TINGULI 8 - KITABI HABARI MOPIOHE

Huta umopiohe u potibiluloa̒lo

¹ “Ngoa̒amila butoo̒ uilohi mai lowatia ode limongoli todulahee botie musi pohutuo mao̒ limongoli wolo tatapu wau molotolo hilao, alihu timongoli debo tumutumulo, oduhenga mola dadaata wau motibiluloa̒ tohuta udilanti mai lo Eeya odeli nenemoya limongoli.

² Eelai mola! Wopato pulu lotaunu hiheolio Eeya Allahu Taa̒ala limongoli lodelo olimongoli todelomo nonao̒ molaminga lolibaya tohuta luasi udelita. Nonao̒ boito milakusudu lo Eeya u mohimontala olimongoli, alihu Tio mowali moo̒onto mao̒ wolo ubuhu-buhulo todelomo hilaa limongoli wau wolo timongoli mamodungoheo̒ totoonulalo palentaa-Lio.

³ Tio lopoluli mao̒ olimongoli pola-polaango, lapatao̒ timongoli yilohia-Lio maana u mowali aaloolo. Timongoli wau loluuhuru limongoli diila pee̒enta mao̒ lolamela ua̒alo boito tou̒ dipo-dipolulio mai. Eeya helohutu mao̒ odito u mongaajali mai olimongoli deu̒ manusia diila bo tumumulo monto ua̒alo wambao̒, bo monto totoonulalo hitua-tuawua u pilotahuda mai lo Eeya.

⁴ Ngotilonggadu wopato pulu lotaunu mola botie pakeyangi limongoli diila lowali yiloodulo wau oa̒ato limongoli diila lowali lomatango.

⁵ Eelai mao̒ deu̒ Eeya Allahu Taa̒ala limongoli helo ngaajali mai olimongoli debo odelo tiyamo ngota mongaajali mongo walai̒o.

⁶ Oditolio, pohutua mao̒ ngoa̒amila upilo malentai lo Eeya Allahu Taa̒ala limongoli. Potitumulolo modudua̒ bubuu-too̒o-Lio wau hulumatia mao̒ Tio.

⁷ Eeya Allahu Taa̒ala limongoli lodelo olimongoli ode lipu u molomiodu; lipu udadaata dutulaa wau butu lo taluhio, wolo tolohu taluhu towalungo huta u mopentela ode luluu-mbayaalo wau huhuu-luduwaalo.

⁸ Lipu boito mongohi mai tilapulo pale u hidala-dalaala, angguru, hungo lo ara, hungo lodalima, bungo lo ayu jaitun wau hula lotiia̒.

⁹ Mota teto timongoli diila tapolaangolo meaalo o kulangialio. Patihio tahutahu wate, wau monto huhuuludio timongoli moo̒ kau̒de tombaha.

¹⁰ Timongoli mamolamela tunggula olulia lohilao, wau mosukuru ode Eeya Allahu Taa̒ala limongoli duo̒lo huta molomiodu uilohi-Lio mai olimongoli.”

Poe̒ela alihu diila mao̒ molipata to Eeya

¹¹ “Poo̒dahai mao̒ tio̒otutua diila bolo timongoli molipata to Eeya Allahu Taa̒ala limongoli; diila mao̒ palonga penu boli tuwau mao̒ monto ngoa̒amila buto-I̒o uilohi mai lowatia ode limongoli todulahee botie.

¹² Wonu timongoli malo lamelao̒ tunggula ilolulia lohilaa limongoli wau malomangu bebee-leyaalo u mopiohu duo̒lo tambati potibiluloa̒ limongoli,

¹³ wau wonu mai̒lo duhenga mola sapi wau batade wau himba limongoli, talaa̒ wau hulawa limongoli boli totoonulalo halata miliki limongoli uwewo,

¹⁴ poo̒dahai mao̒ tio̒otutua alihu timongoli diila mowali sombongi wau molipata to Eeya Allahu Taa̒ala limongoli talo lopatai olimongoli lonto Masiri, tambati limongoli pilowatolio.

¹⁵ Eeya talodelo olimongoli lolibaya huta delita u luasi wau u moo̒tihela hapato, udadaata tulidu obisa wau bambaulio. Tohuta u mohengu lou̒ diila otaluhu Tio helohutu taluhu tilumolohei lonto botu alihu timongoli mowali mongilu tunggula olulia lohilao.

¹⁶ Tohuta luasi udelita Tio longohi mai manna utamelo limongoli, ua̒alo udiila otaawa linene moya limongoli. Eeya helohutu mai uito u mohimontala olimongoli wau mopodupapa hilaa limongoli, alihu to pulitio mao̒ Eeya moo̒hutu mai u mopiohe ode limongoli.

¹⁷ Oditolio, sama-samaata diila mao̒ pomikiilangi deu̒ wolo tolopani wau olootoli mongoli lohihilao timongoli mowali kaya.

¹⁸ Eelai mao̒ deu̒ Eeya Allahu Taa̒ala limongolilo tamongohi mai okokaya boito ode limongoli. Sua̒li boito pilohutu-Lio sababu tunggula todulahee botie Tio donggo tatapu wau molotolo hilao todaantia u pilohutu-Lio woli nenemoya limongoli.

¹⁹ Diila mao̒ lipata to Eeya Allahu Taa̒ala limongoli wau diila mao̒ pobale ode ila-ila wewo u molubo wau motiwato to ii̒i-lawaalo boito. Todulahee botie poe̒elau̒ mai olimongoli deu̒ wonu timongoli debo mohutu mao̒ olo, yi timongoli tantulo mao̒ pobinasa mai lo Eeya.

²⁰ Wonu timongoli diila modungohe to Eeya Allahu Taa̒ala limongoli, yi timongoli olo mapo binasaa-Lio, debo odelo babaa-ngusawalo tailopua-Lio totalu lomato limongoli.”