ROMA 11 - KITABI HABARI MOPIOHE

Opopiohu hilaa lo Allahu Taa̒ala ode bangusa lo Isirai̒lu

¹ Watia mohintu mai: Wolo Allahu Taa̒ala malolapi umati-Lio lohihilao? Tantu diila! Watia lohihilao ngotaalio lo Isirai̒lu wali mai lei Abraham, wau lonto suku Benyamin.

² Diila! Allahu Taa̒ala diila lolapi umati-Lio tamaa tilulao-Tio tumulalo mai bohulio. Otaawa lo Mongo wutato wolo u tulatulade todelomo Kitabi tomimbihu olei Elia, tou̒ tio lopodulohu sua̒li lo Isirai̒lu ode Allahu Taa̒ala. Tei Elia loloi̒ya,

³ “Oo Eeya, tau-tauwala malomate mongo nabi-Mu yila-yilateelo mao̒ wau helo ngantulu tataa-mbatiyalo hepo dewowalo bake ode Eeya. Taleitolaa bolo batanga lowatotia lohihilao wau timongolio ohilaa momate olo watotia mate-mateelo mao̒.”

⁴ Wolo pilolameto Allahu Taa̒ala odelei Elia? Allahu Taa̒ala lolameto, “Wau̒ malo lolaa mao̒ pitu lolihu lota ode batanga-U̒ lohihilao. Timongolio diipo pee̒enta mao̒ helolubo dewa Baa̒al.”

⁵ Odito olo masaatia botie; Woluo ngojumula ngoi̒di tau-tauwala tamaa tilulaoto Allahu Taa̒ala sababu odehu hilaa-Lio.

⁶ Tio lolulaota olimongolio patopatoa̒ to odehu hilaa-Lio wau diila patopatoa̒ tohuhutu limongolio. Sababu wonu tulaoto Allahu Taa̒ala boito patopatoa̒ tohuhutu lomanusia, yi odehu hilao lo Allahu Taa̒ala boito diilalo odehu hilao utuutu.

⁷ Oditolio, woloolo mola? Umati lo Isirai̒lu diila loo̒tapu wolo u helolohu limongolio. Taloo̒tapu bo ngokaumu kikiio̒ tau-tauwalo tamaa tilulaoto Allahu Taa̒ala. Tawewo ngoa̒amilalo baa̒ngiyolo to titiango Allahu Taa̒ala.

⁸ Sababu todelomo Kitabi tulatulade odie, “Allahu Taa̒ala lohutu hilaa wau pikiilangi limongolio lowali abalo; wau tunggula botia mato limongolio diila moo̒onto wau bulonga limongolio diila moo̒dungohu.”

⁹ Tei Dauda loloi̒ya olo, “Huliilo mao̒ popoo-tihungguwalo limongolio mowali taalo ode limongolio lohihilao, wau mowali huwango, tambati odehua limongolio wau moa̒antulu!

¹⁰ Huliilo mao̒ bibilohi mongolio mowali modio̒lomo alihu timongolio diila moo̒onto; wau huliilo mao̒ timongolio mowali bunggu ohiheo-hiheolo mao̒.”

¹¹ Watia luli lohintu: Tou̒ taulo Yahudi lodehu, wolo uito lotoduo mai alihu timongolio moa̒antulu? Sama-samaata diila! Bo sababu timongolio odusa, yi bangusa wewo tumbao̒ piloa̒ahu, tilinggula loo̒sababu taulo Yahudi lohiihia tobangusa wewo boito.

¹² Sababu bangusa lo Yahudi ototala wau diila lodudua̒ otohilaa lo Allahu Taa̒ala, yi babaa-ngusawalo wewo bilalakatia lo Allahu Taa̒ala. Tidiyolo mao̒ wonu wumbuta bangusa lo Yahudi wolo Allahu Taa̒ala muli mowali mopiohe; tantu lebe udaa̒ poli balakati u mawohi lo Allahu Taa̒ala.

