TITUSI 1 - KITABI HABARI MOPIOHE

¹ Walau̒uu̒ Titusi! Wau̒, Paulus, moluladei tulade botie odelo wato lo Allahu Taa̒ala wau rasulu li Isa Almasi. Wau̒ tilulaoto wau yilao-Lio u motulungi totau-tauwalo tatilulaoto Allahu Taa̒ala alihu mowali molotolo todelomo iimani limongolio. Wau̒ olo musi modelo olimongolio alihu motota lo pongaajali u otutu u pilo ngaajali lo agamanto.

² Pongaajali boito patopatoa̒ to halapani deu̒ ito mamololimo tutumulo u tutuulio tutu wau ohiheo-hiheolo mao̒. Allahu Taa̒ala malo danti mai tutumulo boito tou̒ diipo bohulo jamani – wau Allahu Taa̒ala diila pongalo aakali mohimbulo.

³ Towakutu u tiluhata Allahu Taa̒ala lopoi̒laalo mai danti-Lio boito todelomo tahulii-Lio. Tahuli boito mapilo malacaya-Lio mai olau̒, wau wau̒ lopohabari uito topalenta lo Allahu Taa̒ala Tamoo-poa̒ahua olanto.

⁴ Titusi, yio̒ yito otu-otutuulo mao̒ walau̒uu̒, sababu yio̒ wau wau̒ pee̒-pee̒enta malo malacaya li Almasi. Wau̒ motiwunela bolo potala Allahu Taa̒ala ti Paapa wau Isa Almasi Olongia Tamoo-poa̒ahua olanto, mongohi mai balakati wau salaamati olemu.

Kalaja lei Titusi to Kreta

⁵ Wau̒ mololaa mao̒ olemu to Kreta alihu yio̒ mowali mongulusi susuu-aliyaalo udonggo palalu atuluwolo. Olo, alihu yio̒ momudua̒ao̒ mongo tau̒wa lojamaa̒ to motii̒du kota. Wau poo̒toloma mao̒ popoo-tuhatau̒ botie:

⁶ Tau̒wa ngota lojamaa̒ mamusi ngotaalio tadiila oa̒aibu; Tio musi bo odile taabua ngota; mongo walai̒o patutilio malo malacaya li Almasi wau diila otaawa lotau laputalo wau tadiila mowali atuluwolo.

⁷ Tamoo-ngimatoa jamaa̒ yito taa u mongulusi kalaja lo Allahu Taa̒ala, tio diila mowali oa̒aibu. Tio diila mowali sombongi meaalo moingowa, meaalo hehuwoa̒alo meaalo yinao moloohulua, meaalo bo momilohe doi.

⁸ Tio musi sanangi mololimo tau tobelelio, motohilaa lou̒ susuu-aliyaalo u mopiohe, mowali mongotonga batanga, juujulu, mantali wau talatibu.

⁹ Tio musi motidihu daa̒ to pongaajali u mowali palacayalo, debo odelo umaa pilongajali mao̒ olio. Lou̒ odito tio mambo monaseehati tau patopatoa̒ to pongaajali u otutu, wau mopoe̒ela mao̒ totala lotau-tauwalo tamo tehengi olio.

¹⁰ Sababu dadaata tau tao̒hilaa momalakala, laba-labaalo mopiohe tau-tauwalo taa engontielio o agama Yahudi; timongolio hemo himbulo taawewo wolo latabu limongolio.

¹¹ Tau-tauwalo tadebo odelo uito musi pambolalo tunggilio, sababu timongolio mopo tolonggalo dadaata ngaalaa̒ wolo popoo-ngajaliyalo diila pongalo aakali. Timongolio mohutu uito bo sababu motohilaa mololohe pae̒eda udiila paatuti!

¹² Pee̒enta ngotaalio lonabi limongolio lohihilao, taa̒asalilio mai lonto Kreta olo, loloi̒ya, “Tau-tauwalo Kreta laito hemo himbulo, wau debo odelo binatangi mongantau u motula wau lantingalo.”

¹³ Wolo uiloi̒ya lonabi boito memangi otutu. Uito sababuulio yio̒ musi modini olimongolio lou̒ moo̒ohuu̒; alihu timongolio debo motidihu to pongaajali u otutu,

¹⁴ wau diilalo motidihu to tilolahepe tombilu lo Yahudi meaalo tilolahepe wuu̒du u pilohutu lotau-tauwalo tadiila mololimo pongaajali u otutu boito.

¹⁵ Totoonulalo u hitua-tuawua yito mantali ode tau-tauwalo tamantali. Bo ode tau-tauwalo tahi opikilangia kootolo wau diila o iimani diaaluo penu boli tuwau mao̒ umantali, sababu pikiilangi wau hilaa u maloo̒tapu tinelo Eeya limongolio malo kootolo!

¹⁶ Timongolio hipo loi̒yawa deu̒ timongolio motota lo Allahu Taa̒ala lebe-lebe pomao̒ huhutu limongolio momaahu o-Lio. Timongolio moo̒lonuo̒, wau timongolio diila mohuto modungohu; timongolio yito tau-tauwalo tadiila himamboa mohutu u hitua-tuawua umopiohe.