TINGULI 11 - KITABI HABARI MOPIOHE

Odudaa̒ lo Eeya

¹ “Tolia̒ngi mao̒ Eeya Allahu Taa̒ala limongoli wau dungohilo laito totoonulalo palentaa-Lio.

² Eelai mao̒ botia wolo u otaawa limongoli pasali lo Eeya monto u ilolaasawa mai limongoli. Mongo walau̒mu diila loo̒laasa mai u odito. Timongoliilo tamalo sakusi odudaa̒ lo Eeya Allahu Taa̒ala limongoli, olooto-Lio, okokawasaa-Lio

³ wau totoonulalo moo̒linggolabu u pilohutu-Lio. Timongoli maloo̒onto lohihilao wolo upilohutu-Lio odeli olongia lo Masiri wau ngoilanggubu lipulio.

⁴ Timongoli malo oonto woloolo mola Eeya helo ngantulu suludadu lo Masiri pee̒-pee̒enta wolo wadala wau kaleta lo popaatealio. Timongolio ngoa̒amila piloa̒humio to auhu Gelagah tou̒ timongolio helo hilapita olimongoli.

⁵ Otaawa limongoli wolo mai lo Eeya ode limongoli tohuta luasi udelita tou̒ timongoli diipo leidungga mai odia.

⁶ Eela mola limongoli olo wolo upilohutu lo Eeya odelei Datan wolei Abiram, mongo walae̒e Eliab lonto suku Ruben. Totalu limongoli ngoa̒amila, huta malo butao̒ tulusi lololoola olimongolio pee̒-pee̒enta wolo ngaalaa̒lio, kema, ngoa̒amila wato wau bibiahi mongolio.

⁷ Ooo̒, timongoliilo uwolo mato lohihilao malo oonto ngoa̒amila moo̒linggolabe upilohutu mai lo Eeya.”

Balakati duo̒lo taa u modungohe wau laa̒anati duo̒lo taa u diila modungohe

⁸ “Dungohilo ngoa̒amila butoo̒ u potunggulai lowatia olimongoli todulahee botie, yi timongoli mamoo̒ balango dutulaa wau tumuwota mola ode lipu udiilalo mohiiheo potibiluloa̒ limongoli.

⁹ Wau timongoli matumumulo mohiheo tolipu u kaya wau molomiodu, u pilodanti mai lo Eeya odeli nenemoya limongoli wau ode wali mola limongolio.

¹⁰ Lipu u demaa potibiluloa̒ limongoli boito diila debo odelo huta lo Masiri, tambati u muloololio mai piloti biluloa̒ limongoli. Mola teto timongoli musi mokalaja tio̒otutua u mopo toloheo̒ taluhu ode hahaa-laboluwalo tou̒ mopo mua̒yade bili.

¹¹ Bo lipu umapo tuwota limongoli boito tilititango lou̒ hihui̒-hui̒dea wau luluu-mbayaawalo; hutalio tiloloohe lotaluhu didi.

¹² Eeya Allahu Taa̒ala limongoli mamolaala lipu boito wau modaha mao̒ ngohilayaa̒ lotaunu.

¹³ Oditolio dungohilo ngoa̒amila palenta upilo tunggulai lowatia ode limongoli todulahee botie; tolia̒ngilo Eeya Allahu Taa̒ala limongoli wau poi̒baadatilo to Olio wolo lealeaatu lojiwa wau batanga limongoli.

¹⁴ Wonu timongoli mohutu mao̒ odito, yi Eeya mamopo tuhutai didi tohuta limongoli tou̒ sembolio, mopalutao̒ timongoli mohama sembolio, wau tou̒ timongoli mamopomulo. Yi timongoli maa opale u motuuheta, angguru wau winulo jaitun,

¹⁵ wau huo̒yoto duo̒lo bibiahi mongoli. Ngoa̒amila ua̒alo upalaluo limongoli mamei dapato ode limongoli.

¹⁶ Diila mao̒ pohuto timongoli pohalahulio monto Eeya wau motiwato ila-ila wewo.

