TINGULI 14 - KITABI HABARI MOPIOHE

Dudelo lo motilimi udinidini

¹ “Timongoli yito umati lo Eeya Allahu Taa̒ala limongoli. Oditolio tou̒ timongoli motilimi duo̒lo taamate, diila mao̒ palia batanga limongoli meaalo monguluhe to ambahu tau̒ lo lunggongumu debo odelo hepohutuo lo babaa-ngusawalo wewo.

² Timongoli yito miliki lo Eeya Allahu Taa̒ala limongoli; monto totoonulalo bangusa totudu lodunia, timongolilo tatilulaoto Allahu Taa̒ala u mowali umati-Lio.”

Binatangi uharamu wau uhalale

³ “Diila mao̒ polamela binatangi poilaalo mai lo Eeya haramu.

⁴ Timongoli mowali molamela bibii-natangiyalo botie: sapi, himba, batade,

⁵ buu̒lu, himba lo oa̒yuwa, batade lo oa̒yuwa, kijangi

⁶ wau ngoa̒amila binatangi u luo̒bio hibutaa̒ wau hemoheede.

⁷ Timongoli diila mowali molamela binatangi u luo̒bio diila hibutaa̒ wau diila hemoheede. Diila polamela unta, kolinci meaalo udu lowalanta. Binatangi boito haramu sababu penu boli hemoheede, luo̒bio diila hibutaa̒.

⁸ Diila mao̒ polamela boi. Binatangi boito haramu, sababu penu boli luo̒bio hibutaa̒, boi boito diila hemoheede. Tapulio diila mowali tameloolo, patelio diila mowali dedetolo.

⁹ Timongoli mowali molamela totoonulalo tola obulihu wau otolitio̒ u hidala-dalaala.

¹⁰ Binatangi u hitumula todelomo taluhu bo diila obulihu wau otolitio̒ ytio haramu, oditolio diila mowali tameloolo.

¹¹ Timongoli mowali molamela totoonulalo bulungi hidala-dalaala udiila haramu.

^12-18 Bo dengolo dalaala bulungi udiila mowali tameloolo, deu̒yito-yito bulungi: angga-angga, maluo̒ moluluwola, totoonulalo bulia u hidala-dalaala, nasari, paao̒, bulungi unta, camar, bitubitua wau totoonulalo duayo u hi dala-dalaala, undan, kasa wau abuhu.

¹⁹ Ngoa̒amila buhudu u opolipio̒ yito haramu, oditolio diila mowali tameloolo.

²⁰ Binatangi opolipio̒ udiila haramu mowali tameloolo.

²¹ Binatangi u yilate wolo hilaalio diila mowali tamelo limongoli, bo mowali tamelo lotau deli tabilu-biluloa̒ towolota limongoli, meaalo potaali ode bangusa wewo. Timongoli yito umati tapilohetu ode Eeya Allahu Taa̒ala limongoli. Tapu lowalao̒ himba meaalo walao̒ batade diila mowali tubuolo wolo taluhu susu liilolio.”

Wuu̒du pasali lodewo ngotayade mopulu

²² “Timii̒du taunu timongoli musi mopowiwi mao̒ ngotayade mopulu monto ngoa̒amila tilapulo huta limongoli.

²³ Totalu lo Eeya Allahu Taa̒ala limongoli, totambati u tilulaoto Eeya, duo̒lo tambati poi̒baatiyalo, timongoli musi molamelao̒ dewo ngotayade mopulu monto pale, taluhu angguru, winulo jaitun wau walao̒ sapi wau batade himba limongoli ubohulo pilotutu mai. Pohutua mao̒ sua̒li boito alihu u ohiheo-hiheolo mao̒ timongoli mobalaajali mohulumati to Eeya Allahu Taa̒ala limongoli.

²⁴ Wonu tambati u tilulaoto Eeya Allahu Taa̒ala limongoli boito laba-labaalo molaminga monto bele limongoli, tilinggula ngotayade mopulu monto tilapulo huta limongoli uilohi mai lo Eeya Allahu Taa̒ala limongoli diila mowali deloo mota limongoli odito, yi

²⁵ potaalia mao̒ tayade monto tilapulo huta limongoli boito, wau delowa mota doilio ode tambati u tilulaoto Eeya Allahu Taa̒ala limongoli.

²⁶ Pobalanjawa mao̒ doi boito penu towolo wambai̒o u otohilaa limongoli – sapi meaalo ngaalaa̒ limongoli musi molamela pee̒-pee̒enta wau motisana-sanangi.

²⁷ Diila mao̒ polulia iloloihia taulo Lewi tahi biluloa̒wa to kokoo-tawaalo; eelai mao̒ deu̒ timongolio boito diila ohuta lohihilao.

²⁸ To motii̒du pulito lotaunu u otolulio, timongoli musi modelo mota ngotayade mopulu tayadio lo tilapulo huta limongoli wau mohimoa̒ao̒ to kokoo-tawaalo limongoli.

²⁹ Ua̒alo boito ode taulo Lewi sababu timongolio diila ohuta, wau ode tau deli, walao̒ tadidu otiilo otiyamo wau tahi jaandawa tatumu-tumulo to kokoo-tawaalo limongoli. Timongolio mowali monao̒ mai wau mohama mao̒ totoonulalo upalaluo limongolio. Wonu timongoli mohutu mao̒ odito, yi Eeya Allahu Taa̒ala limongoli mamo balakati mai ngoa̒amila kelakela limongoli.”