RUT 3 - KITABI HABARI MOPIOHE

Ti Rut loo̒tapu dile

¹ Dengolo wakutu mola lapatio mao̒, ti Nao̒mi loloi̒ya odeli Rut, “Wau̒ musi motolopani mao̒ alihu yio̒ muli moo̒nika wau sanangi tutu.

² Yio̒ helo huyula wolo mongobua to halabolu lei Boas, diila odito? Uito sababuulio, tei Boas boito ngaalaa̒nto. Oditolio, dungohilo mai! Hui botie tio mamonao̒ molumbetaa̒a pale to halabolulio.

³ Polihulo botia, pomakea mao̒ yilonta wau pomakea mao̒ pakeyangi u mopiohe daa̒. Lapatao̒ ponao̒lo ode tambati tou̒toonu tei Boas donggo hemokalaja hemo tontanga pale monto panggeyangio. Yimailo mota teto tunggula tio lapato molamela wau mongilu, bo diila bolo otaawalio yio̒ woluo mola teto.

⁴ Poo̒tuoti mao̒ tou̒toonu potuluhelio. Wonu tio malei tuluhu, ponao̒lo mota odito wau bua̒de mao̒ pohulotio, lapatao̒ potibalatolo totili lo oa̒atio. De tio mamo poo̒taai olemu wolo umusi pohutuwomu.”

⁵ “Saaya, Maama,” tametao̒ li Rut, “watia mamopohutu mao̒ ngoa̒amila uiloi̒ya li Maama.”

⁶ Yi malonao̒ ti Rut ode tambati lo tahi pokalajawa hemo tontanga pale lonto panggeyangio. Mola teto tio helohutu mao̒ ngoa̒amila u pilohehulo lotiilo molohengio.

⁷ Lapatao̒ tei Boas yilapato lolamelo wau longilu, tio maa ilolulia lohilao wau hilaalio olo sanangi. Lapatao̒ tio mota lotuluhe totili huntua lopale. Lou̒ piopio ti Rut lonao̒ mai wau lomuo̒ mao̒ pohuloto lei Boas, lapatao̒ lotibalato tio totili lo oa̒atio.

⁸ To tomutaa̒ mola lou̒ hui debolo tei Boas lohulimangu mai wau ohilaa mopo yintili lo wawaai̒o. Tio maa iloohea loo̒onto mao̒ woluo taabua ngota tuutuluhe totili lo oa̒atio.

⁹ “Tatoonu yio̒?” yilintulio mao̒. “Watia ti Rut, Paaa̒!” tametao̒ li Rut. “Ti Paaa̒ yito ilaato lamiaatia modudulo tamusi momanta timihulao̒ to tutumulo laatia. Bolo potaala ti Paaa̒ mohama mao̒ olaatia mowali dile li Paaa̒.”

¹⁰ “Pohileaala dua̒ Eeya mobalakati mai olemu, walau̒uu̒,” ualei Boas. “Wonu pobandingio mola lou̒ wolo u mapilo hutumu ode tiilo moluhengumu, yi huhutuumu u masaatia botie mopoi̒laalo tolia̒nga ulebe udaa̒ poli. Yio̒ olo mowali mololohe dile tadonggo muda towolota lotaa kaya meaalo taa mosikini, bo yio̒ diila helohutu uito.

¹¹ Sababu uito, diila mao̒ polawalo, Rut. Ngoa̒amila u pohilemu boito mapo hutuwou̒; sababu ngoa̒amila taa tokota botie malotota deu̒ yio̒ yito taabua ngota mopiohu.

¹² Memangi otutu, wau̒ tamusi momanta timihulao̒ to tutumulumu, sababu wau̒ yito ilaatumu tamodudulo. Bo donggo woluo poli ngotaalio wewo tamusi momanta timihulao̒ to tutumulumu. Wau tio yito ilaato talebe modudulo wolau̒.

¹³ Hui botie yio̒ potitolaa pomao̒ tewe. Loombu dumodupo de maa yintuwou̒ mao̒ olio wolo tio mohuto moponao̒ banta titihulio boito olemu meaalo diila. Wonu tio mohuto, mopiohulo; bo wonu tio diila mohuto, yi wau̒ modantia mai domi Allahu Taa̒ala Taa tumutumulo, wau̒ mamoponao̒ banta titihuluu̒ boito. Botia potuluhu pomao̒ tewe tunggula dumodupo.”

¹⁴ Yi malo tuluhulo ti Rut teto totili lo oa̒ato lei Boas. Loombulio mola molaliyonu daa̒ ti Rut malo bongu alihu tio diila oontonga lotau. Sababu tei Boas diila mohuto penu boli ngotaa mao̒ tamotota deu̒ ti Rut malonao̒ mai ode tambati boito.

¹⁵ Yi malo loi̒ya tei Boas odeli Rut, “Yinggila mao̒ salendangimu wau bua̒delo mola tewe.” Yi ti Rut malo hinggi salendangilio wau bilua̒dio mola. Tei Boas helo luangao̒ ode salendangi boito tanu dulo puulo kilo pale. Lapatao̒ bilintai̒o mola ode yitaato binggungo li Rut. Lapatao̒ uito tei Boas lonao̒ ode kota.

¹⁶ Tou̒ ti Rut leidungga mola ode bele, tiilo moluhengio lohintu mao̒, “Woloolo mola waliilio, naa?” Yi ti Rut helo hungguli mao̒ ngoa̒amila u pilohutu lei Boas to olio.

¹⁷ “Wau,” uali Rut wumbutio mola, “tumbao̒ tiolo talongohi mai ngoa̒amila pale botie ode laatia, sababu ualio mao̒ watia diila mowali mohualingai odeli maama lou̒ diila modelo wolo-wolo.”

¹⁸ Lapatao̒ uali Nao̒mi, “Yimailo mao̒, naa, tunggula woloolo mola sua̒li botie de mopulito. Tei Boas diila tamo tipoo̒oyo tou̒ tio diipo mopoo̒ lapato palakala botie to dulahulo botie.”