ROMA 3 - KITABI HABARI MOPIOHE

¹ Wonu odito, wolo untungilio mowali taulo Yahudi? Wau wolo hunalio modudua̒ao̒ wuu̒du lotuuna?

² Tantulo mao̒ dadaata hunalio! Bohu-bohulio, sababu totaulo Yahudilo Allahu Taa̒ala lopo palacaya mao̒ tataa-hudaalo Allahu Taa̒ala.

³ Bo woloolo mola wonu ngotaalio taulo Yahudi diila tatapu wau molotolo hilao? Wolo sababu uito Allahu Taa̒ala mamowali diila tatapu wau molotolo hilao?

⁴ Tantu diila! Sababu malo patatai Allahu Taa̒ala laito otutu, eleponu timii̒du tau hipo himbuloa. Todelomo Kitabi tulatulade, “Wajibulio yio̒ obukuti otutu todelomo wolo uiloi̒yamu, wau yio̒ moo̒haama tou̒ yio̒ butoo̒lio.”

⁵ Bo wonu u aadili lo Allahu Taa̒ala malebe henaasa mai, masababu ito helohutu udiila otutu, wolo u mamusi loi̒yanto? Deu̒ Allahu Taa̒ala diila aadili wonu Tio mohukuumani mai olanto? (Memangi yiyintu botie paatuti odelo manusia.)

⁶ Sama-samaata diila! Sababu wonu Allahu Taa̒ala diila aadili, woloolo mola Tio mowali momutoa̒i dunia botie?

⁷ Bo wonu sababu huhutu udiila otutu, wolo u otutu pasali lo Allahu Taa̒ala helebe oontonga daa̒ tilunggula Tio piluji, yi yilongola taa umohutu moleeto boito donggo pilopotala odelo taa odusa?

⁸ Wau yilongola ito diila mowali moloi̒ya, “Mopiohulo ito mohutu u moleeto alihu tumoodei umopiohe?” Memangi woluo tau-tauwalo tahe lohina olaatia lou̒ hemoloi̒ya deu̒ watia malo loi̒ya odito. Tau-tauwala debo odelo uito patutilio hukuumanio lo Allahu Taa̒ala.

Diaaluo penu boli ngotaa mao̒ tahe lohutu kahandaki lo Allahu Taa̒ala

⁹ Naa, wolo huhuloa̒nto odelo taulo Yahudi lebe mopiohu wolo huhuloi̒o lobangusa wewo? Sama-samaata diila! Mailoi̒ya mai lowatia deu̒ mopio taulo Yahudi meaalo bangusa wewo, ngoa̒amilalo makiluwasa lodusa.

¹⁰ Debo odelo u tulatulade todelomo Kitabi, “Diaaluo penu boli ngotaa mao̒ tao̒tutu,

¹¹ diaaluo penu boli ngotaa mao̒ tamongalati wau diaaluo penu boli ngotaa mao̒ tamolubo Allahu Taa̒ala.

¹² Ngoa̒amila tau malo poo̒lamingo batanga lonto Allahu Taa̒ala; ngoa̒amila mailapalo. Diaaluo penu boli ngotaa mao̒ helohutu u otutu; penu boli ngotaa mao̒ diaaa̒!

¹³ Bunggohi mongolio odelo kuubulu uilonganga. Wimbulo u hidala-dalaala tumolohu monto dila limongolio, wau biihu limongolio wambao̒ hemo pomukao̒ pitana, debo odelo bisa lotulidu.

¹⁴ Tunggili mongolio polupolu wolo laa̒anati wau didini u moo̒ohuu̒.

¹⁵ Didiambangi mongolio hidiyota wonu ohilaa moposikisa wau momate tau mate-mateelo mao̒.

¹⁶ Oa̒antulu wau osuusa, pilo loladi mongolio ode utoonulalo mao̒.

¹⁷ Diila otaawa limongolio dalalo poa̒ahuwalo,

¹⁸ wau diila mohulumati Allahu Taa̒ala.”

