RUT 2 - KITABI HABARI MOPIOHE

Ti Rut helo kalaja to halabolu miliki lei Boas

¹ Ti Nao̒mi o ilaato ngota lonto ambahu dilelio tamailate, tei Elimelekh. Tau boito kaya wau he hulumatio lotau. Tanggulio Boas.

² Todulahee tuwau uali Rut mao̒ odeli Nao̒mi, “Maama, watia mohintu pomao̒ ohilaa ode halabolu mota momuluta pale u otanu helo bibiihutao̒ lonto uluu̒ lotahi pongotolawa. To pongolaasa laatia tantu woluo wambai̒o taa umamo poluli mao̒ olaatia mohutu sua̒li boito.” “Ooo̒, naa!” tametao̒ li Nao̒mi, “ponao̒lo!”

³ Yi malonao̒lo ti Rut ode halabolu wau helo muluta pale lodudua̒ to tahi pongotolawa. Leitaahua tio lonao̒ mota ode halabolu miliki lei Boas.

⁴ Diila lohiheo lapatio mao̒ tei Boas leidungga mai lonto Betlehemu wau longohi mao̒ salamu ode tahi pongotolawa, “Pohileaala dua̒ Eeya woli mongoli,” ualio mao̒. Tahi pongotolawa helo lametao̒, “Pohileaala dua̒ Eeya mobalakati mai oli Paaa̒.”

⁵ Lapatao̒ tei Boas lohintu mao̒ odeli mandurulio, “Tatoonu taabua boito?”

⁶ Manduru boito lolametao̒, “Tio taabua bangusa lo Moab taboheli leidungga mai woli Nao̒mi lonto lipu lo Moab.

⁷ Tio malohile iijini olaatia alihu mei̒ poluasi mao̒ modudua̒ towulea lotahi pongotolawa u momuluta pale u helo pupuulepe. Tumulalo mai didimodupo tio hemo kalaja tulusi wau botia tio boheli lobelenti mao̒ u lohuheli bo ngopee̒ mola to wombohe.”

^8-9 Lapatao̒ tei Boas loloi̒ya mao̒ odeli Rut, “Nte dungohipo mai. Sambelolo yio̒ monao̒ momuluta pale to halabolu lotaa wewo. Pomulutolo tewe wolo mongobua tahe pei̒ kalajaau̒. Poo̒tuoti mao̒ ode utoonu timongolio monao̒ mongotolo. Poduduo̒lo woli mongolio laito wau diila mao̒ potilamingo monto olimongolio. Wonu yio̒ motoa̒ngo, pohama mao̒ taluhu monto boboo-linggowalo u matiluwanga lotahi pokalajawa mongo lolai̒. Wau̒ malo malentaao̒ alihu timongolio diila mao̒ momuyu olemu.”

¹⁰ Loo̒dungohe uito, ti Rut losujudu lomola totalu lei Boas wau loloi̒ya, “Paaa̒, diila patuti watia mololimo huhutu u odito piohio monto oli Paaa̒. Watia botie tau deli wau diila patutilio poo̒tuoto mao̒ li Paaa̒!”

¹¹ Tei Boas lolametao̒, “Wau̒ maloo̒ dungohu pasali lou̒ totoonulalo hitua-tuawua u pilohutumu ode tiilo moluhengumu anggadu dilemu yilate. Otaawau̒ deu̒ yio̒ malo lolaa mai mongo dulaa̒mu wau lipumu u odia mai wau motibiluloa̒ tewe wolo tau-tauwala tadiipo otaawamu.

¹² Pohileaala dua̒ Eeya momaalasi mai totoonulalo opiohumu. Pohileaala dua̒ tolimomu wolo u paatuti wohi mai lo Eeya, Allahu Taa̒ala lo Isirai̒lu ode olemu sababu yio̒ malonao̒ mai u lotiduo̒la to Olio!”

