ROMA 9 - KITABI HABARI MOPIOHE

Allahu Taa̒ala wolo umati-Lio tai̒lo tulaoto

¹ Wolo u mapolele mai lowatia botie yito otutu sababu watia miliki li Almasi. Watia diila mohimbulo. Hilaa u maloo̒tapu tinelo Eeya lowatia udilelo lo Rohullah helo poyakini olaatia olo deu̒ loi̒ya lowatia botie otutu.

² Watia moololo daa̒ wau hilaa lowatia dutodutolo

³ sababu mongo wutato lowatia tango bangusa wolaatia. Sababu ode limongoliolo, watia lohihilao iloheela lohilao yilanaa̒tia lo Allahu Taa̒ala wau biluaa̒ala lonto li Almasi.

⁴ Timongolio yito umati tai̒lo tuluoto wau Allahu Taa̒ala lopowali olimongolio mongo wala-I̒o lohihilao, wau lopoi̒laalo kawasa-Lio olimongolio. Tio lohutu daantia woli mongolio wau longohi olimongolio butoo̒ lo agama. Allahu Taa̒ala lopoo̒taa olimongolio woloolo mola timongolio musi motabia wau timongolio olo malo lolimo totoonulalo danti-Lio.

⁵ Timongolio yito wali mai linenemoyanto. Ti Almasi odelo pohuli lomanusia asalii-Lio mai lonto bangusa limongolio. Tio lebe lailaio̒ wolo ngoa̒amilalo. Ilopujiaalo mola Allahu Taa̒ala u ohiheo-hiheolo mao̒! Amin.

⁶ Watia diila omakusudu moloi̒ya deu̒ danti lo Allahu Taa̒ala madiilalo ohuna; bo diila ngoa̒amila taulo Isirai̒lu yito umati tatilulaoto Allahu Taa̒ala.

⁷ Diila ngoa̒amila wali lei Abraham yito mongo walao̒ Allahu Taa̒ala. Sababu Allahu Taa̒ala lotahuda odelei Abraham, “Bo wali lei Isihaka wambai̒o tamaa unteelo walimu.”

⁸ Uito boliilio mao̒ deu̒ wali lei Abraham tamowali mongo walao̒ Allahu Taa̒ala, deu̒ito-yito bo waliilio tapilotutu mai sababu danti lo Allahu Taa̒ala; wau diila ngoa̒amila waliilio.

⁹ Sababu danti lo Allahu Taa̒ala yito odie mola, “Towakutu u tilantu, Wau̒ mamuli mohualingai, wau ti Sara mamowali owalaa̒i talolai̒ ngota.”

¹⁰ Wau utie olo; ti Ribka helo potutu mai talolai̒ duulota lonto tiyamo ngota, deu̒ito-yito tei Isihaka tinenemoyanto.

¹¹ Tou̒ wolao̒ duulota boito diipo pilotutulio, Allahu Taa̒ala malolantu tulao-Tio duo̒lo wumbutio mola. Tulaoto Allahu Taa̒ala boito diila lotiwunela tou̒ wolo u mowali pohutuo lotau, bo lotiwunela to titiango Allahu Taa̒ala lohihilao. Sababu towakutu walai̒ Ribka mongo lolai̒ duulota boito diipo mowali moponao̒ hitua-tuwaua umopiohe meaalo u moleeto,

¹² Allahu Taa̒ala malo tahuda odeli Ribka, “Tamohuhula mamomaya tawaliyali.”

¹³ Todelomo Kitabi tulatulade deu̒ Allahu Taa̒ala lotahuda odie mola, “Tei Yako pilonu-U̒, bo tei Esau yilonu̒u-U̒.”

¹⁴ Wolo pulito lo huhamanto botia? Deu̒ Allahu Taa̒ala boito diila aadili? Maatantu Allahu Taa̒ala yito aadili.

¹⁵ Sababu Allahu Taa̒ala lotahuda odelei Musa, “Wau̒ mamopo bilohei odehu hilao totaa u otohilaa-U̒ pobilohela lo odehu hilaa-U̒, wau Wau̒ mamopo bilohei odehu hilao totaa u otohilaa-U̒ pobilohela odehu hilao.”

¹⁶ Oditolio, putuusani lo Allahu Taa̒ala boito diila wunewunela to iloheela lohilao lomanusia meaalo to tolopani lomanusia, bo to opopiohe hilaa lo Allahu Taa̒ala wambao̒ totaa tilulao-Tio boito.

¹⁷ Sababu todelomo Kitabi tulatulade, “Allahu Taa̒ala lotahuda odeli olongia lo Masiri, Wau̒ mopowali olemu olongia wolo makusudu bo tuwau botie wambao̒, deu̒ito-yito alihu wolemu, Wau̒ mopo bilohei okokawasa-U̒ wau mohutu tanggulu-U̒ masa-masahulu to ngoilanggubu dunia.”

