TINGULI 7 - KITABI HABARI MOPIOHE

Umati tatilulaoto Allahu Taa̒ala

¹ “Eeya Allahu Taa̒ala limongoli mamodelo olimongoli ode lipu u mapoti biluloa̒ limongoli, wau dadaata bangusa mapolahio-Lio monteeto. Totalu lomatomu Tio mamopolahi mao̒ pitu bangusa talebe udaa̒ wau molotolo woli mongoli, deu̒yito-yito tau-tauwalo Het, Girgasi, Amori, Kanaa̒n, Peris, Hewi wau Yebus.

² Wonu bolo Eeya Allahu Taa̒ala limongoli mohudu mai babaa-ngusawalo boito ode delomo kawasaamu wau timongoli mopoo̒laaheo̒ olimongolio, pateaalo timongolio ngoa̒amila mate-mateelo mao̒. Diila mao̒ tolia̒ngi timongolio meaalo mohutu daantia woli mongolio.

³ Timongoli diila mowali monika woli mongolio, diila tapolulia mongo walai̒ mongoli monika woli mongolio,

⁴ alihu timongolio diila tamo pohalaheo̒ mongo walai̒ mongoli monto Eeya u molubo ila-ila wewo. Wonu timongoli molubo ila-ila wewo, Eeya muluka wau timongoli mahua̒a pobinasaa-Lio.

⁵ Sababu uito, lohubuwalo memees-bawaala lo babaa-ngusawalo boito, antuluwalo wowoo-lihiyaalo botu u hea̒nggapuo limongolio aulia, wombahelo tutuuotaalo Asyera, wau pobuwalo bubuu-iyaalo lo balaahala u hetuboo limongolio.

⁶ Pohutuwalo mao̒ ngoa̒amilalo boito sababu timongoli miliki lo Eeya Allahu Taa̒ala limongoli. Monto totoonulalu bangusa totudu lodunia, timongolilo tatilulaoto Eeya Allahu Taa̒ala limongoli.

⁷ Timongoli pilonu wau tilulaoto Eeya, diila kalana timongoli lebe udaa̒ wolo babaa-ngusawalo wewo; tutuulio tutu timongoli yito bangusa talaba-labaalo kikiio̒ totudu lodunia.

⁸ Bo Eeya molulaotao̒ olimongoli sababu Tio momonu olimongoli wau ohilaa moe̒elai danti u pilohutu-Lio woli nenemoya limongoli. Uitolo sababuulio Tio malo poa̒ahu mai olimongoli wolo kawasa udaa̒ wau lolopato olimongoli lonto sua̒li lowali wato toli olongia lo Masiri.

⁹ Eelai mao̒ deu̒ Eeya Allahu Taa̒ala limongoli yito tatuwa-tuwaulo Allahu Taa̒ala, wau Tio Allahu Taa̒ala utatapu wau molotolo hilao. Eeya mopoo̒polu dantilio wau mopobilohei ponu-Lio utatapu tunggula ngolihu mola wali ode taa u motolia̒nga o-Lio wau modungohe totoonulalo palentaa-Lio.

¹⁰ Bo wolo diila moomu-moomu Tio mohukuumani mai olimongolio tamolonua̒ o-Lio.

¹¹ Oditolio, dungohi mao̒ ngoa̒amila butoo̒ u potunggulai laatia olimongoli todulahee botie.”

Balakati duo̒lo taa u modungohe

¹² “Wonu timongoli mopoo̒tuoto totoonulalo palenta boito, wau mohutu mao̒ wolo tatapu wau molotolo hilao, yi Eeya Allahu Taa̒ala limongoli olo matatapu wau molotolo hilao to daantia u pilohutu-Lio mai woli mongoli. Tio mamopo bilohei ponu-Lio utatapu olimongoli, debo odelo u pilodanti-Lio mai ode loluuhuru limongoli.

¹³ Tio mamomonu wau mobalakati mai olimongoli, tilinggula walai̒ mongoli dadaata wau jumulaa limongoli heo̒duhenga mola. Tio mamo balakati mai ii̒i-lengiyalo limongoli, tilinggula mongohi mai tilapulo pale, angguru wau winulo jaitun. Tio mamo balakati mai olimongoli tilinggula dadaata sapi wau batade himba limongoli. Ngoa̒amila balakati boito matolimo limongoli tolipu uwohi mai lo Eeya ode limongoli, tutuuu̒de wolo danti-Lio odeli nenemoya limongoli.

