TINGULI 12 - KITABI HABARI MOPIOHE

Tuwa-tuwaulo tambati poi̒baadatiyalo

¹ “Uti-utieelo butoo̒ umusi dungohe mao̒ limongoli ngotupu lo tutumuli mongoli tolipu uwohi mai lo Eeya ode limongoli, Allahu Taa̒ala linene moya limongoli.

² Lapatao̒ timongoli tumuwota mola ode lipu boito timongoli musi mongantulu mao̒ tataa-mbatiyalo u hepo mujaalo toitaato huhuu-ideyaalo u molanggato, to huhuu-luduwaalo wau towalungo bubuu-ngowaalo ayu mohimbungo tambati pilotibiluloa̒ lobangusa mota teto u molubo ila-ila limongolio.

³ Lohubua mao̒ memees-bawaalo limongolio wau potoyopua mao̒ wowoo-lihiyaalo botu u he anggapuo limongolio aulia. Pobuwa mao̒ tutuuotolo Asyera, wau antulua mao̒ bubuu-iyaalo lo balaahala limongolio, tilinggula ila-ila boito diilalo tuboolio to tataa-mbatiyalo boito.

⁴ Tou̒ timongoli molubo Eeya Allahu Taa̒ala limongoli, diila mao̒ poduduo̒ dudelo lotau-tauwalo boito u molubo ila-ila limongolio.

⁵ Monto ngoilanggubu madala susuu-kuwaalo Isirai̒lu, Eeya Allahu Taa̒ala limongoli malulaotao̒ tambati tuwau alihu bangusanto mowali monao̒ mai ode talu-Lio wau molubo o-Lio.

⁶ Ode tambati boi-boitolo timongoli musi modelo mota babaa-keyaalo yilalango wau babaa-keyaalo uwewo, dewo ngotayade mopulu limongoli wau dedee-wowaalo wewo, bake pomayali danti limongoli, bake iloheela lohilao limongoli wau walao̒ sapi wau batade himba limongoli ubohulo pilotutu mai.

⁷ Mota teto olo, totalu lo Eeya Allahu Taa̒ala limongoli, timongoli pee̒-pee̒enta wolo ngaalaa̒ limongoli musi molamela wau motiwengahu to tolopani limongoli u otilapulo sababu bilalakati mai lo Eeya Allahu Taa̒ala limongoli.

⁸ Wonu saaa̒ti boito malei dungga, timongoli diilalo pohutu debo odelo botia. Tunggula botia timongoli hemo ibaadati tohila-hilaa limongoli,

⁹ sababu timongoli diipo tilumuwota mola ode lipu uilohi mai lo Eeya Allahu Taa̒ala limongoli ode limongoli, tambati limongoli mowali motitatapu wolo aamani.

¹⁰ Lapatao̒ timongoli mobalango Dutulaa Yordan, Eeya Allahu Taa̒ala limongoli mamo tulungi mai olimongoli motibiluloa̒ wau motipoo̒oyo tohuta to ngotuali lo dutulaa boito. Tio mamoduo̒lai olimongoli monto totoonulalo musu, wau timongoli matumumulo wolo aamani wau tantaramu.

¹¹ Lapatao̒ Eeya Allahu Taa̒ala limongoli mamolulaoto tambati tuwau tou̒toonu Tio musi tuboolo. Odito motaalo umusi ponao̒wa limongoli modelo mota ngoa̒amila u mapilo malenta-U̒ mai, deu̒yito-yito bake yilalango wau babaa-keyaalo wewo, dewo ngotayade mopulu wau dewo poheetu u pilodanti limongoli ode Eeya.

¹² Poti wengahulo mola totalu lo Eeya Allahu Taa̒ala limongoli, pee̒-pee̒enta wolo mongo walao̒ limongoli, mongo wato limongoli wau tau-tauwalo Lewi tabilu-biluloa̒ to kokoo-tawaalo limongoli, masababu taulo Lewi diila loo̒tapu tayadu lonto huta tolipu limongoli.

¹³ Timongoli diila mowali mopodewo bake limongoli to totoonulalo tambati u tilulaotao̒ limongoli lohihilao,

¹⁴ bo wambao̒ totambati u tilulaotai lo Eeya tolipu lotala tuwau losuku limongoli. Mota teto wambai̒o timongoli musi mopodewo bake yilalango wau mohutu mao̒ sua̒li wewo upilo malentai lowatia ode limongoli.

¹⁵ Bo timongoli bebasi mongolotao̒ bibiahi mongoli wau molamela tapulio penu boli tou̒toonu potibiluloa̒ limongoli. Timongoli mowali molamela ngodaata uwohi mai lo Eeya Allahu Taa̒ala limongoli ode limongoli. Ngota-ngota, mopio tabelesi meaalo tanajisi, mowali molamelao̒ tapu boito, debo odelo timongoli mowali molamela tapu lo kijangi meaalo tapu lobuu̒lu.

