WAHI 1 - KITABI HABARI MOPIOHE

¹ Tuango buku botie tomimbihu wolo u piloi̒laalo li Isa Almasi pasali popoo-lou̒tiyalo u mamotoduo mai. Allahu Taa̒ala lopoo̒taa li Almasi alihu Tio mopo biloheo̒ tomongo wato lo Allahu Taa̒ala wolo umusi hua̒a motoduo mai. Ti Isa Almasi malolao malai̒kati-Lio odelei Yahya, wato-Lio mola lopoo̒taa popoo-lou̒tiyalo boito olio.

² Yi tei Yahya olo helo hungguli mai ngoa̒amila u iloontongalio boito; wau utieelo dudulohuhio tomimbihu tahuli lo Allahu Taa̒ala upiloo̒ toheeto li Isa Almasi lotimbulude to ososakusi-Lio.

³ Potisanangilo tutu taa u mopobaca wau taa u modungohe habari nubuwati lobuku botie wau taaa̒ti tou̒ wolo u tulatuladu todelomio. Sababu diilalo mohiheo ngoa̒amilalo boito mamotoduo mai.

Salamu ode pitu jamaa̒

⁴ Mongo wutato tawoluo to opitu jamaa̒ tomadala lo Asia! Watia, Yahya, mohalapu olimongoli ponuwa mai lo balakati wau moa̒ahu monto Allahu Taa̒ala – deu̒ito-yito Tio tawoluo, tamawoluo, wau tawoluo mololaalaaita, – wau olo monto opitu rohu uwoluo totalu lotambati huhuloa̒ li olongia lo Allahu Taa̒ala,

⁵ wau monto li Isa Almasi sakusi taa tatapu wau molotolo hilao. Tiolo tabohu-bohulio muli pilotumulai monto opopate wau Tio olo tao̒kawasa tomongo olongia lodunia. Ti Isa momonu olanto, wau wolo opopate-Lio Tio lopo lopato olanto lonto duduusaanto,

⁶ wau lopowali olanto tala tuwau bangusa tolomodu lowali mongo iimamu, tamomaya Allahu Taa̒ala, ti Paapa-Lio. Ti Isa Almasi boitolo tau̒daa̒ wau okawasa u ohiheo-hiheolo mao̒. Amin!

⁷ Bilohi, Tio dunga-dungga mai yilanggube loheengo! Ngoa̒amila tau mamoo̒onto o-Lio, leituwoto olo timongolio tamalo mitua̒a o-Lio. Totoonulalo bangusa todunia mamo hilimuto sababu Tio. Yaa, tantu! Amin!

⁸ “Wau̒lo tabohulio wau tapulitio,” tahuda lo Allahu Taa̒ala tawoluo, tamawoluo, wau tawoluo mololaalaaita, Taa Laba-labaalo kawasa.

Bibilohu pasali li Almasi

⁹ Watia, Yahya, wutatumu tango paladu woli mongoli todelomo polodutolo u ilolaasawa lotimii̒du tahidudua̒ li Almasi. Ito taaba modutolo odelo umati miliki-Lio. Watia pilomai̒lio ode pulo Patmos sababu watia helo pololadu tahuli lonto Allahu Taa̒ala, upiloo̒ toheto li Isa lotimbulude to ososakusi-Lio.

¹⁰ To dulahu Eeya, watia kiluwaasa lo Rohullah tulusi watia loo̒dungohe suala daa̒ – debo odelo tingohu torompeti – hemo tahuda mai towulea lowatia.

¹¹ Suala boito lotahuda mai, “Tulade mao̒ wolo u iloontongamu, wau lawola mola buku boito ode pitu jamaa̒ deu̒ito-yito: ode Epesus, Smirna, Pergamus, Tiatira, Sardis, Piladelpia, wau Laodikia.”

¹² Watia loili mao̒ ode wulea u momilohe tatoonu uito tahemo bisala mai olaatia. Lapatao̒ watia loo̒onto pitu oa̒ato tohe u pilohutu lonto hulawa.

¹³ Tohuungo oa̒ato totoo-heyaalo boito tihutihulo ngotaalio tao̒ontonga debo odelo manusia. Tio pakepake jumba u hayai̒o demola oa̒ato. Toduhe-Lio Tio pakepake tau̒bu duhelo hulawa.

¹⁴ Huwo-I̒o moputio̒ debo odelo lambuto himba, debo odelo putio̒ pini. Mato-Lio lei̒lei̒ta debo odelo tulu;

¹⁵ oa̒a-Tio moputio̒ lei̒lei̒ta debo odelo tombaha u tilumbila. Sualaa-Lio debo odelo bulontungo taluhu podehu uleidaa̒.

¹⁶ Uluu̒-Lio olowala dihudihu pitu poliyama, wau monto ngango-Lio yilumualai wamilo tuwau molalito u omato duluo. Baya-Lio motinelo debo odelo mato lodulahu tou̒ mohulonu tutu.

¹⁷ Tou̒ watia loo̒onto mao̒ o-Lio, watia leidambao̒ totalu-Lio debo odelo tailate. Bo Tio lopodutu mai uluu̒-Lio olowala olaatia tulusi lotahuda, “Diila mao̒ oohe! Wau̒lo tabohulio wau tapulitio.

¹⁸ Wau̒lo Tio tatumu-tumulo! Wau̒ mailate, bo bilohilo, Wau̒ tumutumulo u ohiheo-hiheolo mao̒. Wau̒ okawasa to opopate, wau todunia lotaamate.

¹⁹ Sababu uito, tulade mao̒ susuu-aliyaalo u iloontongamu, deu̒ito-yito susuu-aliyaalo uwoluo masaatia botie, wau susuu-aliyaalo u de mamotoduo mai.

²⁰ Utieelo hitua-hituawua u milakudu hetuuo̒lo lou̒ pitu poliyama u iloontongamu to uluu̒ olowala-U̒, wau monto opitu oa̒ato tohe hulawa boito: Pitu poliyama boito yito mamaa-lai̒katiyalo opitu jamaa̒, wau pitu oa̒ato tohe boito yito opitu jamaa̒ boito.”