TINGULI 3 - KITABI HABARI MOPIOHE

Israel lopoo̒laaheo̒ li Olongia Og

¹ “Lapatio mao̒ ito loo̒olioo̒ ode tilayo lotidulunga ode madala Basan. Tei Og, olongia lo Basan lomaju wolo ngoa̒amila suludadulio u loluhu olanto totili lokota Edrei.

² Bo Eeya lotahuda mai ode laatia, ‘Diila mao̒ oohe olio, Musa. Wau̒ mamohudu mai olio, suludadulio wau ngoilanggubu madalalio olemu. Pohutuwamu mao̒ tio debo odelo umaa pilohutumu olei Sihon, olongia lo Amori tapale-palenta to Hesybon.’

³ Oditolio Eeya Allahu Taa̒alanto olo lohudu mai li Olongia Og wau ulipulio ode olanto, wau timongolio ngoa̒amila ilolaahento.

⁴ Tou̒ boito hilamanto ngoa̒amila kotalio, diaaluo penu boli tuwau mao̒ uleitolaa. Ngoa̒amilalo maito wolomo pulu kota u hilamanto to ngoilanggubu madala lo Argob, upale-palenta li Olongia Og lonto Basan.

⁵ Ngoa̒amila kota boito piloo̒ toheetio wolo didii-ngingaalo meeseli u hilaanggata, huhuu-hebuwaalo hulubangi wau papaa-langiyala lohuhebu u lolau̒beo̒ huhuu-lubangiyalo boito. Ngopohia leeto woluo dadaata kota wewo udiila odingingo meeseli.

⁶ Ngoa̒amila kota boito ilantulunto mao̒, wau ngoa̒amila mongo lolai̒, mongobua wau tau̒kekeei̒ limongolio pilatento yila-yilateelo mao̒, debo odelo u pilohutunto mao̒ wolo kokoo-tawaalo li Olongia Sihon lonto Hesybon.

⁷ Bibiahu limongolio hilamanto wau kokoo-tawaalo boito yilambatonto.

⁸ Tou̒ boito hilamanto lonto li olongia duulota lo Amori boito madala to ambahu tiimuru Dutulaa Yordan wau dutulaa Arnon demola Hui̒dee Hermon. (

⁹ Hui̒dee Hermon ilunte Siryon lotau Sidon, wau Senir lotau Amori.)

¹⁰ Hilamanto ngoilanggubu madala li Olongia Og lonto Basan: kokoo-taalio todatahu lengge-lengge, lipu lo Gilead wau Basan, tulusi demola tiimuru ngoilaminga kota lo Salka wau Edrei.” (

¹¹ Ti Olongia Og yito taulo Repaim tapulitio. Bulua lo milatelio pilohutu lonto botu, hayai̒o wopato meeteri wau tanggalio ngopee̒ dulo meeteri lodudua̒ tuuu̒du u tilantulio mao̒. Tunggula botia donggo mowali oontonga to Raba, kota taulo Amon.)

Susuu-kuwaalo tahi biluloa̒wa tomadala ambahu tiimuru lo Dutulaa Yordan

¹² “Lapatao̒ huta boito lowali milikinto, yilohi mao̒ lowatia ode suku Ruben wau Gad madala to ambahu tilayo lokota Aroër totili lo Dutulaa Arnon, wau ngotayadu madala hihui̒-hui̒dea lo Gilead, leituwoto kokoo-taalio.

¹³ To ngotayadu suku Manasye yilohia lowatia labito madala lo Gilead, wau olo madala lo Basan bakasi jajaahani lei Og, deu̒yito-yito ngoilanggubu madala lo Argob.” (Basan masa-masaahulu odelo lipu taulo Repaim.

¹⁴ Tei Yair lonto suku Manasye helohama ngoilanggubu madala lo Argob, deu̒yito-yito lonto Basan demola sipatana lo Gesur wau Maakha. Tio longunte mao̒ kakaa-mbunguwalo boito loduduo̒ tanggulio lohihilao, wau tunggula botia donggo masa-masaahulu odelo kakaa-mbunguwalo lei Yair.)

¹⁵ “Madala lo Gilead yilohi mao̒ lowatia ode kaumu Makhir lonto suku Manasye.