¹⁹ Botia bolo ilotaawanto deu̒ ngoa̒amila u tulatulade todelomo butoo̒ agama lo Yahudi, deu̒ito-yito duo̒lo tau-tauwala tawoluo towalungo pamalenta lobutoo̒ boito. Lou̒ odito diaaluo penu boli ngotaa mao̒ tamoo̒ wohi alaasani wolo-wolo poli wau ngoilanggubu dunia mowali pohile wolo moo̒ohuu̒ lo Allahu Taa̒ala.

²⁰ Sababu diaaluo penu boli ngotaa mao̒ mowali mopiiohe wolo Allahu Taa̒ala masababu tau boito helohutu susuu-aliyaalo uwoluo todelomo butoo̒ lo agama. Bolii̒o mao̒ butoo̒ boito bo mopobilohei tomanusia deu̒ manusia odusa.

Woloolo mola Allahu Taa̒ala mowali mohutu manusia mopiiohe wo-Lio

²¹ Bo botia Allahu Taa̒ala malo pobilohei dalalo woloolo mola manusia mopiiohe wo-Lio; wau dudelolio boito diaaluo aitalio wolo butoo̒ agama lo Yahudi. Bubuu-kuwaalo lei Musa wau bubuu-kuwaalo lomongo nabi tumbao̒ helo poi̒laalo mai sua̒li boito,

²² deu̒ Allahu Taa̒ala mowali mohutu manusia mopiiohe wo-Lio, tumbao̒ wonu manusia palacaya li Isa Almasi; Allahu Taa̒ala mohutu mai utie ode ngoa̒amila taa palacaya li Almasi; sababu diaaluo hiheedio:

²³ Ngoa̒amila tau mai̒lodusa wau lolamingo lonto Allahu Taa̒ala tao̒hilaa mopoa̒ahu olimongolio.

²⁴ Bo sababu odehu hilaa lo Allahu Taa̒ala wambao̒ uilohi mai wolo bebasi, wumbuta lomanusia wolo Allahu Taa̒ala luli lopiohei; dudelolio yito: manusia yilopatai li Isa Almasi.

²⁵ Allahu Taa̒ala lopobake mai li Isa Almasi alihu wolo opopate-Lio boito manusia poi̒laalolo molopato monto totala wonu timongolio palacaya o-Lio. Allahu Taa̒ala lohutu odito u mopo bilohei o adili-Lio. Sababu tou̒ yilalu mola masilabalia lo Allahu Taa̒ala duduu-sawaalo manusia, tilinggula Tio diila lohukuumani mai olimongolio.

²⁶ Bo botia hepilohutu-Lio ode dusa boito u mopo bukuti mao̒ o aadili-Lio. Wolo dudelo boito Tio mopo bilohei deu̒ batanga-Lio otutu; wau timii̒du taa palacaya li Isa poi̒laalo-Lio mai odelo taa maluli lopiiohe wolo Allahu Taa̒ala.

²⁷ Masababu uito ito didu o alasani umopo mangga-mangga lohilao. Yilongola odito? Wolo sababu ito helo ponao̒ u tulatulade todelomo butoo̒ agama lo Yahudi? Diila. Bo sababu ito palacaya.

²⁸ Sababu pulito lohuhamalio yito odie: Tau poi̒laalolio muli mopiiohe wolo Allahu Taa̒ala, diila bo sababu tio helo ponao̒ wolo u tulatulade todelomo butoo̒ agama lo Yahudi, bo sababu tio palacaya li Isa Almasi.

²⁹ Meaalo Allahu Taa̒ala boito Allahu Taa̒ala taulo Yahudi wambao̒? Diila, Tio olo Allahu Taa̒ala lobangusa wewo? Ooo̒, memangi Tio olo Allahu Taa̒ala lobangusa wewo!

³⁰ Sababu Allahu Taa̒ala bo tuwau. Tiolo tahe lohutu tau-tauwalo Yahudi luli lopiiohe wolo Allahu Taa̒ala sababu timongolio palacaya. Wau Tiolo olo tahe lohutu tau-tauwalo bangusa wewo luli lopiiohe wolo Allahu Taa̒ala; uito olo sababu timongolio palacaya.

³¹ Wolo utie boliilio deu̒ sababu ito palacaya li Almasi, yi ito molapi butoo̒ agama lo Yahudi? Sama-samaata diila! Tumbao̒ wolo opopalacayanto boito, ito mohulumati butoo̒ boito.