ROMA 2 - KITABI HABARI MOPIOHE

Hukuumani lo Allahu Taa̒ala

¹ Masababu uito, mongo Wutato, tatoonu Wutato, tilunggula Wutato motohilaa mopotala taa wewo? Wutato diila owolo-wolo u mopodulua lobatanga! Sababu wonu Wutato mopotala taa wewo, lebe-lebe pomao̒ Wutato lohihilao helohutu huhutu u tutuuwauwa debo odelo timongolio, yi Wutato malo podehu hukuumani tobatanga lohihilao olo.

² Otaawanto deu̒ wonu Allahu Taa̒ala mopodehu mai hukuumani ode tau-tauwalo tahe lohutu totoonulalo huhutu udebo odelo uito, yi putuusani lo Allahu Taa̒ala boito otutu.

³ Bo timongoli, Mongo wutato, helohutu lohihilao olo susuu-aliyaalo u pilotuludi mongoli ode tau-tauwala wewo! Wau to pikiilangi limongoli u timongoli moo̒lopato monto hukuumani lo Allahu Taa̒ala?

⁴ Meaalo timongoli diila botie paduli omuula lo Allahu Taa̒ala wau otanggalo hilaa boli osabali-Lio u odito udaa̒? Tantu otaawa limongoli deu̒ Allahu Taa̒ala mopo bilohei opopiohu hilaa-Lio sababu Tio motohilaa alihu timongoli molilihu monto dusa limongoli.

⁵ Bo timongoli baaa̒ngiola wau diila mohuto molomelo. Masababu uito timongoli lohihilaolo talohutu hukuumani limongoli heo̒duhenga mola buheetio to Dulahe Kiama, wonu Allahu Taa̒ala mopoilaalo mai mulukaa-Lio wau mopodehu hukuumani u aadili.

⁶ Sababu Allahu Taa̒ala mamo lontuli mai timii̒du tau motuuu̒de wolo huhutuulio.

⁷ Allahu Taa̒ala mongohi mai tutumulo tutu wau ohiheo-hiheolo mao̒ ode limongolio taa tatapu wau molotolo hilao hemohutu mopiohe u moo̒tapu mao̒ ulailaio̒, u hulu-hulumati wau u abadi.

⁸ Bo tau-tauwala tamopo udaa̒ batangalio lohihilao wau diila mohuto modungohe to Allahu Taa̒ala, bo modudua̒ u moleeto yi tau-tauwalo boito malaba-labaalo mulukaa mai lo Allahu Taa̒ala.

⁹ Timii̒du taa motohilaa mohutu u moleeto masikisa wau modutolo; bohu-bohulio taulo Yahudi, wau odito olo babaa-ngusawalo wewo.

¹⁰ Bo ngoa̒amila taa motohilaa mohutu mopiohe mawohia-Lio mai ololaio̒ wau ohulumati wau osalaamati lo Allahu Taa̒ala; bohu-bohulio ode taulo Yahudi; odito olo ode tau-tauwalo bangusa wewo.

¹¹ Sababu Allahu Taa̒ala mopohutu mai ngoa̒amila tau tutuuwauwa.

¹² Tau-tauwalo bangusa wewo ilodusa lou̒ diila motota butoo̒ agama lo Yahudi. Oditolio timongolio hukuu-maniyalo to bulemengo lobutoo̒ boito. Bo tau-tauwalo Yahudi ilodusa tou̒ mai̒lotaawa limongolio butoo̒ boito; sababu uito timongolio mapohilelio wolo moo̒ohuu̒ olo dadaasali tobutoo̒ boito.

¹³ Sababu taamuli mopiiohe wolo Allahu Taa̒ala, diila bo sababu tau boito malotota butoo̒ agama lo Yahudi, bo sababu tio helohutu wolo uwoluo todelomo butoo̒ boito.

¹⁴ Tau-tauwala bangusa wewo diila motota butoo̒ agama lo Yahudi. Bo wonu timongolio to ilohilaa lohihilao mohutu wolo u pilomalenta lobutoo̒ boito, hilaa limongolio lohihilaolo umowali butoo̒ toli mongolio, eleponu timongolio diila motota butoo̒ agama lo Yahudi.

