ROMA 8 - KITABI HABARI MOPIOHE

Tutumulo u modudua̒ Rohullah

¹ Masaatia madiduu̒ hukuumani ode limongolio tahitumula lotituwau woli Isa Almasi.

² Sababu butoo̒ lo Rohullah ulohutu mai olanto tilumumula lotituwau woli Isa Almasi tamalo lopatai olaatia lonto hukuumani uloo̒ sababu dusa wau opopate.

³ Wolo udiila mowali pohutuo butoo̒ lo agama, sababu ito manusia molulupuhu, uito mapilohutu mai lo Allahu Taa̒ala. Allahu Taa̒ala maloo̒-laaheo̒ kawasa lodusa todelomo pii̒li lomanusia lou̒ lolao mai Wala-I̒o lohihilao, tadungga-dungga mai todelomo owowoluwoa u tutuuwauwa wolo manusia tao̒dusa, mai loluluta dusa.

⁴ Allahu Taa̒ala lohutu uito alihu kahandaki-Lio u piloi̒laalo todelomo butoo̒ agama lo Yahudi boito mowali ponao̒olo todelomo batanganto tahitumula lodudua̒ to Rohullah wau diila lodudua̒ pii̒li lomanusia.

⁵ Tau-tauwalo tahitumula lodudua̒ pii̒li lomanusia, tulusi hemo mikiilangi wolo u otohilaa pii̒li lomanusia. Bo tau-tauwalo tahitumula lodudua̒ to Rohullah, tulusi hemo mikiilangi wolo u otohilaa lo Rohullah.

⁶ Wonu pikiilangimu kiluwasa pii̒li lomanusia yi akibatilio opopate. Bo wonu pikiilangimu kiluwasa lo Rohullah, yi akibatilio yito tutumulo wau odudame wolo Allahu Taa̒ala.

⁷ Taa pikiilangilio kiluwasa pii̒li lomanusia, tau boito mumuusua wolo Allahu Taa̒ala; sababu tau boito diila taa̒luku tobutoo̒ lo Allahu Taa̒ala; wau memangi tio diila mowali taa̒luku tobutoo̒ lo Allahu Taa̒ala.

⁸ Tau-tauwalo tahitumula helo dudua̒ pii̒li lomanusia, diila moo̒sanangi to Allahu Taa̒ala.

⁹ Bo timongoli diila tumutumulo modudua̒ pii̒li lomanusia. Timongoli tumutumulo modudua̒ Rohullah – wonu, tantulio, Rohullah otu-otutuulo mao̒ dulu-dulude todelomo batangamu. Taa diila o Rohu li Almasi, tau boito diila miliki li Almasi.

¹⁰ Bo wonu ti Almasi tumutumulo todelomo batangamu, yi eleponu wawau̒mu maamate sababu dusa, bo Rohullah mongohi mai tutumulo olemu, sababu wumbutamu wolo Allahu Taa̒ala malopiohu.

¹¹ Wonu Rohullah, talo potumulai li Almasi lonto opopate, tumutumulo todelomo batangamu, yi Tio talo potumulai li Almasi lonto opopate boito, mamo potumulai olo wawau̒mu u mowali mate boito. Tio mohutu mai uito wolo Rohu-Lio u tumutumulo todelomo wawau̒mu.

¹² Uitolo sababuulio, Mongo wutato, ito otitihula; bo diila titihula topii̒li lomanusia; ito diila palalu tumumulo modudua̒ u otohilaalio.

¹³ Sababu wonu timongoli tumumulo modudua̒ pii̒li lomanusia, yi timongoli maamate; bo wonu wolo kawasa lo Rohullah, timongoli tulusi wambao̒ mopopate totoonulalo huhutuumu u odusa, yi timongoli matumumulo.

¹⁴ Tau-tauwalo tadilelo lo Rohullah, deu̒yito-yitomongo walao̒ Allahu Taa̒ala.

¹⁵ Sababu Rohu, uilohi mai lo Allahu Taa̒ala ode limongoli, diila mohutu olimongoli mowali wato tilinggula timongoli tumumulo wolo wohe-wohe. Bolii̒o mao̒ Rohullah boito mopowali olimongoli mongo walao̒ Allahu Taa̒ala, wau wolo kawasa lo Rohullah boito ito mongunte Allahu Taa̒ala boito, “Paapa, oo ti Paapau̒!”

¹⁶ Rohullah pee̒-pee̒enta wolo rohunto mopoi̒laalo mai deu̒ ito yito mongo walao̒ Allahu Taa̒ala.

¹⁷ Naa, wonu ito yito mongo wala-I̒o, yi ito olo ahali lowarisi-Lio u mamololimo babaa-lakatiyalo upilohetu lo Allahu Taa̒ala ode mongo wala-I̒o. Ito mamololimo pee̒-pee̒enta woli Isa Almasi wolo u mapilohetu lo Allahu Taa̒ala o-Lio; sababu wonu ito modutolo pee̒-pee̒enta woli Isa Almasi, ito mapolaio̒-Lio olo pee̒-pee̒enta wo-Lio.

Ololaio̒ u ohiheo-hiheolo mao̒

¹⁸ Ngoa̒amila polodutolo u olaasanto masaatia botie, modudua̒ huhama lowatia, sama-samaata diila mowali pobandingiolo wolo ololaio̒ u mapoi̒laalo mai olanto.

¹⁹ Ngoilanggubu aalamu malo hiwoolola hemohima wakutuulio lo Allahu Taa̒ala mopoi̒laalo mai mongo wala-I̒o.