¹⁶ Bo duhulio diila mowali polamelo, bo musi tuwatolo ode huta debo odelo taluhu.

¹⁷ Totambati potibiluloa̒ limongoli diila mowali molamela dewo ngotayade mopulu monto pale limongoli, angguru limongoli, winulo jaitun limongoli, sapi meaalo batade wau himba limongoli ubohulo potutuolio mai, bake pomaayali danti limongoli, bake iloheela lohilao limongoli meaalo dewo wewo.

¹⁸ Timongoli wau mongo walai̒ mongoli, pee̒-pee̒enta wolo mongo wato limongoli wau tau-tauwalo Lewi tabilu-biluloa̒ tokota limongoli, musi molamelao̒ dewo boito totalu lo Eeya Allahu Taa̒ala limongoli, totambati u tilulaotai lo Eeya Allahu Taa̒ala limongoli. Wau totambati boito timongoli musi moti wengaheo̒ sababu ngoa̒amila tolopani limongoli.

¹⁹ Poo̒dahailo diila bolo poluli mao̒ limongoli kaumu lo Lewi ololoihia ngotilonggadu timongoli tumu-tumula tolipu boito.

²⁰ Lapatao̒ Eeya Allahu Taa̒ala limongoli mopoluasi mao̒ sisii-patiyaalo lipumu debo odelo u pilodanti-Lio mai, timongoli mowali molamelao̒ tapu to hilahilaa limongoli.

²¹ Wonu tambati u tilulaotao̒ lo Eeya Allahu Taa̒ala limongoli laba-labaalo molaminga monto tambati limongoli, timongoli mowali mongolotao̒ sapi tuwau, himba meaalo batade uwohi mai lo Eeya ode limongoli, wau molamelao̒ tapulio totambati limongoli wolo hilahilaa limongoli, debo odelo u mailoi̒ya mai lowatia olimongoli.

²² Ngota-ngota, mopio tabelesi meaalo tanajisi, mowali molamelao̒ tapu boito, debo odelo timongoli mowali molamelao̒ tapu lobuu̒lu meaalo tapu lo kijangi.

²³ Bo tapu udonggo oduhulio diila mowali tameloolo, sababu nyawa woluo todelomo duhu, wau timongoli diila mowali molamela nyawa pee̒-pee̒enta wolo tapulio.

²⁴ Duhulio sama-samaata diila mowali tameloolo, bo musi tuwatolo ode huta debo odelo taluhu.

²⁵ Wonu timongoli modungoheo̒ palenta boito, Eeya masanangi, wau timongoli wolo wali mola limongoli maa̒amani sontosa wau maa̒amulu.

²⁶ Totoonulalo bake wau dewo u mapilo danti limongoli ode Eeya, musi deloo mota limongoli ode tambati u tilulaotao̒ lo Eeya.

²⁷ Bake yilalango wau bake u tilamelo tapulio musi podewolo toitaato mesba lo Eeya Allahu Taa̒ala limongoli wau duhulio tuwatolo toitaato mesba boito.

²⁸ Poo̒tuota mao̒ lou̒ mopiohu ngoa̒amila u mapilo malentai laatia ode limongoli, yi timongoli mohutu mao̒ u mopiohe wau motuhatawa ode Eeya Allahu Taa̒ala limongoli, tilinggula timongoli wau wali mola limongoli moa̒ahu wau aamani sontosa boli maa̒amulu u ohiheo-hiheolo mao̒.”

Poe̒ela tou̒ momuja bui̒ balaahala

²⁹ “Eeya Allahu Taa̒ala limongoli mamopo binasa babaa-ngusawalo tahi biluloa̒wa tolipu boito, tilinggula timongoli moo̒ huloa̒a wau motibiluloa̒ teto.

³⁰ Lapatao̒ babaa-ngusawalo boito pobinasaa-Lio mai, poo̒daha-dahaalo mao̒ diila bolo timongoli moo̒baaya olimongolio hipo lubowa ila-ila wewo, sababu huhutu boito moo̒toduo mai baala.

³¹ Dudelo babaa-ngusawalo boito u hemolubo ila-ila limongolio, diila mao̒ dudui̒ limongoli u molubo Eeya Allahu Taa̒ala limongoli, sababu timongolio molubo wolo mohutu totoonulalo huhutu kootolo u yilonuo̒ lo Eeya. Tumbao̒ mongo walai̒ mongolio lohihilao hepobuo limongolio toitaato mesba odelo bake ode ila-ila limongolio.

³² Pohutua mao̒ ngoa̒amila upiloa̒hu mai laatia ode limongoli; diila mao̒ duhengi meaalo ilangiyalo.