Osalaamati babaa-ngusawalo wewo tadiila Yahudi

¹³ Bo botia opiohelio watia mobisala mai to Mongo wutato tadiila Yahudi! Ngotilonggadu botie, odelo rasulu duo̒lo babaa-ngusawalo tadiila Yahudi, watia helo polaia̒ daa̒ tuugasi lowatia.

¹⁴ Watia hemohalapu deu̒ watia mowali mopotoodei hiihia tobangusa lowatia lohihilao, alihu woleeto watia mowali mopoa̒ahu ngotayadu monto olimongolio.

¹⁵ Sababu timongolio pilotouli lo Allahu Taa̒ala, yi wumbuta lodunia wolo Allahu Taa̒ala luli lowali lopiohu; tidiyolo mao̒ wonu timongolio tilolimo Allahu Taa̒ala! Tantu uito tutuuwauwa wambai̒o debo odelo taamate muli tumumulai!

¹⁶ Wonu roti ngopita u bohulio mailohi ode Allahu Taa̒ala, uito boliilio ngoa̒amila rotilio wohi olo ode Allahu Taa̒ala. Wau wonu waa̒ato ayu yito miliki lo Allahu Taa̒ala, uito boliilio tataa-ngolio yito miliki-Lio olo.

¹⁷ Ngotayadu tataa-ngowaalo bungo loa̒yu jaituni – deu̒ito-yito tau-tauwalo Yahudi – mai̒loyodio. Wau tobakasi oyodio boito piloo̒mbitio mao̒ tango loa̒yu jaitun udiila topalihala, deu̒ito-yito Mongo wutato tadiila Yahudi. Wutato piloo̒mbitio teto alihu Wutato moo̒laasa mao̒ ngoa̒amila u mopiohe monto tutumulo rohu lotau-tauwalo Yahudi.

¹⁸ Masababu uito timongoli diila mao̒ ponganggapu moheelo olimongolio tamaa iloyodio debo odelo tango boito. Musi eela mao̒ limongoli deu̒ timongoli bo tango wambao̒. Wau diila tango u mongohi ua̒alo towaa̒ato, bo waa̒ato u mongohi ua̒alo ode tango.

¹⁹ Bo Wutato mamoloi̒ya, “Ooo̒, bo tataa-ngowaalo boito iloyodu alihu watia mowali poo̒mbitolo to batangio!”

²⁰ Uito memangi otutu. Bo timongolio tilapi sababu timongolio diila palacaya. Hiambola Wutato tilolimo sababu Wutato palacaya. Oditolio Wutato diila mao̒ potimenge kalana uito; bo bolii̒o mao̒ Wutato musi molaasa mohe.

²¹ Sababu wonu Allahu Taa̒ala diila lodehu hilao u molapi taulo Yahudi udebo odelo tataa-ngowaalo pulua boito, diila mao̒ lantobe Tio mamodehu hilao u molapi to Wutato!

²² Oditolio teea ito moo̒onto donggo boli piohio Allahu Taa̒ala wau donggo boli toheeto olo Tio. Tio lohutu lou̒ moo̒ohuu̒ olimongolio tao̒dusa, bo hilaa-Lio mopiohe ode Wutato – asali Wutato debo tumutumulo wolo opopio-Hio, wonu diila, yi Wutato olo matapilo-Lio.

²³ Wau tomimbihu tau-tauwalo Yahudi boito, wonu timongolio mohuheli monto pii̒li udiila palacaya, yi timongolio mamuli tolimoo-Lio; sababu Allahu Taa̒ala okawasa u muli mololimo olimongolio.

²⁴ Wutato tadiila asaliilio mai diila monto bangusa lo Yahudi yito debo odelo tango monto bungo lojaitun udiila topalihala. Naa, wonu Wutato, bubuu-lemenga wolo pii̒li lo Wutato, mowali poo̒mbitolo tobungo lojaitun pulua, tidiyolo mao̒ tau-tauwalo Yahudi tapilo humaya wolo tataa-ngowaalo bungo lojaitun pulua boito. Tantu lebe gambangi poli ode Allahu Taa̒ala u moponguli mao̒ olimongolio tobungo lojaitun limongolio lohihilao.

