WAHI 18 - KITABI HABARI MOPIOHE

Dudehulio lo Babel

¹ Lapatao̒ uito watia loo̒onto mola malai̒kati ngota wewolio lolaahei lonto sologa. Tio okawasa uleidaa̒, wau baangio lohutu ngoilanggubu dunia lowali lotilango.

² Wolo suala daa̒ tio longiibodu, “Malodehu! Babel leidaa̒ malodehu! Botia tio lowali tambati lo lalaa-tiyaalo wau roroo-huwaalo u hileeta. To delomio hitumula totoonulalo bulungi hidala-dalaala unajiisi wau uilonuo̒ tau.

³ Sababu totoonulalo bangusa malongilu angguru lonapusu polo hulotolio. Mongo olongia lodunia helohutu huloto wolio, wau tahipo dahangia todunia lowali kaya lo napusuulio udiilalo iloo̒tonga boito.”

⁴ Lapatao̒ watia loo̒dungohe mola suala wewo lonto sologa lotahuda mai, “Luwaloolo, umati-U̒! Luwaloolo monto delomio! Timongoli diila mao̒ podudua̒ duduu-saalio, wau modudua̒ momanta hukuu-manilio!

⁵ Sababu dusalio wonto-wontolo demola hulungo, wau Allahu Taa̒ala mamoe̒ela ololeetio.

⁶ Pohutua mao̒ tio debo odelo tio malo pohutu mai olimongoli; balasiyalo tio poo̒oluo piu̒wa duo̒lo ngoa̒amila umaa pilohutulio. Tuangilo manggolio wolo minumani u poo̒oluo lebe motoheetao̒ wolo minumani upilo dapatio mao̒ olimongoli.

⁷ Wohiyalo olio polodutolo wau osuusa lohilao u tutuuwauwa daatalio wolo odudaa̒ wau ododaata ngoa̒amilalo u yilohilio ode batangalio lohihilao. Sababu tio wambao̒ laito hemoloi̒ya to batangalio, ‘Wau̒ botie olongia taabua tahemo malenta! Wau̒ diila janda; wau̒ diila tamoo̒ toduo mai osuusa!’

⁸ Sababu sua̒li boitolo, yi todelomo dulahio tuwau wambai̒o tio mao̒dungga mai lobaala – ngongoto, osuusa, wau polobiti. Wau tio mapobuwolio wolo tulu, sababu okawasaalo Eeya Allahu Taa̒ala tamo mutoo̒ olio boito.”

⁹ Mongo olongia lodunia tamodudua̒ todelomo huhuu-tuwaalo hulotolio wau napusu lotaabua boito mahumoyongo wau mohilimutao̒ kota boito wonu bolo timongolio moo̒onto poloo̒ mohubulo mola monto tulu u momobu olio.

¹⁰ Timongolio matimihula monto molamingo sababu timongolio moohe otuhata lopolo dutololio. Timongolio mamoloi̒ya, “Aduu, malo odie topotalalio kota umasa-masahulu botie – kota Babel u molotolo! To delomo ngojamu wambao̒ hukuumanimu mapilonao̒!”

¹¹ Mongo daahangi todunia olo humoyongo wau motilimi sababu taabua boito, sababu diaaluo penu boli ngotaa mao̒ poli tamotali babaa-langiyalo hepo daahangi limongolio.

¹² Diaaluo tamotali hulawa, talaa̒, poliyoto wau mutiara limongolio; wau olo kaingi lenani, kaingi lailoumu, sutera, kaaini meela mohulango: totoonulalo ayu hidala-dalaala udiila laito odungga, babaa-langiyalo monto tua̒langa wau monto ayu u himahalea monto tombaha, wate, wau puaalamu;

¹³ alipo ayu moolingo, ramba-ramba, alama u boboolo moonu, damahu u moonu boolio, wau alama; angguru wau yinulo, labu wau pale, sapi wau himba, wadala wau kaleta, mongo wato, tumbao̒ nyawa lomanusia olo.

