RUT 1 - KITABI HABARI MOPIOHE

Tei Elimelekh wolo ngaalaa̒lio lolimbata ode Moab

^1-2 To jamani muloololio mai tou̒ Isirai̒lu diipo o olongia ngota, lipu lo Kanaa̒n ilodungga lobaala polobiti. Tou̒ boito woluo talolai̒ ngota tai̒lunte Elimelekh. Tio lonto kaumu Eprata, wau bilu biluloa̒ to Betlehemu tomadala lo Yehuda. Sababu baala lopolobiti boito, yi tio lonao̒ ode Moab wolo dilelio, ti Nao̒mi, wau walai̒o talolai̒ duulota: tei Mahlon wolei Kilyon. Lapatao̒ timongolio lotibiluloa̒ mola teto. Tou̒ timongolio donggo mola teto,

³ tei Elimelekh yilate. Oditolio bolo ti Nao̒mi wolo walai̒o duulota taleitolaa.

⁴ Walai̒o duulota boito helonika wolo mongo dulahu lo Moab tai̒lunte Orpa wau Rut. Mopulu lotaunu mola lapatio mao̒,

⁵ walai̒ Nao̒mi mongo lolai̒ duulota boito, yilate olo, tilinggula ti Nao̒mi iloolia mopio dilelio meaalo walai̒o duulota boito.

Ti Nao̒mi woli Rut luli lohualinga ode Betlehemu

⁶ Dengolo wakutu mola lapatio mao̒ ti Nao̒mi loo̒dungohe deu̒ Eeya malo balakati umati lo Isirai̒lu wolo tilapulo sembo u mopiohe. Sababu uito ti Nao̒mi wolo walao̒ moluhengio duulota lotidapato u mololaa mao̒ Moab.

⁷ Timongolio lomonggato pee̒-pee̒enta lohualinga ode Yehuda. Tohuungo dalalo

⁸ ti Nao̒mi loloi̒ya ode walao̒ moluhengio duulota boito, “Timongoli pohualingolo ode bele liilamu. Pohileaala dua̒ Eeya motuhatawa woli mongoli debo odelo timongoli olo mopio to olau̒ wau odeli mongolio tamailate boito.

⁹ Pohileaala dua̒ Eeya motuhatawa mongohi jodo olimongoli alihu timongoli muli o modiilea.” Lapatao̒ loloi̒ya mao̒ odito, ti Nao̒mi lohinto lonao̒ toli mongolio wau lodiilao̒ olimongolio. Bo ti Orpa woli Rut mahilu-moyonga loo̒ohuu̒,

¹⁰ wau loloi̒ya mao̒ odeli Nao̒mi, “Diila, Maama! Amiaatia debo woli maama monao̒ ode bangusa li Maama.”

¹¹ “Keke, naa!” tametao̒ li Nao̒mi, “lebe mopioheo̒ timongoli mohualingo. Pongoola timongoli modudua̒ olau̒? Tutuulio tutu wau̒ diilalo mowali moo̒tapu mai walao̒ u mowali dile limongoli.

¹² Pohualingolo, naa, saababu wau̒ mapanggola daa̒ u muli monika. Wau humayaalio donggo woluo olo halaapani olau̒ u monika mao̒ tohui botie olo wau moo̒tapu mai walao̒ talolai̒,

¹³ wolo timongoli mohuto mohima mola tunggula timongolio udaa̒ mai? Diila pongalo aakali bo sababu sua̒li boito timongoli diila monika wolo taa wewo? Diila, walau̒uu̒, keke odito! Wau̒ molaasa suukali tou̒ wolo u musi olasaa limongoli sababu hukuumani mai lo Eeya olau̒.”

¹⁴ Ti Rut woli Orpa luli hilumoyonga loo̒ohuu̒ lapatao̒ ti Orpa lonao̒ sambela helodiilao̒ tiilo moluhengio tulusi lohualingo. Bo ti Rut diila lohuto lobuua̒ya wolo tiilo moluhengio boito.

¹⁵ Yi malo loi̒ya ti Nao̒mi olio, “Rut, bilohilo! Wipahumu malo hualinga ode bangusaalio wau ode dedee-waalio. Ponao̒lo yio̒ olo, naa, dudui̒lo mota tio mohualingo!”

¹⁶ Bo ti Rut lolametao̒, “Maama, diila mao̒ ahuli limaama watia mohualingo wau mololaa mao̒ oli Maama! Watia motohilaa modudua̒ oli Maama. Penu boli deu̒toonu ponao̒wa limaama, teto olo watia woluo. Penu boli tou̒toonu potibiluloa̒ limaama, teto olo watia ohilaa motibiluloa̒. Bangusa limaama, uito olo bangusa lowatia.

¹⁷ Penu boli tou̒toonu opatea limaama, teto olo watia ohilaa mate wau lobungolio. Potala Eeya mohukuumani mai olaatia mobuhe-buhetolo mao̒, wonu watia ohilaa mobua̒ya woli Maama, ngopohia opopate u mopobua̒ya mao̒ olanto!”

¹⁸ Ti Nao̒mi lomiloheo̒ deu̒ ti Rut debo lotaahangia u moduduo̒, oditolio, tio diilalo loloi̒ya wolo-wolo.

¹⁹ Yi timongolio lotolongao̒ nonao̒ limongolio de mola leidungga to Betlehemu. Odito timongolio leidungga mola odito, ngoilanggubu kota boito lamedaa̒. Mongobua mola teto loloi̒ya, “Wolo otutu tio boito ti Nao̒mi?”

²⁰ “Diila mao̒ tangguli watia Nao̒mi,” uali Nao̒mi, “tiangaalo Mara, sababu Allahu Taa̒ala Taa Laba-labaalo kawasa malo poluli olaatia tilumumula polupolu wolo polodutolo.

²¹ Tou̒ watia lomonggatao̒ lonteea watia tutuuu̒de, bo botia Eeya luli lodelo mai olaatia wolo laulau lo uluu̒. Masababu uito timongoli diilalo polanggulo olaatia Nao̒mi, sababu Eeya Taa Laba-labaalo kawasa malo hukuumani mai olaatia wolo polodutolo dadaata!”

²² Odi-odieelo mola hikayatilio deu̒ woloolo mola ti Nao̒mi luli lohualingai lonto Moab wolo tiilo moluhengio taulo Moab boito. Timongolio leidungga mai ode Betlehemu tobohulo polosembo lopale.