TINGULI 10 - KITABI HABARI MOPIOHE

Tei Musa u oluolio lololimo Mopuulo Palenta lo Allahu Taa̒ala

¹ “Lapatao̒ Eeya lotahuda mai ode laatia, ‘Musa, pahaatia mao̒ duluo botu dembela molipa debo odelo u bohulio, wau pohutua mao̒ olo bulua lo ayu tuwau u podutualio, lapatao̒ ponao̒lo mai ode ola-U̒ to bolitutuo̒ hui̒du.

² To boboo-tuwaalo boito mapolulade-U̒ tataa-heyaalo u tutuuwauwa debo odelo tobotu u mapiloo̒mu; lapatao̒ boboo-tuwaalo boito potuwotomu mao̒ ode delomo bulua boito.’

³ Lapatao̒ watia lohutu mao̒ bulua lonto ayu aakasia wau helo maahati botu duluo debo odelo u omoo̒omolu wau lodelo mola ode yitaato hui̒du.

⁴ Tobotu boito Eeya loludeo̒ Mopuulo Palenta tutuuwauwa debo odelo ubohulio, deu̒yito-yito papaa-lentawalo uilohi-Lio ode limongoli, tou̒ Tio helo tahuda mai lonto huungo tulu todulahee timongoli hia̒mbua to bungo lohui̒du. Lapatao̒ uito Eeya longohi mai botulei boito ode laatia

⁵ wau watia luli lotuhutaa mola lonto hui̒du. Lapatao̒ lotuuu̒de wolo palenta lo Eeya, botu duluo boito pilopo tuwotao̒ lo watia ode delomo bulua u mapilohutu mao̒ lowatia – wau tumulalo mao̒ tou̒ boito tunggula botia botulei dulopita boito donggo woluo mota teto.” (

⁶ Lapatao̒ taulo Isirai̒lu lomonggato lonto aa̒a-liyaalo taulo Yaakan, wau lonao̒ ode Mosera. Mota teto tei Haruna yilate wau yilobungio. Tei Eleajar walai̒o lobuulota wolio odelo iimamu.

⁷ Mota teto timongolio lonao̒ mota ode Gudgod, lapatao̒ lopotolonga mola lononao̒ ode Yotbata, madala udadaata taluhio.

⁸ Tohui̒dee boito Eeya lopo-tolomodu mao̒ suku Lewi u mongulusi Bulua Daantia wau momaya to Eeya, wau lolapali mao̒ balakati to tanggu-Lio. Ui-uitolo tuugasi limongolio tunggula botia.

⁹ Masababu uito suku Lewi diila lololimo huta pusaka debo odelo suku wewo, sababu Eeyaalo tayadu waliisani limongolio, debo odelo u tilahuda mai lo Eeya Allahu Taa̒ala limongoli ode limongolio.)

¹⁰ “Wopato pulu hui wau dulahu watia bilu-biluloa̒ toitaato hui̒du debo odelo u pilohutu lowatia bohulio. Pee̒entapo Eeya lodungohei olaatia, wau Tio akolo u diila mopobinasa mai olimongoli.

¹¹ Lapatao̒ Tio lopoa̒hu olaatia u modelo olimongoli alihu timongoli mowali motolo miliki huta u pilodanti-Lio odeli nenemoya limongoli.”

Hihiile wolo moo̒ohuu̒ lo Eeya

¹² “Botia, Mongo wutato, poo̒tuotalo wolo upilohile wolo moo̒ohuu̒ lo Eeya Allahu Taa̒ala limongoli monto olimongoli: Hulumatia mao̒ Eeya Allahu Taa̒ala limongoli wau pohutuwalo ngoa̒amila palentaa-Lio. Tolia̒ngilo Tio wau potabiyalo to Olio wolo lealeaatu lo jiwa wau batangamu.

¹³ Dungohilo totoonulalo palenta lo Eeya u todulahee botie potunggulai lowatia ode limongoli domi opopiohu limongoli lohihilao.

¹⁴ Eeya Allahu Taa̒ala limongoli motolo miliki hulungo ulaba-labaalo molanggato; dunia olo milikii-Lio wolo totoonulalo uwoluo toitaatio.

¹⁵ Bo ponu lo Eeya ode loluuhuru limongoli odito udaa̒alio, tilinggula monto totoonulalo bangusa timongoliilo tatilulao-Tio, wau tunggula botia olo timongoli umati-Lio tatilulaoto.

¹⁶ Oditolio tumulalo mai botia timongoli musi modungohe to Eeya wau diilalo potibaa̒ngi poli.

¹⁷ Eeya Allahu Taa̒ala limongoli woluo toitaato totoonulalo ila wau mongilabotao̒ totoonulalo kawasa. Tio Allahu Taa̒ala tau̒daa̒ wau okawasa umusi dungoheelo. Tio diila mohuto motiwambao̒ wau diila mohuto olo mololimo soloi̒.

¹⁸ Tio mopoduulua haku lo tadidu otiilo otiyamo wau janda alihu timongolio pohutuwola wolo aadili; Tio momonu tau deli tatumu-tumulo wolo bangusanto wau mongohi mai ua̒alo wau pakeyangi ode limongolio.

¹⁹ Yi timongoli olo musi mopo biloheo̒ tolia̒ngi mongoli ode tau-tauwalo deli boito, sababu muloololio mai timongoli olo tau deli to Masiri.

²⁰ Hulumatiaalo Eeya Allahu Taa̒ala limongoli wau poi̒baadatilo to Olio wamabo̒. Mamusi timongoli tatapu wau molotolo hilao to Olio wau motadia domi tanggu-Lio wambao̒.

²¹ Pujiaalo mola Tio sababu Tio Allahu Taa̒ala limongoli. Wolo mato limongoli lohihilao timongoli maloo̒onto huhuu-hutuwaalo upolu-polutuo̒ wau u moo̒tihela u pilohutu-Lio ode limongoli.

²² Tou̒ tinenemoya limongoli lonao̒ ode Masiri, jumulaa limongolio bo pitu lopulu lota. Bo Eeya Allahu Taa̒ala limongoli malohutu mai jumulaa limongoli debo odelo daatalio lo popoo-liyamaalo to hulungo.”