¹⁵ Pii̒li limongolio mopo bilohei deu̒ wolo u pilomalenta lobutoo̒ boito malei tulade tohilaa limongolio. Hilaa u maloo̒tapu tinelo Eeya limongolio olo mopo bukuti mai sua̒li boito, sababu timongolio lohihilao tingga maito potalalio tingga maito poo̒tutuo lo pikiilangi limongolio.

¹⁶ Odieelo mola u de mamotoduo mai todulahee u matilantu boito. Todulahee boito – modudua̒ Habari Mopiohe upilo habari mai lowatia – Allahu Taa̒ala motimbulude li Isa Almasi, mamomutoo̒ ngoa̒amila u hitua-tuawua u sangaja hetutuo̒ lohilao wau pikiilangi lotaa ngoa̒amila.

Taulo Yahudi wau butoo̒ agama lo Yahudi

¹⁷ Bo botia woloolo mola wolo Mongo wutato lohihilao? Wutato longaku lohihilao taulo Yahudi. Wutato lotiwunela tobutoo̒ agama lo Yahudi wau Wutato leengahu wumbuta lo Wutato wolo Allahu Taa̒ala.

¹⁸ Wutato loo̒tapu totoonulalo potuhata lonto butoo̒ boito, tilinggula ilotaawa lo Wutato kahandaki lo Allahu Taa̒ala wau motota molantu toonu u mopiohe.

¹⁹ Wutato yakini deu̒ Wutato yito tau̒wa lotaa pitoo̒ wau tilango odeli mongolio tawoluo todelomo u modio̒lomo;

²⁰ Wutato tamoo didikia totau-tauwalo tao̒ adabu dupadupapa wau guru lotau-tauwalo tahi. Wutato yakini deu̒ todelomo butoo̒ agama lo Yahudi, Wutato o toonulalo pongotota wau o pongajali u otutu.

²¹ Wutato hemo ngaajali taa wewo; naa yilongola Wutato diila helo ngaajali batanga lohihilao? Wutato hemo ngaajali tau alihu diila mao̒ potao̒, lebe-lebe pomao̒ Wutato lohihilao hemotao̒!

²² Wutato hemo ngaajali tau alihu diila mao̒ pojina, lebe-lebe pomao̒ Wutato lohihilao hemojina! Wutato molonuo̒ to balaahala, lebe-lebe pomao̒ Wutato lohihilao hemohama babaa-langiyaalo lonto bebee-leyaalo balaahala.

²³ Wutato hemo pomangga-mangga mola deu̒ Wutato obutoo̒ lei Musa, lebe-lebe pomao̒ Wutato hemohina Allahu Taa̒ala lou̒ diila lodudua̒ buto-I̒o.

²⁴ Todelomo Kitabi tulatulade odie, “Sababu timongoli, tau-tauwalo Yahudi, yi tanggulo Allahu Taa̒ala pilo najisilio towolota lo babaa-ngusawalo wewo.”

²⁵ Wonu Wutato modungohe tobutoo̒ agama lo Yahudi, yi tuuna lo Wutato ohunalio olo. Bo wonu Wutato diila mowali moduduo̒ susuu-aliyaalo u pilomalenta todelomo butoo̒ boito, yi tuuna lo Wutato diila ohunalio sama-samaata.

²⁶ Wonu ngotaalio diila Yahudi, tadiila tiluuna, modudua̒ao̒ butoo̒ agama lo Yahudi, wolo Allahu Taa̒ala diila monganggapu olio odelo tamaa tiluuna?

²⁷ Wau tau-tauwala tadiila tiluuna boito mamo potala to Wutato taulo Yahudi, sababu Wutato obutoo̒ agama lo Yahudi wau Wutato tiluuna, bo Wutato lolambanga butoo̒ boito. Timongolio diila tiluuna, bo tumbao̒ timongoliolo tahemo dungohe butoo̒ agama lo Yahudi.

²⁸ Sababu taulo Yahudi u pulua diila bo tanggulio wambao̒ taulo Yahudi; wau taa u tio̒otutua tiluuna diila taa u tiluuna odelo lahiri wambao̒.

²⁹ Bolii̒o mao̒, ngotaalio lo Yahudi u pulua yito taa u hilaalio ojiwa Yahudi; wau tuuna u tutu yito tuuna tohale u kilalaja lo Rohullah, diila u tulatulade todelomo buku. Taa debo odelo uito mamololimo poi̒laalo momuji monto Allahu Taa̒ala, diila monto manusia.