TINGULI 9 - KITABI HABARI MOPIOHE

Odiila dungohe bangusa lo Isirai̒lu

¹ “Dungohiilo mongo wutato! Todulahee botie timongoli mamo balango Dutulaa Yordan u motibiluloa̒ tomadala lo babaa-ngusawalo talebe udaa̒ wau lebe molotolao̒ woli mongoli. Kokoo-tawaalo limongolio duduulaa̒ wolo didii-ngingaalo meeselio u panto-pantonga debo odelo langgato hulungo.

² Tau-taulio duduulaa̒ wau hilootola pohuwawaa̒lio; timongolio boito rakisasa, wau timongoli maloo̒ dungoheo̒ deu̒ diaaluo penu boli ngotaa mao̒ tamoo̒ tuwali olimongolio.

³ Bo botia, timongoli mamosakusi mao̒ lohihilao woloolo mola Eeya Allahu Taa̒ala limongoli monao̒ totalu limongoli debo odelo tulu umoo̒ pobu. Tio mamopo olaaheo̒ olimongolio totalu lomato limongoli, tilinggula timongoli mowali mopolahi wau mopobinasa olimongolio wolo molamemeto debo odelo u pilodanti mai lo Eeya.

^4-5 Lapatao̒ Eeya Allahu Taa̒ala limongoli mopolahi mao̒ olimongolio duo̒li mongoli, diila mao̒ polantobu deu̒ timongoli madeloo-Lio mola odito u motolo miliki huta boito sababu timongoli mopiohu wau hipohutua kahandaki lo Eeya Allahu Taa̒ala limongoli tilinggula patuti mololimo mao̒. Sama-samaata diila! Eeya mopolahi mao̒ babaa-ngusawalo boito duo̒li mongoli sababu timongolio moleeto. Eeya mopoluli olimongoli mohama huta limongolio, Eeya ohilaa mopoo̒polu mai danti-Lio odeli nenemoya limongoli Abraham, Isihaka wolei Yako.

⁶ Poyakinilo deu̒ Eeya Allahu Taa̒ala limongoli diila mohudu mai huta u molomiodu boito ode limongoli masababu timongoli patuti mololimo mao̒. Diila! Timongoli botie bangusa tabaa̒ngiyolo.

⁷ Eelai mao̒ woloolo mola timongoli helohutu to Eeya Allahu Taa̒ala limongoli lomuluka tohuta luasi udelita. Anggadu timongoli lololaa mao̒ Masiri tunggula leidungga mai odia, timongoli helo teehengi to Eeya.

⁸ Tumbao̒ to Hui̒dee Sinai timongoli helohutu to Eeya lomuluka daa̒, tilinggula Eeya ohilaa mopobinasa olimongoli.

⁹ Watia lotao̒de hui̒dee boito mola lololimo mai botu lodaantia u pilohutu lo Eeya woli mongoli. Wopato pulu hui wau dulahu hiheolio watia lotibiluloa̒ toitaato hui̒dee boito lou̒ diila lolamelo wau longilu.

¹⁰ Lapatao̒ Eeya longohi mai olaatia botu dulopita u matiluladu lo Allahu Taa̒ala lohihilao. To botu boito tula-tuladu tataa-heyaalo upilo tahudaa-Lio lonto huungo tulu ode limongoli, tou̒ timongoli hia̒mbua tobungo lohui̒du.

¹¹ Ooo̒, lapatio mao̒ lopaluta wopato pulu hui wau dulahu, Eeya longohi mai olaatia botu lodaantia dulopita boito.

¹² Lapatao̒ Eeya lotahuda mai olaatia, ‘Hua̒a potuhutolo mola, sababu bangusaamu tadilelomu mai yilumualao̒ lonto Masiri malohutu u moleeto. Timongolio malo bolia̒ lonto papaa-lentaa-U̒, wau helohutu bui̒ u hetuboo limongolio.’

¹³ Eeya olo lotahuda mai olaatia, ‘Otaawa-U̒ bangusa boito baa̒ngiyolo daa̒.

