TINGULI 15 - KITABI HABARI MOPIOHE

Taunu u opitulio

¹ “To motii̒du pulito taunu u opitulio timongoli musi mopowoluo mao̒ polulutalo biloli.

² Odi-odieelo mola dudeloolio. Timii̒du taulo Isirai̒lu tamopo-bulotao̒ doi ode taa ngobangusaalio, musi molulutao̒ biloli boito, sababu modudua̒ u tilantu lo Eeya lohihilao deu̒ biloli boito mailuluto, oditolio diilalo mowali tagiyola.

³ Timongoli mowali molagi doi u pilopo bulotao̒ limongoli ode tau deli, bo diilalo mowali molagi doi u pilopo bulotao̒ limongoli ode taa ngobangusa woli mongoli.

⁴ Eeya Allahu Taa̒ala limongoli mamo balakati mai olimongoli tolipu uwohi-Lio ode limongoli. Yi towolota lobangusa limongoli diila tawoluo taa mosikini,

⁵ asali timongoli modungohe to Eeya Allahu Taa̒ala limongoli, wau wolo ulintapo mohutu mao̒ ngoa̒amila upiloa̒hu mao̒ lowatia olimongoli todulahee botie.

⁶ Eeya Allahu Taa̒ala limongoli mamo balakati mai olimongoli debo odelo u pilodanti-Lio. Timongoli mamopo bulotao̒ doi ode dadaata bangusa, bo timongoli lohihilao diila tamo buloto; timongoli mamotolo kawasa mao̒ dadaata bangusa, bo timongolio diila tamotolo kawasa olimongoli.

⁷ Wonu bolo de malo tibiluloa̒ tolipu uwohi mai lo Eeya Allahu Taa̒ala limongoli ode limongoli, lapatao̒ to talatuwau lokota woluo taa ngobangusa limongoli tahi mosikinia, diila mao̒ mopolohuna batanga limongoli lohihilao wau mopotouli u momantu mao̒ olio.

⁸ Bolii̒o mao̒, timongoli musi omuura lohilao wau mopo bulotao̒ ode tau boito ngodaata u palaluolio.

⁹ Diila mao̒ potoulia u mopo bulotao̒ to olio wolo alaasani deu̒ taunu polulutalo biloli malembidei. Diila mao̒ polulia pikilangi u odito leetio boito tumuwotao̒ ode delomo hilaa limongoli. Wonu timongoli diila mohuto mopo bulotao̒, tau boito mamo ngiibode to Eeya u mopo duloheo̒ olimongoli, yi timongoli mapoi̒laalo-Lio mai ototala.

¹⁰ Wohia mao̒ tio wolo hilaa sanangi wau iloheela lohilao, yi Eeya Allahu Taa̒ala limongoli mamo balakati mai totoonulalo kelakela limongoli.

¹¹ Towolota taulo Isirai̒lu malaito woluo dengolo lota tamosikini wau tai̒lo diaaluo. Sababu uito watia momalentai olimongoli u omuura lohilao ode limongolio.”

Dudelo u mopohutu mao̒ tomongo wato

¹² “Wonu bolo talolai̒ ngota meealo taabua monto bangusa limongoli mopotali lo batangalio mowali wato limongoli, tio musi mokalaja tolimongoli ngotilonggadu wolomo taunu mola. Todelomo taunu u opitulio tio musi lopatolo.

¹³ Wato talopatolo boito diila mowali ponao̒lo wolo uluu̒ laulau.

¹⁴ Wohia mao̒ tio wolo muura lohilao monto wolo uilohi mai lo Eeya Allahu Taa̒ala limongoli ode limongoli deu̒yito-yito batade himba, pale wau angguru.

¹⁵ Eelai mao̒ deu̒ timongoli muloololio mai wato to Masiri lapatao̒ yilopato lo Eeya Allahu Taa̒ala limongoli; uitolo sababuulio watia mongohi mai palenta botie ode limongoli.

¹⁶ Bo wonu wato boito diila mohuto monao̒ sababu tio motolia̒nga olimongoli wau ngaalaa̒ limongoli wau sanangi motibiluloa̒ woli mongoli,

¹⁷ yi delowa mao̒ tio ode huhebu lobele limongoli wau huangi mao̒ bulongalio, yi tio mamowali wato limongoli ngotupa lo tutumulio. Odito olo timongoli musi mopohutu mao̒ towato limongoli taabua.

¹⁸ Wonu timongoli molopato ngotaalio lowato, diila mao̒ polaasa molee̒e, sababu ngotilonggadu wolomo taunu mola tio malo kalaja tolimongoli wolo ngotayadu wuupa lou̒ ngotaalio lowato. Pohutua mao̒ palenta boito, yi Eeya Allahu Taa̒ala limongoli mamo balakati mai totoonulalo kelekela limongoli.”

Walao̒ sapi wau batade himba ubohulo pilotutu mai

¹⁹ “Walao̒ sapi wau batade himba ulai̒ ubohulo pilotutu mai musi podewolo ode Eeya Allahu Taa̒ala limongoli. Sapi boito diila mowali pomake u momantanga popadeo̒, wau himba boito diila mowali uluuhulo.

²⁰ Timii̒du taunu timongoli ngangaalaa̒ musi molamelao̒ tapulio totalu lo Eeya Allalhu Taa̒ala limongoli, totambati u tilulaoto Eeya.

²¹ Bo wonu bibiahe boito otailo, humayaalio penggo meaalo pitoo̒ meaalo otailo daa̒ wewolio, timongoli diila mowali mopodewo binatangi boito ode Eeya Allahu Taa̒ala limongoli.

²² Ngota-ngota, mopio tabelesi meaambo tanajisi, mowali molamela tobele, debo odelo molamela tapu lobuu̒lu meaalo tapu lokijangi.

²³ Duhulio diila mowali tameloolo, bo musi tuwatolo ode huta debo odelo taluhu.”