluo̒-U̒ huhebu tuwau, wau penu boli tatoonu diila mowali moheu̒tao̒.

⁹ Poo̒toloma mao̒ utie: Tau-tauwalo talowali umati lo Ibilisi boito, mohimbuloa, tahi pongakua batangalio Yahudi lebe-lebe pomao̒ diila, mapo hutuwo-U̒ tilinggula timongolio mai mosujudu totalumu. Wau mao̒taawa mao̒ limongolio deu̒ Wau̒ momonu olemu.

¹⁰ Masababu timongoli malo dudua̒ palenta-U̒ alihu moo̒olohu, Wau̒ olo mamoduo̒lai olemu monto maasa lou̒ mototolo u mamolemba ngoilanggubu dunia. Sua̒li boito mamotoduo mai u mohimontala ngoa̒amila tau todunia.

¹¹ Wau̒ hua̒a meidungga mai! Poo̒dahai tio̒otutua wolo u mililiki limongoli, alihu diaaluo penu boli ngotaa mao̒ tamohehu palaseni u ilohaamamu.

¹² Taa u moo̒haama, mapo waliyo-U̒ odelo wolihi todelomo Bele Mantali lo Allahu Taa̒ala-U̒, wau tio mamoti biluloa̒ teto ohiheo-hiheolo mao̒. Tanggulo Allahu Taa̒ala-U̒, wau tanggulo kota lo Allahu Taa̒ala-U̒ – deu̒ito-yito Yerusalemu bohu umamo tuhutai monto sologa, monto Allahu Taa̒ala-U̒ – matuladu-U̒ mao̒ tobatanga lotau boito. Tanggulu-U̒ u bohu olo matuladu-U̒ mao̒ to batangalio.

¹³ Titaalo tita tamoo̒ dungohu, mamusi mopoo̒ tuoto wolo u tilahuda mai lo Rohullah to jajaa-maa̒alo!”

Tahuli ode Laodikia

¹⁴ “To malai̒kati lojamaa̒ to Laodikia, tulade mola odie: Utieelo tahuli monto Sangi Amin, Sakusi taatatapu wau molotolo hilao wau otutu, pilobutua mai lo totoonulalo hitua-tuawua u pilowali mai lo Allahu Taa̒ala.

¹⁵ Otaawa-U̒ wolo u pilohutu limongoli: Otaawa-U̒ timongoli diila mohuhulo wau diila olo mopatu. Patutilio timongoli tala tuwaulio!

¹⁶ Bo timongoli mohihilonu; diila mopatu, mohuhulo olo diila. Uitolo sababuulio timongoli mapotuo̒o-U̒ ode bulemengio monto delomo ngango-U̒.

¹⁷ Timongoli hipoloi̒yawa, ‘Amiaatia kaya wau matuuheta ngoa̒amilalo; amiaatia diila ilodiaa̒ lolo-loolo.’ Bo diila otaawa limongoli malo odia sikisaalio wau malo odia suukalilio owowoluwomu! Timongoli mosikini, hilaalawa, wau hipiitoa̒.

¹⁸ Sababu uito Wau̒ monasehati mai olimongoli alihu motali mao̒ monto ola-U̒ hulawa, deu̒ito-yito hulawa tutu, alihu timongoli mowali kaya. Potalilo olo boo̒ moputio̒ monto ola-U̒ alihu timongoli oboo̒ molanggu owowoluwoa limongoli ulaalala wau moo̒olito. Wau potalilo olo wunemo u pomadeta tomatomu alihu timongoli mowali moo̒onto.

¹⁹ Tau-tauwalo tapilonu-U̒ mai, timongoliolo tadiniyo-U̒ wau tabuboa̒a-U̒. Sababu uito mamusi timongoli osumangati, wau polilihulo monto duduusaamu.

²⁰ Bilohi! Wau̒ tihutihula totalu lohuhebu wau hemongokoo̒. Wonu woluo taa u modungohe sualaa-U̒, wau momuo̒ mao̒ huhebu, Wau̒ matumuwoto modunggaya wolio; Wau̒ mamo lamela pee̒-pee̒enta wolio wau tio molamela pee̒-pee̒enta wola-U̒.

²¹ Timongolio taloo̒haama, mapo luasiyo-U̒ motihuloa̒a totambati lo huhuloa̒a-U̒ pee̒-pee̒enta wola-U̒, tutuuwauwa debo odelo Wau̒ lohihilao olo maloo̒haama wau masaatia hulohuloa̒a pee̒-pee̒enta woli Paapa-U̒ totambati lo huhuloa̒a-Lio.

²² Titaalo tita tamoo̒ dungohu, mamusi mopoo̒ tuoto wolo u tilahuda mai lo Rohullah to jajaa-maa̒alo!”