TINGULI 2 - KITABI HABARI MOPIOHE

¹ Pulitio mao̒ ito luli lohualinga huta datahu wau luasi udelita lolibaya dalalo udulu-dulunga ode Wulungo Akaba, debo odelo upilo malentai lo Eeya. Lohiheo ito hinao̒wa ode utoonulalo mao̒ tomadala hihui̒-hui̒dea lo Edom.

² Lapatao̒ Eeya lotahuda mai ode laatia

³ deu̒ malo tuuu̒de hiheolio ito hinao̒wa ode utoonulalo mao̒ tolipu boito. Oditolio ito musi monao̒ mola ode tilayo.

⁴ Lapatao̒ Eeya lopoa̒hu mai olaatia mongohi popoo-tuhatawalo botie ode limongoli, ‘Diilalo mohiheo timongoli matumuwota ode lipu lo Edom, madala lomongo wutati mongoli, wali lei Esau. Timongolio mamoohe to olemu,

⁵ bo timongoli diila mowali moluhu olimongolio, sababu monto huta limongolio penu boli ngoi̒di mao̒ diila tawohi-U̒ olemu, sababu madala lo Edom mailohi-U̒ mao̒ ode wali mola lei Esau.

⁶ Timongoli mowali motali ua̒alo wau minumani monto olimongolio.’

⁷ Eelai mao̒ woloolo mola Eeya Allahu Taa̒ala limongoli malo balakati mai olimongoli todelomo totoonulalo upilohutu limongoli. Tio lolaala olimongoli ngotilonggadu timongoli hinao̒wa ode utoonulalo mao̒ tohuta datahu udelita u luasi botie wau helongohi mai olimongoli ngoa̒amila upalaluo limongoli.

⁸ Lapatao̒ ito lonao̒ tulusi, lololaa mao̒ dalala u loli kokoo-tawaalo Elat wau Ejion-Geber dulu-dulunga ode Lau Mati, tulusi mobale ode tiimuru lau dulu-dulunga ode Huta Luasi lo Moab.

⁹ Eeya lotahuda mai ode laatia, ‘Taulo Moab, wali lei Lot, diila mowali puyuwo limongoli. Diila mao̒ olo tuhuwo limongoli. Lipu lo Ar mailohi-U̒ ode limongolio wau lonto huta limongolio penu boli ngoi̒di mao̒ diila tawohi-U̒ olemu.’ ” (

¹⁰ Muloololio mai lipu lo Ar piloti biluloa̒ lotau Emim. Timongolio yito udaa̒ pohuwawaa̒lio, tutuuwauwa wolo taulo Enak, wau olo bangusa rakisasa.

¹¹ Debo odelo taulo Enak, timongolio olo iluntelio taulo Repaim, bo taulo Moab helongunte olimongolio taulo Emim.

¹² Muloololio mai taulo Hor bilu-biluloa̒ to Edom, bo pilopolahi wau pilopo binasaalio lo wali mai lei Esau, u lapatio mao̒ lotibiluloa̒ tohuta limongolio; odito olo bangusa lo Isirai̒lu todulahee momooli mopolahi mumuu-suulio monto huta uilohi mai lo Eeya ode limongolio.)

¹³ “Lapatao̒ ito lobalango Dutulaa Jered debo odelo upilo malentai lo Eeya ode olanto.

¹⁴ Uito lotoduo tolo pulaa walu lotaunu mola lapatio mao̒ ito lololaa mao̒ Kades-Barnea. Ngoa̒amila pajule lonto hilaide boito mailate debo odelo u tilahuda mai lo Eeya.

¹⁵ Eeya lololalaaita loluwali olimongolio tunggula pulitio timongolio ngoa̒amila binasa.

¹⁶ Lapatio mao̒ timongolio ngoa̒amila yilate,

¹⁷ Eeya lotahuda mai ode laatia,

¹⁸ ‘Todulahee botie timongoli molibaya madala lo Moab, lumaode tolipu lo Ar.

¹⁹ Yi timongoli meidungga totili lohuta taulo Amon, wali mai lei Lot. Diila mao̒ pomuyu meaalo poluhu olimongolio, sababu monto huta u mailohi-U̒ ode limongolio, diaaluo penu boli ngoi̒di mao̒ u mawohi-U̒ ode limongoli.’ ” (

²⁰ Madala boito olo masa-masaahuru odelo lipu Repaim, tanggulo bangusa u omoo̒molulio mai bilu-biluloa̒ mota teto; duo̒lo taulo Amon timongolio iluntelio taulo Jamjumim.

²¹ Debo odelo taulo Enak timongolio olo udaa̒ pohuwawaa̒lio. Timongolio molotolo daa̒, wau jumulaalio daadata. Bo Eeya lopobinasa olimongolio, tilinggula taulo Amon lohama mao̒ huta boito, tulusi lotibiluloa̒ mota teto.