¹⁷ Wonu timongoli molambanga palenta boito, Eeya mamo muluka mai ode limongoli. Tio diila tamopo tuhutai didi; huta limongoli mamowali mohengu daa̒ tilinggula pilomulo diila mongohi mai tilapulo. Yi todelomo wakutu u ngoi̒ntalo mola timongoli maamate tohuta molomiodu uwohi mai lo Eeya ode limongoli.

¹⁸ Eelailo wau poo̒tuotalo papaa-lentawalo boito. Poa̒wade mao̒ to polotodu lo uluu̒ limongoli wau paisaakawa mao̒ tobaya limongoli u hee̒elaalo.

¹⁹ Pongaajalia mao̒ tomongo walai̒ mongoli. Bisalaawa mao̒ todelomo bele wau to bulemengo bele, tou̒ mohuheli wau tou̒ mokalaja.

²⁰ Potuladee mao̒ towolihi lohuhebu lobele limongoli wau tohuhebu hulubangi limongoli.

²¹ Yi timongoli wau mongo walai̒ mongoli matumumulo hayahaya tolipu u pilodanti mai lo Eeya Allahu Taa̒ala limongoli odeli nenemoya limongoli. Ngotilonggadu woluo hulungo toitaato dunia, ngotilonggadu uito olo timongoli mamoti biluloa̒ tohuta boito.

²² Dungohilo wolo tatapu wau molotolo hilao ngoa̒amila butoo̒ upilo tunggulai lowatia ode limongoli: Tolia̒ngilo Allahu Taa̒ala limongoli, pohutuwalo totoonulalo upilo malentai lo Eeya ode limongoli, wau mamusi timongoli tatapu wau molotolo hilao to Olio.

²³ Yi Eeya mamo polahi ngoa̒amila bangusa boito monto talu limongoli, wau timongoli mamoti biluloa̒ tohuta uolo babaa-ngusawalo talebe udaa̒ wau lebe molotolao̒ woli mongoli.

²⁴ Timii̒du madala u potidutaa̒ limongoli mowali miliki limongoli. Madala limongoli bua̒bua̒ade monto huta luasi udelita to huliaalio demola hihui̒-hui̒dea lo Libanon totilayo, wau monto Dutulaa Eperat totiimulu demola Lau Tenga to otolopa.

²⁵ To ngoilanggubu lipu boito Eeya Allahu Taa̒ala limongoli mamohutu mao̒ tau-tauwala moohe toli mongoli debo odelo u pilodanti-Lio mai tilinggula diaaluo penu boli ngotaa mao̒ tamoo̒ bubula olimongoli.

²⁶ Todulahee botie timongoli mowali molulaota towolota balakati wau laa̒anati.

²⁷ Timongoli mabalakatia-Lio wonu timongoli modungohe to papaa-lentawalo Eeya Allahu Taa̒ala limongoli, u todulahee botie potunggulai lowatia ode limongoli.

²⁸ Bo timongoli malaa̒anatia-Lio wonu diila modungohe papaa-lentawalo Eeya Allahu Taa̒ala limongoli, bo mobolio̒ u molubo ila-ila wewo udiila pee̒enta mao̒ hetuboo limongoli.

²⁹ Lapatao̒ Eeya Allahu Taa̒ala limongoli modelo mola olimongoli tumuwota ode lipu u de potibiluloa̒ limongoli, balakati boito musi wulito limongoli monto Hui̒dee Gerijim wau laa̒anati boito monto Hui̒dee Ebal. (

³⁰ Duuduluo hui̒dee boito dudutuulio to ambahu otolopa lo Dutulaa Yordan tomadala taulo Kanaa̒n tabilu-biluloa̒ to Lumbaya Yordan, talutalu ode otolopa diila molaminga monto bubuu-ngowaalo ayu tambati lo ibaadati to More totili lokota Gilgal.)

³¹ Diilalo mohiheo timongoli mobalango Dutulaa Yordan wau motibiluloa̒ tohuta uwohi mai lo Eeya Allahu Taa̒ala limongoli ode limongoli. Lapatao̒ timongoli mohama mao̒ huta boito wau motibiluloa̒ mota teto,

³² timongoli musi modungoheo̒ ngoa̒amila butoo̒ upilopo tunggulai lowatia ode limongoli todulahee botie.”