POHUMAYA 8 - KITABI HABARI MOPIOHE

Suala titiango lo hikimati

¹ Dungohi! Otinepo hemongibo-ngiibode, hikimati lomintaa̒a suala.

² Tio tihutihula to huhuu-luduwaalo totili lo dalalo, wau to titii-litangowala lo dalalo.

³ To huhebu hulubangi, to dalalo tumuwota ode kota, teteetolo odungohe sualaalio.

⁴ “Wuu, umati lo manusia to olemulo wau̒ mongiibode; timii̒du manusia todunia, poo̒tuotalo iiboduu̒!

⁵ Timongoli tadiipo o pongalaamani, pobalaajalilo opikiilangi u molalito; timongoli taa abaloolo, pobalaajalilo mowali molilihu.

⁶ Poo̒tuotalo totoonulalo loi̒yaau̒, sababu ngoa̒amilalo tuhata wau omaa̒ana.

⁷ Loloo-iyaau̒, otutu ngoa̒amila, sababu wau̒ molonuo̒ to yimbulo.

⁸ Totoonulalo loi̒yaau̒ juujulu ngoa̒amila, diaaluo penu boli ngotahe mao̒ u liliiu̒wa meaambo tilaala.

⁹ Ode tamotoloo̒, loi̒yaau̒ otutu, ode taa u molinepo, loi̒yaau̒ pasipasi.

¹⁰ Halagailo nasehatiu̒ mongilabota lotalaa̒ tutu, pou̒daa̒awa pongotota mongilabota lo hulawa tutu.

¹¹ Wau̒lo hikimati, lebe ohalaga wolo intani; diila mowali pobandingiolo penu boli loolo u hehalaa-puwomu.

¹² Wau̒lo hikimati; to olau̒ ohuhaama, otinepo wau pongotota.

¹³ Mohurumati to Eeya boliilio molonuo̒ u moleeto; wau̒ diila motohilaa osombongi wau obatingga. Wau̒ molonua̒ to pii̒li u moleeto wau tataa-heyaalo udiila juujulu.

¹⁴ Wau̒lo tamongohi ilihamu. Wau wau̒ olo tamopo woluo mao̒. Wau̒ motoloo̒ boli molotolo.

¹⁵ Mongo olongia bilantuwau̒ moponao̒ lo pamalenta, tahi kawaasawa tilulungiyau̒ mopolaio̒ u aadili.

¹⁶ Sababu buleu̒, taduduulaa̒ lo ulipu wau tahi bangusawa helo malenta wau loponao̒ u aadili.

¹⁷ Wau̒ motolia̒nga olimongolio tamotohilaa olau̒; tamololohe olau̒, mamoo̒ dungga olau̒.

¹⁸ To olau̒ dapa-dapaato okokaya wau olo ohurumati wau omaa̒amulu.

¹⁹ U motapumu monto olau̒ mongilabota hulawa tutu; lebe ohalaga wolo talaa̒ tutu.

²⁰ Wau̒ moduduo̒ dalalo u aadili, wau̒ modiambanga todalalo u juujulu.

²¹ Taa u motolia̒nga olau̒, pilopowaliu̒ kaya; piloo̒o-poluu̒ belelio wolo halata upango.

²² Wau̒ pilowali mai lo Eeya odelo u bohulio, wau̒lo tilapulo huhutu lo Eeya u bohulio tojamani muloololio mai daa̒.

²³ Wau̒ pilohutu lo Eeya tobohulo jamani, to bohulio, tou̒ dunia diipo pilopowali mai.

²⁴ Wau̒ pilotutu mai tou̒ diipo yilowali auhe daa̒, tou̒ diipo yiloluo mai bubuu-tuwaalo taluhu.

²⁵ Wau̒ pilotutu mai tou̒ huhuu-ideyaalo diipo pilopo tuli-Dio mola, tou̒ diipo huhuu-luduwaalo bilongu,

²⁶ tou̒ Eeya diipo lopowali mai dunia wau huhuu-tawaalo datahu wau luasi, tumbao̒ tou̒ Eeya diipo lopowali mai topingo huta u bohulio.

²⁷ Wau̒ losakusi mao̒ tou̒ hulungo pilopo bua̒du mola, wau ayuntaala pilopo bua̒du toitaato auhu,

²⁸ tou̒ Eeya lopo tambati heengo to dulente, wau lomuo̒ bubuu-tuwaalo auhe daa̒,

²⁹ tou̒ Eeya lomalentaao̒ taluhu deheto alihu diila mao̒ lumaode to sisii-patilio. Wau̒ olo pee̒-pee̒enta woluo mola teto tou̒ wumbato dunia pilopodutu lo Eeya.

³⁰ Wau̒ woluo totili lo Eeya odelo walao̒ tai̒lo hilaa-Lio, timii̒du dulahu wau̒lo tamoo̒ sanangi tutu to Eeya; laito wau̒ hemoitohe boli moitohe totalu lo Eeya.

³¹ Wau̒ helo tisana-sanangi toitaato dunia lo Eeya, wau molaasa sanangi tutu to wolota lomanusia.

³² Sababu uito, podungohulo olau̒, wuu taa humula! Dudui̒lo potuhataau̒, yi yio̒ masanangi tutu.

³³ Tolimowalo mao̒ nasehati, wau powaliilo mola molinepo, diila mao̒ anggapua gambangi uito.

³⁴ Potisanangilo tutu taa u modungohe olau̒ wau timii̒du dulahu motihuloa̒a mohima to huhebu lobeleu̒, wau mopoo̒daha-dahaalo mao̒ to hulubangi lo biluloa̒au̒.

³⁵ Tatoonu tamoo̒tapu olau̒, moo̒toduo tutumulo, to olio Eeya motuhatawa.

³⁶ Tatoonu tadiila moo̒tapu olau̒, mopoluhi batanga lohihilao; taa u molonua̒ olau̒, motolia̒ngo mautu.”