TINGULI 13 - KITABI HABARI MOPIOHE

¹ Wonu bolo ngotaalio lonabi meaalo tamoo-tohilopoa modanti mao̒ tuwaulio lo muu̒jijati meaalo moo̒linggolabu

² wolo makusudu alihu timongoli molubo meaalo motiwato to ila-ila udiila pee̒enta mao̒ oonuhe limongoli, penu boli wolo upilo dantilio boito tio̒otutua motoduo mai,

³ diila mao̒ poo̒tuota tio. Eeya Allahu Taa̒ala limongoli momake tau boito u mohimontala olimongoli, u momilohe wolo timongoli tio̒otutua motolia̒ngo to Eeya wolo lea-leaatulo mao̒ meaalo diila.

^4-5 Taa u debo odelo uito musi hukuu-maniyolo mate, sababu ohilaa mopolapalo olimongoli monto dalala upilo malentai lo Eeya Allahu Taa̒ala limongoli ode limongoli. Tio yito tau moleeto sababu mopoa̒hu olimongoli momalakala to Eeya Allahu Taa̒ala limongoli talo lopato olimongoli lonto Masiri, tambati limongoli pilowatolio. Oditolio tio musi pateelo mate-mateelo mao̒, alihu u moleeto boito podiaaluwolo. Bo timongoli mamusi modudua̒a to Eeya Allahu Taa̒ala limongoli wau mohulumati Olio; podungohulo to Olio wau pohutua mao̒ ngoa̒amila palentaa-Lio. Poti tatapulo debo molotolo hilao wau motiwato to Olio wambao̒.

^6-7 Wonu bolo wutati mongoli meaalo walai̒ mongoli talolai̒ meaalo taabua, meaalo dile limongoli taabua u otolia̒ngi mongoli meaalo sahaabati modudula daa̒ woli mongoli lou̒ poo̒-poo̒oyo momio olimongoli u molubo ila-ila wewo udiila oonuhe limongoli wau diila oonuhe lo loluuhuru limongoli, ila-ila monto babaa-gusawaalo ubilu-biluloa̒ meembidu wau molaminga,

⁸ diila mao̒ dungohi tio wau diila mao̒ polulia batangamu piyoolio. Diila mao̒ tolia̒ngi olo meealo moduo̒la totau boito.

^9-10 Tio musi pai̒yoola lobotu tunggula mate. Yio̒ tamusi molumulao̒ momai̒ olio, wau dudua̒ lo ngoilanggubu ulipu. Taa u ototala boito musi pateelo mate-mateelo mao̒, sababu tio ohilaa mopo halaheo̒ olimongoli monto Eeya Allahu Taa̒ala limongoli talo lopato olanto lonto polowato to Masiri.

¹¹ Yi ngoilanggubu bangusa lo Isirai̒lu mamoo̒ dungoheo̒ pasali lo polomatea yila-yilateelo mao̒ boito wau mamoohe, tilinggula diaaluo penu boli ngotaa mao̒ tamohutu moleeto debo odelo odito poli.

¹² Wonu bolo timongoli de motibiluloa̒a to kokoo-tawaalo uwohi mai lo Eeya Allahu Taa̒ala limongoli ode limongoli, tanu mamoloo̒po habari

¹³ deu̒ dengolo lota tahileeta monto bangusa limongoli malopo lapalao̒ ulipu lokota u lolubo ila-ila udiila oonuhe limongoli.

¹⁴ Wonu bolo odungohe suala lotaa hipo loloohuma debo odelo uito, tuletea mao̒ wolo ulintapo. Wonu umoleeto boito otu-otutuulo mao̒ malotoduo,

¹⁵ yi ngoilanggubu ulipu lokota boito wolo bibiahio musi pateelo mate-mateelo mao̒. Kota boito musi pobinasaalo sama-samaata.

¹⁶ Ngoa̒amila halata upango ulipu lokota boito musi wimoo̒lo wau huntuwola to tanalapa, lapatao̒ kota wau ngoa̒amila halata upangio musi pobuwola odelo bake ode Eeya Allahu Taa̒ala limongoli. Lapatao̒ uito ngoa̒amila boito tolaalo mowali tuwodu wau diila mowali muli bongulola.

¹⁷ Babaa-langiyalo ulaa̒-laa̒anati boito diila mowali tahuwola duo̒lo batanga limongoli lohihilao, bo musi pobinasalo sama-samaata. Yi omuluka lo Eeya mamoole wau Tio mamopo bilohei odehu hilao ode limongoli. Tio maa omuura lohilao ode limongoli wau mopowali mao̒ olimongoli bangusa uleidaa̒ debo odelo upilo danti-Lio mai ode loluuhuru limongoli,

¹⁸ asali timongoli modungoheo̒ totoonulalo palentaa-Lio u potunggulai lowatia ode limongoli todulahee botie, wau mohutu mao̒ ngoa̒amila u kahandakio-Lio.”