¹⁸ Oditolio, Allahu Taa̒ala modehu hilao ode tahingota-ngotaawa, wonu Allahu Taa̒ala mokahandaki odito. Wau Allahu Taa̒ala olo moo̒sababu ode tahingota-ngotaawa mowali baa̒ngiyolo, wonu Allahu Taa̒ala mokahandaki odito.

Muluka lo Allahu Taa̒ala wau opopiohu hilaa lo Allahu Taa̒ala

¹⁹ Naa, Wutato mamoloi̒ya mai olaatia, “Wonu odito yilongola Allahu Taa̒ala donggo ohilaa mopotala tomanusia? Tingga woluo penu boli ngotaa mao̒ tamowali mongabuto u otohilaa lo Allahu Taa̒ala?”

²⁰ Bo, Wutato! Wutato bo manusia wambao̒. Wau Wutato diila mowali buheli motuwahe to Allahu Taa̒ala! Tingga mowali poti lo bunga mohintu to talohutu mao̒ olio, “Yilongola yio̒ malohutu mai olau̒ odie?”

²¹ Wolo taa u mohutu poti lo bunga boito ohaku mohutu mao̒ huta modudangia boito modudua̒ totoonulalo otohilaalio? Monto ngotopingo huta modudangia ngotopingo, tau boito ohaku mohutu mao̒ dulo dalalo poti lo bunga; tuwau umopiohe wau uwewolio udiila boti mopiohe.

²² Odito olo lou̒ wolo u pilohutu mai lo Allahu Taa̒ala. Tio oniyati u mopomukaa̒i oyiyingo-Lio wau mopo bilohei okokawasa-Lio. Bo Tio sabali olimongolio tamusi hukuu-maniyolo sababu heloo̒ muluka o-Lio.

²³ Allahu Taa̒ala olo oniyati mopo bilohei olanto osanangi tutu udiila o enggadelio u bilongguwa-Tio mai olanto tapilonu-Lio. Ito mapilo dapa-Tio u mololimo osanangi tutu boito.

²⁴ Ito-itolo tamaa tilia-Ngio, diila bo wambao̒ bangusa lo Yahudi, bo monto babaa-ngusawalo wewo olo.

²⁵ Sababu todelomo buku li Nabi Hosea, Allahu Taa̒ala lotahuda, “Tau-tauwalo tadiila umati-U̒, mau̒ntee-U̒ ‘Umati-U̒’. Bangusa tadiila pilonu-U̒, mau̒ntee-U̒ ‘Ilohilaa-U̒’.

²⁶ Wau totambati tou̒toonu piloloi̒ya mao̒ totau, ‘Timongoli diila umati-U̒,’ mota teto tau-tauwala boito mau̒nteelo mongo walao̒ Allahu Taa̒ala tatumu-tumulo.”

²⁷ Ti Nabi Yesaya loloi̒ya wolo piduduto tomimbihu bangusa lo Isirai̒lu, “Penu boli jumulaa bangusa lo Isirai̒lu daatalio debo odelo hungayo topentadu, bo ngoi̒di wambao̒ tamaa moa̒ahu;

²⁸ Sababu Eeya mahua̒a mopodehu mai hukuumani ode tuango dunia.”

²⁹ Ti Nabi Yesaya malo loi̒ya odie olo, “Humayaalio Allahu Taa̒ala Taa Laba-labaalo kawasa diila lololaa mao̒ olanto wali, tantu ito ngoa̒amila malowali debo odelo Sodom wau Gomora.”

Wumbuta towolota umati lo Allahu Taa̒ala wolo Habari Mopiohe u monto Allahu Taa̒ala

³⁰ Oditolio, pulito lo huhamaalio duu̒ito-yito utie: Babaa-ngusawalo wewo tadiila Yahudi diila helo tolopani alihu wumbuta limongolio wolo Allahu Taa̒ala muli mowali mopiohu. Bo sababu timongolio palacaya, yi Allahu Taa̒ala lopowoluo mai wumbuta limongolio wo-Lio luli lowali lopiohu.

³¹ Bolii̒o mao̒, tau-tauwalo Yahudi laito hemo tolopani modungohe butoo̒ alihu wumbuta limongolio wolo Allahu Taa̒la muli mowali mopiohu. Bo timongolio tumbao̒ diila ilohaasili.

³² Yilongola timongolio diila ilohaasili? Sababu timongolio helohutu uito diila loli palacaya to Allahu Taa̒ala bo loli tolopani limongolio lohihilao. Sababu uito timongolio lodehu leeteduo̒ to “Botu Oteduo̒.”

³³ Tomimbihu botu boito todelomo Kitabi tulatulade odie, “Poo̒tuota mao̒ utie: To Sion mapilopo dutu-U̒ botu tuwau u mamoo̒ sababu tau meeteduo̒; deu̒ito-yito botu leidaa̒ tuwau u mamoo̒ sababu tau modehu. Bo taa upalacaya to o-Lio diila tao̒kikiio̒ lohilao.” ROM