TITUSI 2 - KITABI HABARI MOPIOHE

Bubuu-ngowaalo pongaajali u otutu

¹ Bo yio̒, Titusi, mamusi yio̒ mopoa̒jali mao̒ pongaajali u motuhatawa.

² Naseehatia mao̒ mongo lolai̒ tahi huulanga, alihu timongolio mongotongo batanga, molinepo wau tumumulo odelo taa upaatuti hulumatiolo. Timongolio olo musi motidihu to pongaajali u otutu monto Allahu Taa̒ala, motolia̒ngo wolo wimu-wimumuto ngoa̒amilalo wau modutolo wolo sabali.

³ Odito olo yio̒ mamusi monaseehati mao̒ mongobua tahi huulanga alihu pii̒li limongolio motuuu̒de lou̒ wolo upaatuti duo̒lo taa u hitumula tolomodu ode Allahu Taa̒ala. Timongolio diila mowali mopitana taa wewo, wau diila mowali otolonga lo minumani umoo̒ huwoo̒. Timongolio musi mopoa̒jali mao̒ susuu-aliyaalo u mopiohe,

⁴ alihu woleeto timongolio mowali mopoo̒piohe mongobua tahi muudawa u motolia̒nga dile wau tau̒kekeei̒,

⁵ mowali molinepo, tumutumulo mantali mowali tiilo to dileya umopiohu wau taa̒luku todilelio. Lou̒ odito diaaluo taa mowali mohentea̒ habari monto Allahu Taa̒ala.

⁶ Odito olo, naseehatia mao̒ tahi muudawa alihu timongolio mowali molinepo.

⁷ Todelomo totoonulalo sua̒li, mamusi yio̒ mowali obaayawa topii̒li u mopiohe. Wonu yio̒ mongaajali, yio̒ musi juujulu wau otu-otutuulo mao̒.

⁸ Pomakea mao̒ tataa-heyaalo u molinepo, udiila mowali henteo̒ lotau, alihu lawanimu mowali moolito sababu diaaluo susuu-aliyaalo mobulilo u mowali loi̒ya limongolio pasalinto.

⁹ Mongo wato musi taa̒luku toli tuanilio, wau mopo sanangi hilaalio todelomo totoonulalo sua̒li. Timongolio diila mowali mobuutola,

¹⁰ meaalo motao̒. Mamusi timongolio mopo biloheo̒ deu̒ timongolio laito opii̒li mopiohe wau tatapu molotolo hilao; alihu wolo pii̒li limongolio boito tau momuji pongajali pasali lo Allahu Taa̒ala, Tamoo-poa̒ahua olanto.

¹¹ Sababu Allahu Taa̒ala malo pobilohei odehu hilaa-Lio huna mopoa̒ahu ngoilanggubu umati lomanusia.

¹² Odehu hilaa lo Allahu Taa̒ala boito mongaajali olanto alihu diilalo tumumulo bubuu-lemenga wolo kahandaki lo Allahu Taa̒ala wau diila modudua̒ otohilaa siipati lodunia. Ito ilajari-Lio mai u tumumulo todelomo dunia botie lou̒ motota mongotongo batanga, tuulusi wau tatapu molotolo hilao to Allahu Taa̒ala.

¹³ Botia ito donggo hemohima Dulahe u hehalaa-puwonto boito; to Dulahe boito dunia mamoo̒onto odudaa̒ li Isa Almasi, deu̒ito-yito Allahu Taa̒ala Taa Laba-labaalo udaa̒, wau Olongia Tamoo-poa̒ahua olanto.

¹⁴ Tio malo pobake batanga-Lio olanto u lolopato olanto lonto totoonulalo u hileeta, wau lopowali olanto umati tuwau talo lopato lonto dusa wau talowali miliki-Lio wambao̒, wau tamoo̒lohu mohutu u mopiohe.

¹⁵ Pongaajalia mao̒ ngoa̒amilalo boito, wau nasehatia boli dinia mao̒ tau-tauwalo tahi podungohe olemu wolo lealeaatu tilihula. Diila mao̒ polulia penu boli ngotaalio momilohe olemu dupadupapa.