¹³ Ti Rut lolametao̒, “Ti Paaa̒ mopiohe daa̒ to olaatia, eleponu watia diila motutuu-wauwa wolo tahipo kalajawa toli Paaa̒. Opiohu hilaa li Paaa̒ malo moo̒palonga hilaa lowatia.”

¹⁴ Tou̒ mawakutuulio u molamelo, tei Boas loloi̒ya mao̒ odeli Rut, “Toduwolo molamelo. Utie sausulio.” Yi ti Rut olo malo lamelo pee̒-pee̒enta wolo tahi pongotolawa. Tei Boas olo longohi mao̒ ila pilanggangi to olio, wau ti Rut helo lamelo tilinggula lobutuhu. Tou̒ mailapato lolamelo, woluo labitio.

^15-16 Lapatao̒ ti Rut luli lonao̒ mota lomuluto pale. Tou̒ tio malonao̒, tei Boas loloi̒ya mao̒ ode tahe pei̒ otoolalio, “Wonu tio momuluto pale umahi tihuuta, polulia mao̒. Diila mao̒ poo̒olita tio meaalo moingo olio. Opiohelio timongoli wolo sangaja momahutao̒ ngoi̒di-ngoi̒di monto umahi tihu-tihuuta boito, wau mopodulahu mola ode olio alihu pulutolio.”

¹⁷ Ti Rut tulusi wambao̒ helo muluto pale to halabolu tunggula lolaango. Lapatao̒ tio helo pomo-pomolotao̒ babaa-tangowalo pale boito u lopatolo boboo-tualio lonto batangio, wau lopatatao̒ tio loo̒puluto tanu mopuulo kilo.

¹⁸ Lapatao̒ tio lohualinga ode kota wolo lodelo tilapulo u pilulutio boito wau lopo biloheo̒ ode tiilo moluhengio ngoolo mao̒ daatalio u mapilulutio mai. Wau tio olo longohi mao̒ ode tiilo moluhengio boito ua̒alo udiila lowali piloo̒ pulitio tou̒ lolamelo.

¹⁹ Yi malo loi̒ya ti Nao̒mi olio, “Tou̒toonu piloo̒ tapulamu mai ngoa̒amilalo botie? To halabolu lotatoonu upilo kalajaamu todulahee botie? Pohileaala dua̒ Allahu Taa̒ala mobalakati mai taa u helohutu mao̒ mopiohe to olemu boito!” Yi ti Rut lohungguli mao̒ odeli Nao̒mi deu̒ halabolu tambati pilo mulutalio pale boito yito miliki lo talolai̒ ngota tai̒lunte Boas.

²⁰ “Naa, tau boito ilaato tamodudulo wolanto lohilao,” uali Nao̒mi. “Tiolo tamusi momanta timihulao̒ to olanto. Pohileaala dua̒ Eeya mobalakati mai olio. Eeya laito moe̒ela mai danti-Lio, mopio ode tadonggo hitumula meaambo ode limongolio tamailate.”

²¹ Lapatao̒ ti Rut luli loloi̒ya mao̒, “Maama, tau boito loloi̒ya olo deu̒ watia mowali tulusi momuluta pale wolo tahe pei̒ kalajaalio tunggula ngoa̒amila tilapulo halabolu yilapato otoolola.”

²² “Ooo̒, naa,” tametao̒ li Nao̒mi odeli Rut, “memangi lebe mopioheo̒ yio̒ mokalaja wolo mongobua tahepei̒ kalajaalio to halabolu lei Boas. Sababu, wonu yio̒ monao̒ ode halabolu lotaa wewo, yio̒ puyuo lotau mola teto!”

²³ Masababu uito, ti Rut debo lodudua̒ mongobua tahi pokalajawa to halabolu lei Boas. Tio helo muluta pale mola teto tunggula ngoa̒amila sembo yilapato ilootolo – mopio sembo ubohulio meaambo sembo upulitio. Wau ngotilonggadu uito ti Rut lotibiluloa̒ wolo tiilo moluhengio.