TINGULI 26 - KITABI HABARI MOPIOHE

Dewo monto tilapulo sembo

¹ “Wonu bolo timongoli matilumuwoto ode lipu uilohi mai lo Eeya Allahu Taa̒ala limongoli ode limongoli wau malo tibiluloo̒ mota teto,

² yi bohulo tilapulo monto totoonulalo u wimoo̒ limongoli monto huta limongoli musi potuwota mao̒ limongoli ode delomo kalanji, wau deloo mota limongoli ode tambati u tilulaoto Eeya Allahu Taa̒ala limongoli.

³ Ponao̒lo mota odeli iimamu tao̒ tuugasi tou̒ boito wau loi̒ya mao̒ olio, ‘Watia mopoi̒laalo ode Eeya Allahu Taa̒ala limongoli deu̒ watia matilumuwoto ode lipu u pilodanti-Lio mai odeli nene moyanto uilohi ode olanto.’

⁴ Ti Iimamu mamo lolimo kalanji boito monto uluu̒ limongoli wau mopodutu mao̒ totalu mesba lo Eeya Allahu Taa̒ala limongoli.

⁵ Lapatao̒ totalu lo Eeya Allahu Taa̒ala limongoli, timongoli musi moloi̒ya mao̒ tataa-heyaalo botie: ‘Yaa Eeya, nenemoya lo watotia ngotaalio lo Aram talonao̒ ode utoonulalo mao̒. Tio lodelo mola ngaalaa̒lio ode Masiri u lotibiluloa̒ mola teto odelo talo poa̒ahu batanga ode tambati u aamani. Tou̒ lonao̒ mola odito jumulaa limongolio bo ngoi̒di daa̒, bo timongolio lowali bangusa daa̒ wau hilootola.

⁶ Taulo Masiri helo pohutu mao̒ olo mongowatotia lou̒ diila omanusia wau lomakusa olo mongowatotia helo kalaja odelo wato.

⁷ Lapatao̒ mongowatotia helo ngiibode lei̒ tulungi mai to Eeya, Eeya Allahu Taa̒ala linenemoya lo mongowatotia. Wau Eeya malo dungohe iibodu lo mongowatotia wau loo̒onto polodutolo, osuusa boli polodutolo wau osuusa lotutumulo mongowatotia.

⁸ Wolo kawasa wau olootolo uleidaa̒ Eeya lopo lopato olo mongowatotia lonto Masiri. Eeya helohutu mumuu̒u-jijatiyalo wau totoonulalo momoo̒o-linggobeyalo boli helo potoodeo̒ popoo-lou̒tiyalo uloo̒ geegeri tomusu.

⁹ Lapatao̒ Eeya lodelo olo mongowatotia odia wau longohi mao̒ huta ukaya wau molomiodu botie ode mongowatotia.

¹⁰ Sababu uito, yaa Eeya, watotia mopodewo mao̒ tewe bohulo tilapulo monto huta uilohi mai lo Eeya ode watotia.’ Lapatao̒ podutua mao̒ kalanji boito totalu lo Eeya Allahu Taa̒ala limongoli, wau tubowalo Tio.

¹¹ Posukurulo duo̒lo totoonulalo lijiki u mailohi mai lo Eeya Allahu Taa̒ala limongoli ode limongoli wau ngaalaa̒ limongoli. Heinga mao̒ taulo Lewi wau tau deli tabilu-biluloa̒ towolota limongoli modudua̒ todelomo lameyangi boito.

¹² Timii̒du taunu u otolulio timongoli musi mongohi mao̒ dewo ngotayade mopulu, deu̒yito-yito ngotayade mopulu monto tilapulo huta limongoli odeli iimamu Lewi, tau deli, walao̒ tadidu otiilo otiyamo wau janda, tilinggula todelomo motii̒du kota limongoli timongolio moo̒tapu ua̒alo u palaluo limongolio. Wonu mailapato,

¹³ lapaliya mao̒ ode Eeya Allahu Taa̒ala limongoli odie, ‘Monto ngotayade mopulu tilapulo huta umusi podewolo ode Eeya, yaa Eeya, diaaluo uleitolaa penu boli ngoi̒di mao̒; ngoa̒amilalo mailohi lo watotia ode taulo Lewi, tau deli, walao̒ tadidu otiilo otiyamo wau janda, debo odelo upilo malentai lo Eeya Allahu Taa̒ala lo watotia ode watotia. Monto palenta lo Eeya tomimbihu dewo ngotayade mopulu diaaluo u yilamabanga lo watotia.

¹⁴ Monto dewo boito diaaluo penu boli ngoi̒di mao̒ u tilamela lo watotia tou̒ watotia donggo limilimi, meaalo dilelo watotia ode bulemengo bele tou̒ watotia donggo najisi, meaalo yilohi lo watotia odelo pohinta ode taa yilate. Watotia malo dungohe to Eeya, yaa Eeya; ngoa̒amila upilo malentai lo Eeya mapilohtu lo watotia.

¹⁵ Monto tambati lo Eeya umantali tosologa potala Eeya momilohei wau mobalakati mao̒ umati lo Eeya bangusa lo Isirai̒lu; ambunguolo balakatia mai olo lipu ukaya wau molomiodu u mailohi mai lo Eeya ode mongowatotia tutuuu̒de wolo danti lo Eeya ode nenemoya lo mongowatotia.’ ”

Umati tatilulaoto Eeya

¹⁶ “Todulahee botie Eeya Allahu Taa̒ala limongoli momalentai olimongoli u mohutu mao̒ ngoa̒amila palenta boito; pohutua mao̒ ngoa̒amilalo wolo tatapu wau molotolo hilao wau wolo lealeaatu lojiwa batangamu.

¹⁷ Todulahee botie timongoli momasisi Eeya odelo Allahu Taa̒ala limongoli. Timongoli modanti mao̒ u modungohe to Olio wau mohutu ngoa̒amila butoo̒ wau palentaa-Lio.

¹⁸ Todulahee botie Eeya mololimo olimongoli odelo umati-Lio lohihilao, debo odelo upilo danti-Lio mai ode limongoli, wau Tio momalentao̒ olimongoli u mohutu totoonulalo palentaa-Lio.

¹⁹ Eeya mamohutu mai olimongoli lebe udaa̒ monto bangusa tamaa pilowali-Lio, wau timongoli mapujio wau hulumatiolio. Timongoli mowali umati lo Eeya Allahu Taa̒ala limongoli debo odelo upilo danti-Lio mai.”