¹⁴ Mongo dahangi loloi̒ya mao̒ ode taabua boito, “Ngoa̒amila u otohilaa milikiyomu madiduluo mao̒, wau totoonulalo ododaata ngoa̒amilalo uwolemu wau totoonulalo u mopiohu olemu mailooli. Diilalo odunggamu!”

¹⁵ Mongo daahangi tamalowali kaya sababu helo daahangi tokota boito matimihulo monto molamingo, sababu timongolio moohe otuhata lo polo dutololio. Timongolio mahumoyongo wau motilimi,

¹⁶ lapatao̒ moloi̒ya, “Aduu, malo odie topotalalio kota umasa-masahulu botie! Biasaalio tio kakaingi lolenani, kaingi lailoumu wau kaingi meela mohulango; biasaalio tio polupolu wolo pake hulawa, poliyoto wau mutiara.

¹⁷ Bo todelomo ngojamu wambao̒, tio mai̒loolia lo totoonulalo okokayalio boito!” Ngoa̒amila nakoda, panumba, wau taulo kaapali, wau ngoa̒amila taa u popehulio todeheto, tilimihula lonto molamingo.

¹⁸ Wau hiwatia̒ tou̒ timongolio loo̒onto mota poloo̒ lohubulai lonto tulu ulomobu kota boito. Timongolio longiibodu, “Diila pee̒enta mao̒ woluo kota wewo debo odelo kota leidaa̒ botie!”

¹⁹ Yi timongolio lomuyuhude peaahuo̒ to lunggongi mongolio odelo tuoto lotilimi, tulusi hilumoyongo wau wuwa-wuwaatio̒, “Aduu, malo odie topotalalio kota leidaa̒ botie! Okokayalio malohutu ngoa̒amila taa o kakaa-paliyaalo todeheto lowali kaya! Bo todelomo ngojamu wambao̒, tio mai̒loolia lou̒ totoonulalo mao̒!”

²⁰ Wuu sologa, poti wengahulo mola to oa̒antulu lokota boito! Wuu umati lo Allahu Taa̒ala, mongo rasulu, mongo nabi, poti wengahulo mola! Sababu Allahu Taa̒ala malo hukuumani mai olio odelo toli tou̒ wolo umaa pilohutulio limongoli!

²¹ Lapatao̒ uito, malai̒kati ngota tamolotolo boli buheli daa̒ lomintaa̒ botu tuwau – debo odelo udaa̒ lobotu hihilinga ulei̒daa̒ – tulusi pilomahulio mola ode delomo deheto wau loloi̒ya, “Odieelo mola pohuliilio kota lo Babel umasa-masahulu boito mapo mahulolio lou̒ moo̒ohuu̒ tilinggula diilalo odungga.

²² Tingohu muusiki monto tamooitohe kocapi, monto bibii-duwaniyalo, monto tamoo-hiipawa tulali monto tamoo-hiipawa torompeti, diilalo odungohe monto olemu! Diilalo odungga olo penu boli ngotaa mao̒ taa̒ahali mokalaja teto, wau tingohu botu pohilinga olo diilalo odungohe.

²³ Tau diilalo moo̒onto olo tilango tohe monto olemu; wau diilalo odungohe olo olaame potihunggu lonika teto. Mongo daahangimu yito tau-tauwalo talaba-labaalo tahimulowa lo ulipu todunia, wau wolo ii̒i-limiyalo sihirimu yio̒ helo himbulo ngoa̒amilalo bangusa todunia!”

²⁴ Babel hilukuumani-Lio sababu todelomo kota boito mai̒lo dungga duhu lomongo nabi, duhu umati lo Allahu Taa̒ala – limbui̒o mao̒ duhu lo ngoa̒amila taa u mapilatelio yila-yilateelo mao̒ totudu lodunia.