¹⁶ Wau to susuu-kuwaalo Ruben wau Gad yilohia mao̒ laatia madala towolota lo Gilead wau Dutulaa Arnon. Tohuungo dutulaa boito debo odelo siipati limongolio to ambahu huliaalio, hiambola totilayo limongolio sisiipatia wolo Dutulaa Yabok, u ngotayadio debo odelo siipati lolipu taulo Amon.

¹⁷ To ambahu otolopa, lipu limongolio bua̒-bua̒de demola Dutulaa Yordan, lonto Bulalo Galilea totilayo demola Lau Mati to ambahu huliaalio, tulusi demola bungo lo hui̒dee Pisga to ambahu tiimuru.

¹⁸ Tou̒ boito yilohi mao̒ lowatia ode limongolio palenta botie: Eeya Allahu Taa̒ala limongoli longohi mai olemu madala to ambahu tiimuru lo Dutulaa Yordan mowali tambati poti biluloa̒mu. Bo mongo pajulemu musi otingolo wau mobalangao̒ Dutulaa Yordan meimulo mota wolo susuu-kuwaalo Isirai̒lu uwewo.

¹⁹ Bo walao̒ wau dile taabua limongoli wau bibiahu limongoli u dadaata mowali motibiluloa̒ to kokoo-tawaalo umailohi mai lowatia olimongoli.

²⁰ Bantui mao̒ tau-tauwalo ngobangusamu tunggula huloa̒a mao̒ limongolio huta u mawohi mai lo Eeya Allahu Taa̒alamu ode limongolio to ambahu otolopa lo Dutulaa Yordan, wau tunggula Eeya mopoluasi mao̒ olimongoli tumumula wolo tantaramu mola teto, debo odelo u pilohutu-Lio mai olimongoli tewe. Bolo lapatao̒ uito timongoli mohualinga mota ode huta miliki limongoli u mailohi mai lowatia ode limongoli.

²¹ Lapatao̒ watia loloi̒ya mao̒ odelei Yosua: Yio̒ maloo̒onto ngoa̒amila upilohutu mai lo Eeya Allahu Taa̒alamu odelei Sihon wolei Og, olongia duulota boito. Odito olo Eeya mamopohutu mao̒ timii̒du olongia u hutaalio hilamamu.

²² Diila mao̒ oohe toli mongolio, sababu Eeya Allahu Taa̒alamu mamohipate duo̒li mongoli.”

Tei Musa diila yiluasia-Lio tumuwota ode Kanaa̒n

²³ “Tou̒ boito watia lomolohone ode Eeya:

²⁴ Yaa Eeyaa Taa Laba-labaalo molanggato, otaawa lowatotia deu̒ upilo bilohei lo Eeya olo watotia botie boheli debo odelo huhuu-tuwaalo Eeya uleidaa̒ wau moo̒linggolabe. Diaaa̒ ila wewo tohulungo meaalo todunia tadebo odelo Eeya u moo̒ hutu susuu-aliyaalo upolu-polutuo̒.

²⁵ Ambunguolo poluasia mai watotia mobalango Dutulaa Yordan, yaa Eeyaa, mola momilohe lipu u molomiode to ngotuali, madala hihui̒-hui̒dea ugaaga daa̒ wau hihui̒-hui̒dea lo Libanon.

²⁶ Bo timongoli maloo̒ sababu to Eeya lomuluka mai to olaatia tilinggula Tio diila lohuto lodungohe polohone lowatia. Bolii̒o mao̒ Eeya lotahuda mai, ‘Malo tuuu̒de, Musa, diilalo mao̒ tanggulamu sua̒li boito!

²⁷ Ponao̒lo ode bolitutuo̒ Hui̒dee Pisga wau pomilohulo mola ode ambahu tilayo wau huliaalio, ode tiimuru wau ode otolopa. Poo̒tuota mao̒ tio̒otutua wolo u oontongamu boito, sababu yio̒ diila tamo balango Dutulaa Yordan.

²⁸ Wohia mao̒ potuhata tei Yosua. Poo̒lotola mao̒ hiaalio, sababu tiolo tamaa modelo bangusa boito ode ngotuali umotihuloa̒a tolipu u iloontongamu boito.’

²⁹ Yi maloti biluloa̒ao̒ ito to lumbaya to ngotuali lo kota Bet-Peor.”