TINGULI 21 - KITABI HABARI MOPIOHE

Palakala polomatea mate-mateelo mao̒ udiila mowali putusiyolo

¹ “Wonu bolo tolipu uwohi mai lo Eeya Allahu Taa̒ala limongoli ode limongoli woluo taa u odungga mate ilopatea yila-yilateelo mao̒ to halabolu wau diila ilotahua tatoonu talomate olio yila-yilateelo mao̒,

² yi tau̒wa wau hakimu limongoli musi monao̒ mota moluu̒udeo̒ aantahe monto tambati lomilate boito ilodungga ode timii̒du kota u wiwiimbide.

³ Lapatao̒ tahimuloa lolipu monto kota u membidee daa̒ musi molulaotao̒ sapi buboto tuwau udiipo pee̒enta mao̒ pilomake mokalaja.

⁴ Sapi boito musi deloo mota limongolio ode tambati tuwau totili lodutulaa udiila pee̒nta mao̒ helohengu wau u hutalio diila pee̒enta mao̒ pilomuloa. Mota teto timongoli musi momoli mao̒ buloo̒ lo binatangi boito.

⁵ Mongo iimamu lo Lewi olo musi monao̒ mota odito olo, sababu timongolio musi mongohi mao̒ putuusani todelomo timii̒du palakala udiila omanusia. Timongolio tilulaota lo Eeya Allahu Taa̒ala limongoli u taa̒luku wau hulumati to Olio wau molapali mao̒ balakati totanggu-Lio.

⁶ Lapatao̒ ngoa̒amila tahimuloa lolipu monto kota u membidee daa̒ musi mongulo mao̒ uluu̒ limongolio toitaato sapi boito

⁷ wau moloi̒ya mao̒, ‘Diila ami talomate yila-yiteelo mao̒ totau boito, wau diila otaawa lami tatoonu talohutu uito.

⁸ Yaa Eeya, ambungua mai Isirai̒lu umati lo Eeya tailopato lo Eeya lonto Masiri. Ambungua mai mongo watotia wau diila mao̒ anggapua mongo watotia tatihu-tihula to polomatea mate-mateelo mao̒ taa udiila ototala.’

⁹ Yi lou̒ mohutu mao̒ wolo u pilohile wolo moo̒ohuu̒ lo Eeya, timongoli diila ilanggapu tatihu-tihula to polomatea mate-mateelo mao̒ boito.”

Wuu̒du pasali lotaabua tapilowali tawalo popaatea

¹⁰ “Wonu bolo timongoli mopaatea wau Eeya Allahu Taa̒ala limongoli mongohi olimongoli u moo̒haama, tulusi timongoli mohama mao̒ tawalo popaatea,

¹¹ tanu towolota limongolio woluo ngotaalio lotaabua gaaga u otohilaa limongoli wau ohilaa powalio limongoli dile.

¹² Delowalo taabua boito ode bele limongoli. Mota teto tio musi mohuntinga huwoi̒o, mohuntinga luo̒bio,

¹³ wau moluloo̒ pakeyangi. Tio musi motibiluloa̒ tobele limongoli motilimi to opopate lomongo dulaa̒lio ngotilonggadu ngohula mola. Lapatao̒ uito yio̒ mowali monika wolio.

¹⁴ Wonu todulahee momooli yio̒ diilalo motohilaa olio, yio̒ diila mowali mopoa̒hu olio monao̒ wolo beebasi. Tio diila mowali pohutuwomu debo odelo wato meaalo potalimu, sababu tio mapilakusamu lou̒lauwa wolemu.”

Wuu̒du tomimbihu wariisani lowalao̒ tamohuhula daa̒

¹⁵ “Humaya mao̒ ngotaalio odile taabua duulota, wau duduulotalo mopotutu mai walao̒ talolai̒, bo walao̒ tameimulo potutuolio mai diila walao̒ monto dile taa otolia̒ngio.

¹⁶ Wonu tau boito ohilaa molantu mao̒ woloolo mola tio mamo layadeo̒ okokayalio ode mongo walai̒o, yi tio diila mowali motiwambao̒ towalao̒ monto dile taa otolia̒angio wolo mongohi mao̒ to walao̒ boito tayadu u mowali haku lowalao̒ tamohuhula daa̒.

¹⁷ Tio musi mongohi mao̒ tayadu poo̒oluo piu̒wa monto halata upangio ode walao̒ talolai̒ tamohuhula daa̒, eleponu walao̒ boito diila walao̒ monto dile taa otolia̒ngio. Haku lowalao̒ tamohuhula daa̒ boito musi akuo mao̒ liyamolio, wau towalao̒ boito musi wohiyalo wariisani u mowali hakuulio modudua̒ butoo̒.”

Wuu̒du tomimbihu walao̒ tajuluhaka

¹⁸ “Humaya mao̒ woluo walao̒ talolai̒ baa̒ngiyolo, ohilaa momalakala wau diila mohuto modudua̒ tomongo dulaa̒lio eleponu timongoli malo hukuumani mao̒ olio.

¹⁹ Yi mongo dulaa̒lio musi modelo mota olio ode tahimuloa lokota tambati pilo tibiluloa̒ limongolio wau mohile mao̒ alihu walao̒ boito aadiliyolo.

²⁰ Timongolio musi moloi̒ya mao̒ ode tahimuloa lokota boito, ‘Walao̒ lamiaatia botie baa̒ngiyolo, ohilaa momalakala wau diila mohuto modungohe olamiaatia; tio hemopo loyali doi wau mohuto motihuwoo̒.’

²¹ Lapatao̒ mongo lolai̒ lokota boito musi momai̒ wolo botu towalao̒ boito tunggula mate. Lou̒ odito timongoli mopodiaa̒a ololeeto boito. Ngoa̒amila tau to Isirai̒lu mamoo̒ dungohe tomimbihu u motoduo mai boito wau mamoohe.”

Wuu̒du u hidala-dalaala

²² “Wonu bolo tahingota-ngotaawa maa hilukuumani mate sababu ololeeta tuwau, wau milatelio pilontayango towolihi,

²³ yi milate boito diila mowali poluliyolo teto ngohilayaa̒ lou̒ hui, bo musi lobungolo to dulahulo boito. Milate u ntaya-ntayango towolihi mopotoduo mai laa̒anati lo Allahu Taa̒ala tolipu. Oditolio, lobunga mao̒ milate boito alihu timongoli diila moponajisi lipu uilohi mai lo Eeya Allahu Taa̒ala limongoli ode limongoli.