POHUMAYA 3 - KITABI HABARI MOPIOHE

Nasehati ode taa humula

¹ Diila mao̒ lipata wolo u mapilo ngaajaliu̒ mai olemu, walau̒uu̒. Eelailo laito palentaau̒,

² alihu humayao̒ umulumu wau moa̒ahu tutumulumu.

³ Mamusi yio̒ debo yakini wau tatapu molotolo hilao to Allahu Taa̒ala wau timongotamu. Eelailo uito wau tahuwalo todelomo hilaamu,

⁴ alihu yio̒ aahudu wau pasisia mai lo Allahu Taa̒ala wau manusia.

⁵ Poyakinilo to Eeya wolo lealeaatu lo hilaamu, wau diila mao̒ pongakua pongototamu lohihilao.

⁶ Eelailo mola Eeya todelomo totoonulalo hitua-tuawua u pohutuomu, yi Eeya mamopo bilohei olemu dudelo tutumulo u mopiohu.

⁷ Diila mao̒ anggapua batangamu lebe motota wolo u otutuulio mao̒; podungohulo to Eeya wau pohalahulo monto u moleeto.

⁸ Huhutuumu boito mamowali debo odelo wunemo olemu u mopoo̒luli batangamu wau moo̒luli hilaamu.

⁹ Hurumatia mola Eeya wolo mopodewo to Eeya ulaba-labaalo mopiohe monto totoonulalo halata miliki wau tilapulo hutamu,

¹⁰ yi yiyii-bungumu mamopolu wolo pale, wau taluhu anggurumu madadaata tutu tilinggula diila moo̒tuheeto tambati u polahuwalo.

¹¹ Wonubolo Eeya momate mai olemu, walau̒uu̒ tolimoa mao̒ uito odelo tuwaulio lopoe̒ela, wau diila mao̒ polee̒e hilaamu to pongaajali mai lo Eeya boito.

¹² Eeya momate taa u pilonu-Lio, tutuuwauwa odelo ngotaalio lotiyamo momate walao̒ tao̒tolia̒ngio.

¹³ Iluuntungilo mola taa u mowali molinepo wau ohuhaama.

¹⁴ Uuntungilio lebe udaa̒ wolo u motapulio monto talaa̒, wau lebe ohalaga wolo hulawa.

¹⁵ Hikimati lebe ohalaga wolo botu polioto; ngoa̒amila u hepatujuwomu mola diila moo̒ ngilabotao̒.

¹⁶ Hikimati moo̒wohi olemu umulu u hayahaya, okokaya, wau ohurumati.

¹⁷ Hikimati moo̒hutu tutumulumu sanangi wau aamani sontosa boli maa̒amulu.

¹⁸ Taa u motidihu motoheto to hikimati mamoo̒ toduo tutumula ututuulio tutu wau sanangi tutu.

¹⁹ Wolo hikimati, Eeya lopowali mai dunia; wolo daya pikiilangi watade-Lio Eeya lopobua̒de hulungo to tambati-Lio.

²⁰ Wolo pongototaa-Lio Eeya helohutu mai bubuu-tuwaalo lotaluhu to walungo huta lopoo̒o wau lopo tolohei taluhio wau heengo to hulungo lomopaa̒i taluhu ode dunia.

²¹ Sababu uito potidihulo to hikimati wau to pikiilangi u moontapo, walau̒uu̒! Diila mao̒ lopata sama-samaata,

²² yi tutumulumu mameitaalo – mopiohu wau moo̒sanangi.

²³ Yio̒ mamoonao̒ wolo aamani, diila tameiteduo̒.

²⁴ Yio̒ mamota motuluhu lou̒ diila molaasa moohe, wau yio̒ motuluhe meinuloto oo̒onua.

²⁵ Diila palalu yio̒ moohe lobaala u debolo meidunggalo debo odelo dutalo, wau molemba tau-tauwalo moleeto.

²⁶ Eeya mamodaha olemu. Eeya diila tamopoluli olemu meilotoo̒ ode delomo otuhata loimbulo.

²⁷ Wonu omambowamu u mohutu mopiohu totaa momalalu opopiohumu, diila mao̒ potoulia mopohutu mao̒ sua̒li boito.

²⁸ Diila mao̒ ahuli timongotamu mohima tunggula loombu mola, wonu to saaa̒ti botieelo yio̒ moo̒ tuulungi mao̒.

²⁹ Diila mao̒ pomatuju hitua-tuawua u moo̒luhi timongotamu tabilu-biluloa̒ totilimu wau momalacaya olemu.

³⁰ Diila mao̒ pohaamawa lou̒ diila o sababu wolo hingota-ngotawa tadiila pee̒enta mao̒ helohutu u moleeto olemu.

³¹ Diila mao̒ pohiihia totaa u mopohuna diila omanusia, wau diila mao̒ poduduo̒ pii̒li limongolio.

³² Sababu, Eeya molonuo̒ totaa u hipohutua u moleeto, bo Eeya mosahaabatia daa̒ wolo taa u motulidu tutumulio.

³³ Eeya molaa̒anati bele lotaa moleeto, bo mobalakati mai bele lo taa u modungohe o-Lio.

³⁴ Eeya molonuo̒ totaa u sombongi, bo mobalakati taa udupa-dupaapa lohilao.

³⁵ Taa molinepo mao̒duhenga mola moonu tanggulio, hiambola taa mohulodu helebe hente-hentea̒.