POHUMAYA 1 - KITABI HABARI MOPIOHE

Peni lo nanaa-sehatiyalo lei Salomo

¹ Uti-utieelo nanaa-sehatiyalo lei Salomo, walao̒ talolai̒ lei Dauda, olongia lo Isirai̒lu.

² Patujuulio yito u motulungi tau motota mao̒ woloolo mola mowali molinepo, wau motota uu̒udu lo tutumulo boli moo̒ paahamu totoonulalo wolo-wolo u hiluo̒ uwanto-wantohe boliilio u modelomo.

³ Nanaa-sehatiyalo botie mongaajali woloolo mola tau moo̒ tumulo wolo molinepo, juujulu, aadili wau otutu.

⁴ Taa udiila o pongalaamani ilaajalilio tilinggula o pikiilangi u motoloo̒, wau taa humula ilaajalilio mowali taa u motota wau mowali momikiilangi debo odelo dudelo lo tamoontapo.

⁵ Wolo nanaa-sehatiyalo botie taa molinepo olo mao̒duhenga mola pongototaalio, wau taa u mai̒lo sikola mamoo̒tapu totau̒wa.

⁶ Lou̒ odito timongolio moo̒ tonea̒ao̒ boli utuutuo̒ todelomo nasehati wau moo̒ paahamu tataa-heyaalo lotaa molinepo wau susuu-aliyaalo u pilopo dudulao̒ olimongolio.

Nasehati ode kaumu humula

⁷ U moo̒tapu mai ilimi ututuulio tutu, bohu-bohulio tau musi olaasa hurumati wau moohe to Eeya. Taa mohulodu diila momasisi hikimati wau diila mohuto aajaliolo.

⁸ Poo̒tuotilo wolo uiloi̒ya lotiyamo tiilaamu ode olemu, walau̒uu̒,

⁹ sababu totoonulalo pongaajali limongolio moo̒duhenga mola watademu u mopiohu debo odelo pake to lunggongo wau maina u mopogaaga lakumu.

¹⁰ Wonu taa odusa momaluto olemu, walau̒uu̒, diila mao̒ dudui̒ paaluto limongolio.

¹¹ Humayaalio timongolio moloi̒ya, “Ntali, dulo ito mololohe tau wau mokoloyo olio. Bo u moi-moitohe wambao̒, dulo ito moluhu taa udiila ototala.

¹² Botia timongolio hitumula sanangi wau seehati, bo de timongolio mamowali debo odelo taa u tio̒opatea.

¹³ Hamaanto babaa-langiyalo limongolio u ohalaga, alihu belento mopolu wolo balangi yilambato.

¹⁴ Dulo podudua̒i! De tayadunto tutuuwauwa tilapulo u tilao̒ mai!”

¹⁵ Diila mao̒ poduduo̒ wolo tau-tauwalo odito, walau̒uu̒! Walahi mao̒ timongolio.

¹⁶ Timongolio diila mowali motipoo̒yo wonu diipo moo̒hutu u moleeto. Otohilaa limongolio hua̒a momate-mateelo mao̒.

¹⁷ Hiambola boli bulungi olo diila tatumuota ode delomo eyaambu u bua̒bua̒ade totalu lomatolio,

¹⁸ bo tau-tauwalo hileeta boito tumbao̒ mopohuli taalo ode batangalio lohihilao – taalo u mamoo̒ topotala olimongolio.

¹⁹ Memangi, taa u hemopeehu ua̒alo walo diila omanusia mamo maayali mao̒ wolo nyawalio lohihilao.

Suala lo hikimati

²⁰ Dungohilo! Hikimati hemo tiango to dadaa-lalaalo wau hemonguatio̒ to tataa-nalapaalo!

²¹ Tio hemongiibu to huhuu-hebuwaalo hulubangi wau to tataa-mbatiyalo u rame:

²² “Wuu tau-tauwalo abaloolo! Tunggula omolua timongoli motohilaa debo odito? Omolua meidungga mai wakutuulio timongoli mohuheli diila momandungi pongotota wau diila mololimo pongaajali?

²³ Dungohilo wau̒, wonubolo wau̒ modinimu, yi to olemuulo mapo ilaalou̒ mai tuango hilaau̒ wau pongaajaliu̒ mai pongototaau̒.

²⁴ Timongoli maa tiliyanguu̒, bo timongoli diila mololimo wau diila mohuto momandungi.

²⁵ Ngoa̒amila nasehatiu̒ pilalongi mongoli wau u hediniyou̒ diila tilolimo limongoli.

²⁶ Sababu uito, wonu timongoli topotala maii̒iyau̒ timongoli. Wonubolo timongoli moohe, wau̒ mamohentea̒ olimongoli.

²⁷ Ooo̒, wau̒ mamohentea̒ olimongoli wonubolo timongoli moohe wau modutolo sababu odungga lobaala u meidungga mai debo odelo dutalo.

²⁸ Tou̒ boito timongoli mamotianga olau̒, bo wau̒ diila tamotuwahu. Timongoli mamololohe olau̒ penu boli tou̒toonu bo diila tamoo̒ dungga olau̒.

²⁹ Timongoli debo odelo taa udiila pee̒enta mao̒ ohilaa moo̒tapu pongotota, wau moomu modungohe to Eeya.

³⁰ Timongoli diila pee̒enta mao̒ ohilaa mololimo totoonulalo nasehatiu̒ meaambo mopoo̒tuoto u hediniyou̒.

³¹ Sababu uito, timongoli mamolaasa mao̒ akiibati lo totoonulalo huhutuumu wau ngoa̒amila patujumu u moleeto.

³² Taa udiila o pongalaamani maamate sababu hemo malonga olau̒, wau taa mohulodu mamoa̒ntulu sababu diila momandungi olau̒.

³³ Bo taa u modungohe olau̒ mataataalo. Tio tumumulo wolo aamani wau diila palalu moohe.”