TINGULI 25 - KITABI HABARI MOPIOHE

¹ Humaya mao̒ duulota taulo Isirai̒lu monao̒ ode bubutoo̒ u mopo duloheo̒ palakala tuwau, lapatao̒ tangotaalio piloi̒laalo diila ototala, wau tawewo ototala.

² Wonu tao̒totala dehuwalo, hukuumani buboa̒alo, ti hakimu musi mopoa̒hu mao̒ olio motibonggohuu̒. Jumulaa pomuboa̒ala olio modudua̒ tou̒ ololeeto umaa pilohutulio,

³ bo diila mowali lebe lou̒ poo̒opato pulu. Wonu lebe, uito boliilio tau boito hilina totalu lotaa dadaata.

⁴ Diila mao̒ tongguu̒mi tunggilo sapi u donggo hemoheede pale.”

Uwajibu ode ngotaalio lowutato tailate

⁵ “Wonu tau-tauwalo tamohutato motibiluloa̒ pee̒-pee̒enta, lapatao̒ tala ngota limongolio mate lou̒ diila lololaa mao̒ walao̒ talolai̒, yi jandalio diila mowali monika wolo tawewo to bulemengo ngaalaa̒ lodile tailate boito. Wutato lo tailate boito musi monika mao̒ wolo janda boito.

⁶ Walao̒ talolai̒ mohuhula daa̒ limongolio musi anggapuola walao̒ lowutato tailate boito, alihu tio owali towolota bangusa lo Isirai̒lu.

⁷ Wonu tio diila mohuto monika wolo dile lowutato tailate, yi taabua boito musi monao̒ mota motaalua wolo tahimuloa lokota wau moloi̒ya mao̒, ‘Wipahu lowatia diila mohuto mohutu uwajibu olio u mongohi ode wutatio ngotaalio lo wali towolota bangusa lo Isirai̒lu.’

⁸ Lapatao̒ tahimuloa lokota musi motiangao̒ tau boito wau mobisala wolio. Wonu tio debo diila mololimo,

⁹ dile lowutatio tailate musi mohimbideo̒ olio totalu lo tahimuloa lokota, momahutao̒ sandale lotau boito, monula loiyohu tobayalio wau moloi̒ya mao̒, ‘Odie mola umusi pohutuo mao̒ lotaa udiila mohuto mongohi wali ode wutatio.’

¹⁰ Ngaalaa̒ lotau boito mao̒onuhe to Isirai̒lu odelo ‘Ngaalaa̒ lotaa u pilomahuta sandalelio.’ ”

Wuwuu-uduwaalo uwewo

¹¹ “Wonu duulota mongo lolai̒ donggo hemoloohulua wau dile lo taa ngotaalio motolopani mao̒ motulungi dilelio wolo momitilao̒ tilalua tuwali lodilelio,

¹² yi pontode mao̒ uluu̒ lo taabua boito diila mao̒ potolia̒nga olio.

^13-14 Diila mao̒ pohimbulo wolo momake titimenga wau tuuu̒du udiila otutu.

¹⁵ Pomakea mao̒ titimenga wau tuuu̒du u tuhaata alihu humayao̒ tutumuli mongoli tolipu uwohi mai lo Eeya Allahu Taa̒ala limongoli ode limongoli.

¹⁶ Eeya Allahu Taa̒ala limongoli molonua̒ totaa motohilaa mohimbulo.”

Palenta u momate-mateelo mao̒ taulo Amalek

¹⁷ “Eelai mao̒ woloolo mola taulo Amalek helo pohutu olimongoli tou̒ timongoli todelomo nonao̒ yilumualai lonto Masiri.

¹⁸ Timongolio diila moohe to Allahu Taa̒ala wau heloluhu olimongoli lonto wulea tou̒ timongoli donggo hiwoongola wau ilopulita lo lotolo, tulusi helomate ngoa̒amila tau-tauwalo limongoli yila-yilateelo mao̒ u wolo tio̒opatea hinao̒wa towulea.

¹⁹ Masababu uito, wonu Eeya Allahu Taa̒ala limongoli malongohi mai lipu boito ode limongoli wau timongoli aamani monto ngoa̒amila muusu tahi biluloa̒wa topalito limongoli, yi ngoa̒amila taulo Amalek boito musi pateelo mate-mateelo mao̒ limongoli alihu timongolio diilalo o eela. Diila mao̒ lipata!”