¹⁴ Monto ngoa̒amila bangusa todunia, diaaluo penu tuwau mao̒ tamoo̒tapu balakati laba-labaalo daatalio debo odelo timongoli. Monto olimongoli ngoa̒amila wau monto totoonulalo bibiahi mongoli diaaluo penu boli tuwau mao̒ u bintela.

¹⁵ Timongoli maduo̒la mai lo Eeya monto totoonulalo ngongoto wau powalahu-Lio monto totoonulalo baala u silakusia limongoli to Masiri, bo mowali mopolahi boito mapo dunggaa-Lio ode mumuu-suwaalo limongoli.

¹⁶ Timii̒du bangusa tawuduo mai lo Eeya Allahu Taa̒ala limongoli ode delomo kawasa limongoli musi pobinasa mao̒ limongoli; diila mao̒ pobilohe tolia̒ngo ode limongolio. Diila mao̒ polubo ila-ila limongolio, sababu huhutu boito moo̒toduo mai topotala ode limongoli.

¹⁷ Tanu todelomo pikilangi limongoli babaa-ngusawalo boito lebe udaa̒ jumulaalio tilinggula timongoli diila mowali mopolahi olimongolio.

¹⁸ Bo diila mao̒ oohe toli mongolio; eelai mola wolo u pilohutu lo Eeya Allahu Taa̒ala limongoli toli olongia lo Masiri wau ngoilanggubu ulipulio.

¹⁹ Eelai mola babaa-lawaalo ulaba-labaalo u silakusia limongoli lohihilao, totoonulalo moo̒linggolabu, wau olootolo daa̒ u pilomake lo Eeya Allahu Taa̒ala limongoli u lolopato olimongoli. Odito olo Eeya Allahu Taa̒ala limongoli mamo pohutu mao̒ to ngoa̒amila bangusa tao̒ohe limongoli.

²⁰ Tumbao̒ Eeya Allahu Taa̒ala limongoli mamopo toodei buluhuto daa̒ towolota limongolio, tilinggula tau-tauwalo tamoo̒ lahi batanga wau motituuo̒ olo mabinasa.

²¹ Oditolio diila mao̒ oohe to babaa-ngusawalo boito. Eeya Allahu Taa̒ala limongoli moduo̒lai olimongoli. Tio yito Allahu Taa̒ala tau̒daa̒ wau moo̒tihela hapato.

²² Babaa-ngusawalo boito mapolahio-Lio ngoi̒di domi ngoi̒di monto talu limongoli. Timongoli diila mowali mopobinasa mao̒ olimongolio wolo molamemeto, alihu bibii-natangiyalo mongantau diila mao̒ oduhenga dadaata wau mowali monganjamu olimongoli.

²³ Odi-odieelo mola Eeya Allahu Taa̒ala limongoli mamohudu mai mumuu-suwaalo limongoli ode limongoli. Tio mamopo pupuuyoto lomao̒ olimongolio tunggula timongolio binasa.

²⁴ Tio mamohudu mai mongo olongia limongolio ode limongoli. Timongolio mapatee limongoli mate-mateelo mao̒, wau tangguli mongolio malipatolo. Diaaluo penu boli ngotaa mao̒ tamoo̒ tahangi motaalua woli mongoli; timongolio ngoa̒amila mapo binasa mao̒ limongoli.

²⁵ Tumbiliilo bubuu-iyaalo balaahala u hetuboo limongolio. Diila mao̒ poa̒ahudu totalaa̒ meaambo hulawa udembi-dembinga to olio wau diila mao̒ hamaawa duo̒lo batangamu lohihilao. Wonu timongoli molambanga palenta boito yi timongoli maamate, sababu Eeya Allahu Taa̒ala limongoli molonuo̒ molubo bui̒ balaahala.

²⁶ Diila mao̒ potambatia bui̒ balaahala tuwau todelomo bele limongoli, alihu laa̒anati u motoduo mai olio diila mao̒ motoduo mai to olimongoli olo. Sua̒li boito musi lonui̒ mao̒ limongoli wau bilohela dupadupapa, sababu yilaa̒anatia lo Eeya.”