Lodehu hilaa lo Allahu Taa̒ala ode ngoa̒amila umati lomanusia

²⁵ Mongo wutato! Halapuo lowatia timongoli diila mao̒ molaasa mailotota totoonulalo hitua-tuawua. Sababu woluo sua̒li hitua-tuawua u kilahandaki lo Allahu Taa̒ala, bou̒ diipo ilotaawa lotau. Wau otohilaa lowatia otaawa mao̒ limongoli; deu̒ito-yito odie: Ngotayadu monto taulo Yahudi baaa̒ngiyolo, bo pii̒li limongolio boito mapohu-pohutu bo tunggula jumulaa lotau-tauwalo tadiila Yahudi tamonao̒ mai ode Allahu Taa̒ala malei wimumuto.

²⁶ Odieelo mola ngoa̒amila taulo Yahudi mamoa̒ahu. Sababu todelomo Kitabi tulatulade odie, “Olongia Tamoo-poa̒ahua mamei dungga mai monto Sion; Tio mamoluluto ngoa̒amila u moleeto monto wali mai lei Yako.

²⁷ Wau̒ mamo ngawade daantia botie woli mongolio tou̒ Wau̒ mongambungu duduu-sawaalo limongolio.”

²⁸ Sababu taulo Yahudi diila mohuto mololimo Habari Mopiohe monto Allahu Taa̒ala, yi timongolio malowali musu lo Allahu Taa̒ala; wau uito tumbao̒ maloo̒ pae̒eda to Mongo wutato tadiila Yahudi. Bo sababu matilulaoto Allahu Taa̒ala, yi tau-tauwalo Yahudi boito debo pilonu lo Allahu Taa̒ala domi tinenemoya limongolio.

²⁹ Sababu wonu Allahu Taa̒ala molulaotai tau wau mobalakati tau boito, Allahu Taa̒ala diila pee̒enta mao̒ muli mohama wolo umaa pilohutu-Lio.

³⁰ Muloololio mai timongoli diila modungohu to Allahu Taa̒ala. Bo botia Allahu Taa̒ala malo poi̒laalo deu̒ timongoli lolopato lonto totala, sababu tau-tauwalo Yahudi diila lodungohu.

³¹ Odito olo wolo tau-tauwalo Yahudi boito. Masaatia botie timongolio diila lodungohu to Allahu Taa̒ala, alihu timongoli poi̒laalolo molopata monto totala. Bo de timongolio olo mapoilaalolo molopato monto totala.

³² Sababu Allahu Taa̒ala malo poluli ngoa̒amila umati lomanusia kiluwasa lo odiila dungohu, alihu Tio mowali mopo bilohei odehu hilaa-Lio ode limongolio ngoa̒amilalo.

Poloi̒laalo momuji ode Allahu Taa̒ala

³³ Otutu polu-polutuo̒ okokaya lo Allahu Taa̒ala! Otutu udaa̒ tinepo wau pongotota-Lio! Tatoonu tamowali motulete totoonulalo putuusani-Lio? Tatoonu tamowali mongalati dudelo-Lio tou̒ tio mokalaja?

³⁴ Todelomo Kitabi tulatulade odie, “Tatoonu tamotota pikiilangi lo Eeya? Tatoonu tamowali mongohi naseehati o-Lio?

³⁵ Tatoonu tapee̒enta longohi hitua-tuawua to Eeya tilinggula mowali mohile wolo moo̒ohuu̒ balasi-Lio?”

³⁶ Allahu Taa̒ala talo powali totoonulalo u hitua-tuawua. Ngoa̒amilalo asaliilio mai lonto Allahu Taa̒ala wau duo̒lo Allahu Taa̒ala. Ilopujialo mola Allahu Taa̒ala u ohiheo-hiheolo mao̒! Amin. ROM