²⁰ Sababu aalamu mapilo luliilio lowali lotupo, diila bo sababu hilaalio lohihilao, bo sababu Allahu Taa̒ala malo poluli mai odito. Eleponu odito woluo olo halapani utie:

²¹ deu̒ towakutu tuwau aalamu mapo lopatolo monto kawasa umoo̒ aantulu wau mamodudua̒ lopato-Lio wau pou̒daa̒alo pee̒-pee̒enta wolo mongo walao̒ Allahu Taa̒ala.

²² Otaawanto deu̒ tunggula tou̒ botie ngoilanggubu aalamu hemo poi̒laalo suukali sababu hidutola debo odelo ti ibu ngota hemodutola tou̒ mopotutu mai lo tau̒nge.

²³ Wau diila bo wambao̒ ngoilanggubu aalamu u hemo poi̒laalo suukali; ito lohihilao olo hemo poi̒laalo suukali todelomo hilaanto. Ito malo lolimo Rohullah odelo wowohi mai lo Allahu Taa̒ala ubohulio, bo boli odito ito olo donggo hemohima Allahu Taa̒ala mopo lopatai batanganto lea-leaatulo mao̒ wau mopowali olanto mongo wala-I̒o.

²⁴ Sababu wolo mohaalapu, yi ito piloa̒ahu-Lio. Bo wonu wolo u hehalaa-puwonto boito maa iloontonganto, yi uito diilalo halapani. Sababu tatoonu tadonggo mohalapu hitua-tuawua udiipo iloontonga?

²⁵ Bo wonu ito mohalapu hitua-tuawua udiipo iloontonganto, yi ito mohima mai o-Lio wolo sabali.

²⁶ Odito olo Rohullah dungga-dungga mai momantu olanto wonu ito molulupuhu. Sababu diila otaawanto woloolo mola ito mamusi modua̒; Rohu boito lohihilao modudulao̒ ode Allahu Taa̒ala u momolohone to Allahu Taa̒ala ode olanto wolo malo odito woloolo tilinggula diilalo mowali wulitolo.

²⁷ Yi Allahu Taa̒ala, tamotota tuango hilaa lomanusia, mongalati u otohilaa lo Rohu boito; sababu Rohu boito momolohone to Allahu Taa̒ala ode umati lo Allahu Taa̒ala, wau motuuu̒de wolo otohilaa lo Allahu Taa̒ala.

²⁸ Otaawanto deu̒ Allahu Taa̒ala mongatulu mai totoonulalo sua̒li, tilinggula mongohi tilapulo umopiohe ode tau-tauwalo tamo tolia̒ngo o-Lio wau tatilia-Ngio motuuu̒de wolo lanjana-Lio.

²⁹ Timongolio tamaa tilulaoto Allahu Taa̒ala, matilantu-Lio olo lonto bohulio u lowali ngolupa wolo Wala-I̒o, deu̒ito-yito ti Isa Almasi. Lou̒ odito Walao̒ boito lowali tabohulio towolota lomongo wutato dadaata.

³⁰ Odieelo mola Allahu Taa̒ala lotianga olimongolio tamaa tilantu-Lio mai leimulo; wau timongolio tatilia-Ngio boito, yiluasia-Lio muli mopiiohe wo-Lio. Wau timongolio tailuasia-Lio muli mopiiohe wolo Allahu Taa̒ala, mohama tayade todelomo tutumulo Allahu Taa̒ala lohihilao.

Ponu lo Allahu Taa̒ala lotimbulude li Isa Almasi

³¹ Wolo umowali loi̒yanto botia pasali lou̒ ngoa̒amilalo boito? Wonu Allahu Taa̒ala motiwambao̒ ode olanto, tatoonu tamowali moluwali olanto?

³² Wala-I̒o lohihilao diila pilolee̒-Lio mai, bo tumbao̒ yiludu-Lio mai u polohuna daa̒ ode olanto ngoa̒amila; uwalita, Tio diila tamohudu mai de olanto totoonulalo hitua-tuawua uwewolio?

³³ Tatoonu tamowali mongaibu olanto umati tatilulaoto Allahu Taa̒ala wonu Allahu Taa̒ala lohihilao mopoi̒laalo mai deu̒ ito diila ototala?

³⁴ Wolo woluo tao̒hilaa mopotala olanto? Deti Isa Almasi tamopo duulua olanto! Tiolo tamailate, wau tumbao̒ Tiolo tamaaluli pilopo tumu-Lio mai lonto opopate wau maito totambati lo Allahu Taa̒ala tao̒kawasa.

³⁵ Wolo woluo tamowali mongabuta li Almasi momonu mai olanto? Wolo osuusa mowali mongabuta o-Lio, meaalo otootolo, meaalo polo ngalinaya, meaalo polobiti, meaalo omosikini, meaalo baala, meaalo opopate?

³⁶ Todelomo Kitabi tulatulade odie mola, “Ngotupa lodulahu ami tumutumulo todelomo baala lomautu sababu Eeya. Ami pilohutulio debo odelo himba umaa olotolo.”

³⁷ Diila! Tumbao̒ todelomo u ngoa̒amilalo boito ito mamoo̒hama wolo wimu-wimumuto ngoa̒amilalo sababu Tio talomonu olanto!

³⁸ Sababu watia palacaya daa̒ deu̒ to ngoilanggubu dunia, mopio opopate meaalo tutumulo, mopio malai̒kati meaalo takawa-kawasa, mopio aa̒an-jamuwalo masaatia botie meaalo aa̒an-jamuwalo todulahe u madungga-dungga mai meaalo ololoo-towaalo uwewolio;

³⁹ mopio susuu-aliyaala u tohulungo, meaalo susuu-aliyaalo u todelomo dunia meaalo penu boli wolo wambao̒ uwewolio, ngoa̒amilalo diila mowali mongabuto Allahu Taa̒ala momonu mai olanto, debo odelo u mapilo bilo-Hio mai lotimbulude li Isa Almasi, Eeyanto. ROM