¹⁴ Diila mao̒ pohimontala momubula ola-U̒. Wau̒ ohilaa mopobinasa mai olimongolio tilinggula diilalo oe̒ela. Bo yio̒ mapowaliyo-U̒ mai tiyamo lobangusa tuwau talebe udaa̒ wau lebe molotolao̒ woli mongolio.’

¹⁵ Lapatao̒ watia lopalingao̒, wau sambela delodelo botu lodaantia dulo pita wolo uluu̒ mohu-mohualia, watia malo tuhuta mola lonto hui̒dee udonggo hinta-hintalabu boito.

¹⁶ Watia loo̒onto deu̒ timongoli malo lambanga palenta lo Eeya Allahu Taa̒ala limongoli. Timongoli mailodusa to Eeya sababu helohutu duo̒lo batanga limongoli bui̒ losapi tuwau lonto logamu.

¹⁷ Yi totalu lomato limongoli botu lodaantia dulo pita boito pilobanti mao̒ lowatia tunggula loa̒ntulu hepita-pitanga.

¹⁸ Lapatao̒ pee̒entapo watia losujudu mola totalu lo Eeya to bolitutuo̒ hui̒du ngotilonggadu wopato pulu hui wau dulahu, lou̒ diila lolamelo wau longilu. Uito pilohutu lowatia sababu timongoli mailodusa to Eeya lou̒ lohutu mao̒ wolo u ilanggapu-Lio moleeto, tilinggula Tio lomuluka.

¹⁹ Watia moohe to omuluka lo Eeya uwali-walihuhu to olimongoli tunggula ohilaa pobinasaa-Lio mai, bo pee̒enta boite olo Eeya lodungohei olaatia.

²⁰ Eeya lomuluka daa̒ olo to olei Haruna tilunggula Tio ohilaa momate mateelo mao̒ olio, yi watia lodua̒ mola olio olo.

²¹ Bui̒ losapi logamu huhuutumu, pilomahulao̒ lowatia ode delomo tulu. Lapatao̒ ilantulu lowatia wau yilobuo̒ tunggula loa̒aluti debo odelo peaahuo̒, wau peaahua̒ boito pilomahulao̒ lowatia ode delomo walao̒ dutulaa utolo-tolohe lonto hui̒dee boito.

²² Wau olo to Tabera, Masa wau Kibrot-Taawa, timongoli helohutu to Eeya lomuluka.

²³ Lapatao̒ tou̒ timongoli ilahula lo Eeya mololaa mao̒ Kades-Barnea u momaju mota wau motibiluloa̒ tohuta u mawohi-Lio mai ode limongoli, timongoli helo teehengi palenta lo Eeya Allahu Taa̒ala limongoli; timongoli diila mohuto yakini meaambo modungohe to Olio.

²⁴ Tumulalo mai timongoli ilotaawa lowatia, timongoli laito hemo teehengi to Eeya.

²⁵ Otaawa lowatia Eeya oteekati ohilaa mopobinasa mai olimongoli. Yi ngotilonggadu wopato pulu hui wau dulahu watia helo sujudu totalu lo Eeya

²⁶ wau helodua̒ mola odie: Yaa Eeya Taa Laba-labaalo molanggaato, diila mao̒ pobinasawa mai umati milikii-Mu botie, bangusa tailopato-Mu wau dilepitu-Mu yilumulai lonto Masiri wolo olootolo wau okokawasaa-Mu daa̒.

²⁷ Ambunguolo eelai mai tomongo wato-Mu Abraham, Isihaka wolei Yako, wau ambunguolo diila mao̒ poo̒tuota siipati baa̒ngiyola, ololeeto wau dusa lobangusa botie.

²⁸ Wonu umati-Mu pobinasaa-Mu mai olo, yi taulo Masiri mamoloi̒ya deu̒ Eeya diila mambo modelo bangusaa-Mu ode lipu u pilodanti-Mu ode limongolio, wau deu̒ EEYA modelo olimongolio ode huta luasi udelita u momate mateelo mao̒ olimongolio, sababu EEYA molonua̒ olimongolio.

²⁹ Bo ambunguolo eelailo mai, yaa Eeya, deu̒ timongolio botie bangusa tatilulaoto Eeya lowali umati-Mu, wau dilelo-Mu mai lonto Masiri wolo olootolo wau okokawasaa-Mu uleidaa̒.”