POHUMAYA 9 - KITABI HABARI MOPIOHE

Hikimati wau ohulodu

¹ Hikimati malo potihulao̒ bele, wau helo potulideo̒ opitu wolihilio.

² Tio malo ngoloto bibiahu ode potihunggu, lohutu taluhu angguru wau lopodapato tameloolo.

³ Mongobua tahi pomayawa ilahulalio lonao̒ mota helo ngiibo-ngiibode to tataa-mbatiyalo u molanggato tokota,

⁴ “Tatoonu tadiila o pongalaamani, toduolo odia mai!” To tadiila o aakali wau obudi, hikimati moloi̒ya,

⁵ “Dulo molaasa mao̒ ua̒alou̒ wau molamitao̒ angguru maa pilohutuu̒.

⁶ Tolailo ohulodu, alihu yio̒ tumumula sanangi tutu. Dudui̒lo dalalo lotaa molinepo.”

⁷ Wonu taa udiila mohuto ajaaliyolo poo̒taamu mao̒ totalaalio, tio mamopoi̒ii̒ olemu. Wonu taa moleeto oingoowamu, tio mamo muamuayo olemu.

⁸ Diila mao̒ pohentea̒ totaa udiila mohuto ajaaliyolo, tio mamolonua̒ olemu. Bo wonu taa molinepo poo̒taamu totalaalio, tio mamomasisi olemu.

⁹ Wonu taa molinepo wohiyamu naseehati, tio mamowali lebe mola molinepo. Wau wonu taa u modungohe to Allahu Taa̒ala ajaaliyomu, pongototaalio malebe oduhenga mola.

¹⁰ U mowali molinepo, bohu-bohulio tau musi olaasa hurumati wau moohe to Eeya. Wonu yio̒ motota to Taa Laba-labaalo mantali, yio̒ mamoo̒ toduo mai huhaama.

¹¹ Hikimati mamongohi mai olemu umulu hayahaya.

¹² Wonubolo hikimati milikiyomu, yio̒ lohihilao tau̒untungi. Bo wonu hikimati diila tolimoomu, yi yio̒ lohihilao olo tapoluhiolo.

¹³ Ohulodu yito debo odelo taabua tao̒hilaa mohentea̒ uito utie tadiila o pongalaamani wau diila motota moolito.

¹⁴ Tambatilio yito to huhebu lobelelio meaambo to huhebu hulubangi lokota.

¹⁵ Monteeto tio mongiibode totaa u hilaode. Taa u otutu wau belesi hilao paalutolio,

¹⁶ “Dulo mohepito, wuu timongoli tadiipo o pongalaamani!” Wau totaa udiila o aakali wau obudi tio moloi̒ya mao̒,

¹⁷ “Taluhu tilao̒ lamitio moolingo, wau molamelo tuutuuo̒ lebe motabo.”

¹⁸ Timongolio tamowali mangusaalio diila motota deu̒ taa umonao̒ mai ode olio mate teto; wau timongolio tamaa tilumuwota ode delomo belelio, botia woluo todelomo dunia lotaa yilate.