ROMA 12 - KITABI HABARI MOPIOHE

Tumumulo duo̒lo Allahu Taa̒ala

¹ Mongo wutato! Allahu Taa̒ala mopiohe daa̒ olanto, uito sababuulio pohile lowatia lou̒ tio̒otutua alihu timongoli mopodewo batanga limongoli odelo tuwaulio lobake tutumulo utolomodu duo̒lo Allahu Taa̒ala wau moposanangi hilaa-Lio. Tabiyamu ode Allahu Taa̒ala musiilio odito.

² Diila mao̒ poduduo̒ totoonulalo dudelo lodunia botie. Hulii mao̒ Allahu Taa̒ala tamohutu mai batangamu lohihilao mowali bohu, alihu timongoli molomelo. Lou̒ odito timongoli mambo motota mao̒ u otohilaa lo Allahu Taa̒ala – deu̒ito-yito wolo umopiohe wau umoo̒ sanangi hilaa-Lio wau u wimu-wimumuto ngoa̒amilalo.

³ Allahu Taa̒ala malongohi mai ponu olaatia. Uito sababuulio watia monaseehati mai to Mongo wutato ngoa̒amilalo; diila mao̒ polaasa batanga lebe molaio̒ lou̒ otutuulio mao̒. Mamusi timongoli motiliki owowoluwoa lobatanga limongoli wolo dupadupapa lohilao; ngota-ngota motiliki mao̒ batangalio modudua̒ omambowa uilohi lo Allahu Taa̒ala olio masababu tio palacaya li Isa.

⁴ To batanganto o dadaata pongawaa̒. Timii̒du pongawaa̒ tingga o kalajaalio.

⁵ Odito olo wolanto. Eleponu ito ngoa̒amilalo dadaata, bo ito debo odelo batanga tuwau sababu ito tuwau woli Almasi. Wau ito ngota-ngota wuwuumbuta ngota-timongota odelo popoo-ngawaa̒alo monto batanga tuwau.

⁶ Ito ngota-ngota o tolia̒ngo momaya u hiwewo-wewoa. Totoo-lia̒ngawalo boito yilohi lo Allahu Taa̒ala olanto lodudua̒ odehu hilaa-Lio. Sababu uito ito musi mopohuna totoo-lia̒ngowalo boito. Taa u otolia̒ngo u mopohabari habari monto Allahu Taa̒ala, musi mopohabari habari monto Allahu Taa̒ala boito modudua̒ omambowa lo batangalio lohihilao.

⁷ Taa u otolia̒ngo u motulungi taawewo, musi otu-otutuulo mao̒ motulungi taawewo. Taa u otolia̒ngo mongaajali musi otu-otutuulo mao̒ mongajali.

⁸ Taa otolia̒ngo u mongohi sumangati ode taawewo, musi otu-otutuulo mao̒ mongohi sumangati ode taawewo. Taa okurunia u mongohi ode taawewo wolo u mililikilio, mamusi mohutu mao̒ uito wolo muula lohilao wau paatuti. Taa otolia̒ngo u mowali tau̒wa, musi otu-otutuulo mao̒ mowali tau̒wa. Taa otolia̒ngo u mopo bilohe odehu hilao ode taawewo, musi mohutu mao̒ uito wolo hilaa sanangi.

⁹ Potolia̒ngao̒ wolo ihilasi. Lonui̒ mao̒ u moleeto, wau potidihulo tou̒ wolo u mopiohe.

¹⁰ Mamusi Mongo wutato mototoo-lia̒anga ngota timongota wolo tataabia lohilao debo odelo tau-tauwalo tamohutato todelomo ungaalaa̒, wau wajibulio timongoli tinggai mumuuloa mongohi hulumati.

¹¹ Potio̒lohulo mokalaja. Diila mao̒ poti lantingo. Pokalajaalo duo̒lo Eeya wolo sumangati monto Rohullah.

¹² Mamusi Wutato motiwunela to Eeya wolo wengahu, posabalilo todelomo usuusa, wau poti otutuulo modua̒.

¹³ Tulungii mao̒ mopotuheta upalaluo lotau-tauwalo Nasara wewo wau tolimoa mao̒ mongo wutato ngoi̒imani tadiila otaawa lo Wutato, wolo hilaa sanangi todelomo bele limongoli.

¹⁴ Pohilea mola to Allahu Taa̒ala alihu Allahu Taa̒ala mobalakati mai tau-tauwalo tahi palangia to olemu. Ooo̒, pohilea mola to Allahu Taa̒ala mobalakati mai olimongolio, diila mao̒ polaa̒nati.

¹⁵ Poti wengahulo wolo tau-tauwalo tahi wengahe, wau pohiyongolo woli mongolio tahe hiyonga.

¹⁶ Poti tumulolo wolo mopiohe wau aamani ngota timongota. Diila mao̒ poti batingga lohilao, bo potuuu̒delo batangamu wolo tadupa-dupapa huhuloa̒lio. Diila mao̒ ponganggapu batanga lebe motota wolo u otutuulio mao̒.

¹⁷ Wonu tau mohutu u moleeto olimongoli, diila mao̒ pomalasi lou̒ moleeto. Pohutua mao̒ wolo uhe anggapuo mopiohe lotaa ngoa̒amila.

¹⁸ Monto olimongoli, potolo panilo lou̒ tio̒otutua u tumumulo dame wolo taa ngoa̒amila.

¹⁹ Mongo wutatuu̒! Sama-samaata diila mao̒ pomalasi niyati, hulii mao̒ Allahu Taa̒ala tamo hukuumani mai. Sababu todelomo Kitabi tulatulade, “Wau̒lo tamolontuli. Wau̒ tamamo hukuumani mai, tahuda lo Eeya.”

²⁰ Bolii̒o mao̒, wonu musumu polaangolo, wohia mao̒ tio ua̒alo; wau wonu tio mototoa̒ngo, wohia mao̒ tio uilumolo. Sababu wolo mohutu mao̒ odito, Wutato mamohutu olio mowali moolito.

²¹ Diila mao̒ polulia batangamu olaahe lou̒ moleeto, bo Wutato mamusi mopo olaaheo̒ u moleeto wolo umopiohe.