POHUMAYA 2 - KITABI HABARI MOPIOHE

Huna motolo miliki hikimati

¹ Tolimowaalo mao̒ totoonulalo pongaajaliu̒, walau̒uu̒, wau eelailo laito nanaa-seehatiu̒ olemu.

² Poo̒tuotilo wolo u molinepo wau tolopanialo mola u momaahamu mao̒.

³ Ooo̒, walau̒uu̒ tolopanialo mola u opikiilangi umolalito wau pohileelo polongalati.

⁴ Loloheelo uito, debo odelo mololohe hulawa, wau yilapitilo uito debo odelo mohilapita halata ulobu-lobungo.

⁵ Lou̒ odito mao̒taawamu wolo boliilio moohe to Eeya wau yio̒ mamoo̒tapu pongotota pasali lo Allahu Taa̒ala.

⁶ Eeyaalo tamongohi mai hikimati; monto Eeyaalo manusia moo̒tapu mai ilimi wau pongotota.

⁷ To taa u otutu belesi hilao wau diila o aibu, yilohia-Lio tuulungi wau poloduo̒la.

⁸ Eeya modaha totau-tauwalo tahi pohutua aadili, wau moduo̒lai olimongolio tahipo tolia̒nga o-Lio.

⁹ Wonu yio̒ modudua̒ olau̒, walau̒uu̒, mao̒taawamu wolo u aadili, juujulu wau mopiohu. Mao̒taawamu olo woloolo mola dudelolio yio̒ musi tumumulo.

¹⁰ Yio̒ mamowali molinepo, wau pongototamu mamopo sanangi hilaamu.

¹¹ Huhaama wau otolou̒mu mamoduo̒lai olemu,

¹² wau mongabuto olemu modudua̒a dudelo lo tutumulo udiila mopiohu, wau olo mopohalahe batangamu monto tau-tauwalo tao̒tunggilo moleeto.

¹³ Timongolio diila mohuto modudua̒a dudelo tutumulo u mopiohu; timongolio hemohama dalalo u modio̒lomo wau polupolu lodusa.

¹⁴ Timongolio hemoo̒tapu u sanangi monto huhutu limongolio u moleeto.

¹⁵ Timongolio diila juujulu wau dudelo tutumuli mongolio diila motulidu.

¹⁶ Yio̒, walau̒uu̒, mamowali mopotouli mao̒ paaluto lotaabua diila mopiohu tahemo tolopani moheinga hilaamu wolo loi̒ya u mopiohu.

¹⁷ Taabua boito diila tatapu wau molotolo hilao to dilelio wau malo lipata dantilio to Allahu Taa̒ala.

¹⁸ Wonu yio̒ ode belelio boliilio motidulunga ode mautu. Monao̒ mola ode olio tutuuwauwa wambai̒o lou̒ monao̒ ode dunia lotaa mate.

¹⁹ Taa u monao̒ mola ode olio diila pee̒enta mao̒ woluo tamuli mohualingai ode dalalo udulu-ulunga ode tutumulo.

²⁰ Sababu uito, walau̒uu̒, dudui̒ mao̒ obaaya lotaa mopiohu, wau potumuloolo modudua̒ u otohilaa lo Allahu Taa̒ala.

²¹ Sababu, taa u tumutumulo modudua̒ u otohilaa lo Alaahu Taa̒ala, duu̒yito-yito taa u otutu belesi hilaalio, timongoliolo tamaa motibiluloa̒ tolipu u dilanti mai lo Eeya.

²² Bo taa moleeto wau odusa mapomahulo ode bulemengio lo Allahu Taa̒ala monto lipu boito, debo odelo huo̒yoto bilunggato monto huta.