²² Odito olo pilohutu lo Eeya ode taulo Edom, wali mai lei Esau, tabilu-biluloa̒ tolipu hihui̒-hui̒dea lo Edom. Eeya lopobinasa taulo Hor, tilinggula taulo Edom lohama huta boito wau hiluloa̒lio, tulusi lotitatapu mota teto tunggula botia.

²³ Huta to ngohilayaa̒ pentadu lo Lau Tenga hihuloa̒a lotau-tauwala lonto pulo Kareta. Timongolio malopo binasa mao̒ taulo Awi, ulipu pulua tohuta boito, lapatao̒ hihuloa̒lio madala boito demola huliaalio ngoilaminga kota lo Gasa.)

²⁴ “Lapatao̒ ito yilumaode tomadala lo Moab, Eeya lotahuda mai ode laatia, ‘Ponao̒lo botia mobalango Dutulaa Arnon. Wau̒ mamohudu mai olemu tei Sihon, olongia lo Amori tapale-paleenta to Hesybon, pee̒-pee̒enta wolo lipulio. Tuhuwalo tio, lapatao̒ huloi̒ mao̒ hutalio.

²⁵ Tumulalo mai todulahee botie Wau̒ mamohutu mao̒ olimongoli penu boli tou̒toonu oohe lo babaa-ngusawalo. Timii̒du tau mahumehela moohe wonu moo̒dungohe pasali olimongoli.’ ”

Isirai̒lu lopoo̒laaheo̒ li Olongia Sihon

²⁶ “Lapatao̒ watia lolao mola dengolo lota utolia lonto huta datahu wau luasi udelita Kedemot odeli Olongia Sihon lonto Hesybon u lopo tunggulao̒ patuju lo polodame botie:

²⁷ ‘Polulia mai amiaatia molibaya tolipu li Tuaniu̒. Amiaatia mamonao̒ tulusi wau diila mobolia̒ monto dalala daa̒.

²⁸ Amiaatia mamomayali mai ua̒alo u tamelo mao̒ lamiaatia wau taluhu uilumo lamiaatia. Amiaatia bo palalu lumaodeo̒ tolipu botie,

²⁹ tunggula amiaatia mobalangaa mota Dutulaa Yordan u tumuwotao̒ ode lipu uwohi mai lo Eeya Allahu Taa̒ala lamiaatia ode lamiaatia. Wali mai lei Esau tabilu-biluloa̒ to Edom wau taulo Moab tabilu-biluloa̒ to Ar olo malo poluasi olamiaatia lolibaya tomadala limongolio.’

³⁰ Bo ti Olongia Sihon diila longohi olanto lolibaya tolipulio boito. Eeya Allahu Taa̒ala limongoli helohutu mao̒ olio baa̒ngiyolo wau moluwalo hilaa alihu ito mowali mopoo̒laaheo̒ olio. Lipulio donggo hulohuloa̒a olanto tunggula botia.

³¹ Lapatao̒ Eeya lotahuda mai ode laatia, ‘Ti Olongia Sihon wau lipulio wuduo-U̒ mai olemu; hamawaalo wau huloi̒ mao̒ lipu boito.’

³² Yi malonao̒ mai tei Sihon wolo ngoa̒amila pasukanilio mai loluhu olanto totili lokota Yahas.

³³ Bo Eeya Allahu Taa̒alanto lohudu mai olio ode olanto, lapatao̒ ito lopoo̒laaheo̒ olio pee̒-pee̒enta wolo mongo walai̒o wau ngoilanggubu suludadulio.

³⁴ Tou̒ boito olo hilamanto wau ilaantulunto timii̒du kota, wau pilateento ngoa̒amila ulipulio, mongo lolai̒, mongobua, wau tau̒kekeei̒. Diaaluo tapiloluli mao̒ hitumula.

³⁵ Bibiahu limongolio hilamanto wau kokootaalio yilambatonto.

³⁶ Wolo polo tulungi lo Eeya Allahu Taa̒alanto, ito lowali lohama mao̒ ngoa̒amila kota boito, tumulalo mao̒ lonto Aroer, to huudu Lumbaya Arnon, wau kota tohuungo lumbaya boito, demola madala lo Gilead. Diaaluo kota u dingingo meeseliilio ulaba-labaalo motoheeto to olanto.

³⁷ Bo ito diila lotahudeo̒ ode madala taulo Amon meaalo biihu Dutulaa Yabok meaalo kokoo-tawaalo tomadala hihui̒-hui̒dea meaalo penu boli tambati wewo udilini lo Eeya Allahu Taa̒alanto.”