TINGULI 16 - KITABI HABARI MOPIOHE

Dulahu Buka lo Paska

¹ “Polamea mao̒ Paska tohulalo Abib u mohulumati to Eeya Allahu Taa̒ala limongoli, sababu todelomo hulalo boito, tou̒ hui, Tio helo lopato olimongoli lonto Masiri.

² Ponao̒lo ode tambati u tilulaoto Eeya u mongoloto himba meaalo sapi limongoli odelo dewo lo Paska u mohulumati to Eeya Allahu Taa̒ala limongoli.

³ Dewo lo Paska boito musi tameloolo wolo roti udiila oragi. Pitu hui mola hiheolio timongoli musi molamela roti udiila oragi, debo odelo tou̒ timongoli loololaa mao̒ huta lo Masiri wolo tametameo̒. Tamela mao̒ roti boito, roti u ilunte roti lo polodutolo, alihu ngotupa lo tutumuli mongoli timongoli mamoo̒ eela mola dulahio tou̒ timongoli loololaa mao̒ Masiri, tambati limongoli helo dutolo.

⁴ Ngotilonggadu pitu hui mola to ngoilanggubu lipu limongoli diaaluo penu boli ngotaa mao̒ tamolahu ragi tobelelio. Tapu lo bibiahu u olotolo tou̒ hui ubohulio musi tamelolo tunggula mopulito tou̒ hui boitolo.

^5-6 Bibiahu duo̒lo Lameyangi lo Paska musi olotolo totambati u tilulaoto Eeya Allahu Taa̒ala limongoli, wau diila mowali totambati wewo to ngoilanggubu lipu uilohi-Lio ode limongoli. Sua̒li boito musi pohutuo mao̒ limongoli tou̒ mato lodulahu tumolopaa mota, debo odelo tou̒ timongoli loololaa mao̒ huta lo Masiri.

⁷ Laheyalo tapu boito wau tamelaalo totambati u tilulaoto Eeya Allahu Taa̒ala limongoli, lapatao̒ pohualingolo ode bele limongoli loombulio mola dumodupo.

⁸ Ngotilonggadu wolomohui u wumbutio mola timongoli musi molamela roti udiila oragi. Todulahee u opitulio timongoli musi motia̒mbu u molubo Eeya Allahu Taa̒ala limongoli. Diila mao̒ pokalaja todulahee boito.”

Potihunggu lo polosembo

⁹ “Yia̒apa mao̒ ahadi poo̒opitu mola tumulalo mai tobohulo dulahu timongoli helo ngotolo pale,

¹⁰ lapatao̒ polamea mao̒ Potihunggu lo Polosembo u mohulumati Eeya Allahu Taa̒ala limongoli. Todulahee boito delowalo dewo iloheela lohilao ode o-Lio modudua̒ daatalio lo lijiki u mailohi-Lio mai olimongoli.

¹¹ Totalu lo Eeya Allahu Taa̒ala limongoli, totambati u tilulao-Tio, timongoli musi motiwengahu pee̒-pee̒enta wolo mongo walai̒ mongoli, mongo wato limongoli wau taulo Lewi, tau deli, walao̒ tadidu otiilo otiyamo wau mongo janda tabilu-biluloa̒ to kokoo-tawaalo limongoli.

¹² Dungohi mao̒ ngoa̒amila palentaa-Lio mai wolo tatapu wau molotolo hilao, wau diila mao̒ lipata deu̒ muloololio mai timongoli wato to Masiri.”

Potihunggu lo Wombohe Duungo

¹³ “Lapatio mao̒ ngoa̒amila pale limongoli yilapato tilotobu wau ngoa̒amila hungo lo angguru limongoli yilapato pilitodeo̒, timongoli musi mopolame mao̒ Potihunggu lo Wombohe Duungo notilonggadu pitu hui mola.

¹⁴ Poti wengahulo mola wolo mongo walai̒ mongoli, wolo mongo wato limongoli, taulo Lewi, tau deli, walao̒ tadidu otiilo otiyamo wau mongo janda tabilu-biluloa̒ to kokoo-tawaalo limongoli.

¹⁵ Pitu hui mola hiheolio timongoli musi mopolame potihunggu boito u mohulumati Eeya Allahu Taa̒ala limongoli totambati u tilulaoto Eeya. Poti wengahulo mola, sababu Eeya Allahu Taa̒ala limongoli malo balakati mai tilapulo huta wau kalaja limongoli.

¹⁶ Ngoa̒amila mongo lolai̒ lo Isirai̒lu musi monao̒ mai molubo to Eeya Allahu Taa̒ala limongoli totambati u tilulao-Tio poo̒otolu ngotaunu, deu̒yito-yito to Dulahu Buka lo Paska, to potihunggu lo polosembo wau Potihunggu lo Wombohe Duungo. Ngota-ngota musi modelo mao̒ dewo

¹⁷ moduduo̒ u omamboalio, tutuuu̒de wolo daatalio lo lijiki uilohi mai lo Eeya Allahu Taa̒ala limongoli olio.”

Dudelo lou̒ moponao̒ u aadili

¹⁸ “To timii̒du kota u wohi mai lo Eeya Allahu Taa̒ala limongoli, timongoli musi momuduo̒ mongo hakimu wau tahi otuugasia wewo u momutoo̒ ulipu wolo aadili.

¹⁹ Todelomo mohama putuusani, timongolio diila mowali mohutu lou diila momandungi haku lotaa wewo meaalo motiwambao̒. Timongolio diila mowali olo mololimo sooroi̒, sababu sooroi̒ boito moo̒ pitoo̒ hilaa lotau, tumbao̒ taa molinepo wau juujulu, tilinggula mohama putuusani udiila aadili.

²⁰ Timongoli musi laito aadili, alihu mowali motitatapu wau tumumula aamani soontosa wau maa̒amulu tohuta uwohi mai lo Eeya Allahu Taa̒ala limongoli ode limongoli.

²¹ Wonu timongoli mohutu mao̒ mesba ode Eeya Allahu Taa̒ala limongoli, diila mao̒ dutui bui̒ balaahala monto ayu bayahu Asyera to ngotualiilio,

²² wau diila mao̒ potihula wolihi u pomujaalo balaahala, sababu Eeya Allahu Taa̒ala limongoli molonuo̒ to huhutu boito.